Rey Saulqa, Goliat-ta wanutsishqa kaptinmi tröpakunata mandanampaq Davidta churarqan. Davidqa atska kutichömi chikeqninkunata vencirqan, y reqishqam tikrarirqan. Guërrapita cada kutiptinmi israelïta warmikunaqa tushur y kënö cantar chaskiyaq: “Saulqa chikimaqnintsikkunatam waranqëpayan wanutsishqa, peru Davidqa chunka waranqëpayanmi”. Tsëmi Saulqa chikipar qallëkurqan y wanutsita munarqan.

Davidqa arpatam cösa tocaq. Juk kutim, Saulta kushitsita tïrar arpata toquëkaptin, lanzanta Davidman Saul weqapëkurqan. Y David kukukïkuptinmi perqallaman ratëkurqan. Saulqa atska kutichömi wanutsita munarqan. Tsëmi Davidqa tsunyaq sitiukunaman escapakurqan.

Saulqa 3.000 soldädunkunata pusharkurmi Davidta ashirqan. Juk kutim, juk machëman Saul yëkurirqan, y manam cuentata qokurqantsu Davidwan soldädunkuna rurichö  këkäyanqanta. Tsëmi Davidpa soldädunkunaqa, “¡juklla wanuratsi!” niyarqan. Peru Davidqa shumaqlla witirirmi aqshunampa kuchunllata roqurapurqan. Peru tsëpitaqa, Jehovä akranqan reyta mana respetakunqampitam mana alli sientikurqan. Tsëmi munarqantsu Saulta soldädunkuna wanuratsiyänanta. Y tsë machëpita ëwakïkaptinmi sinchipa kënö nirqan: “Wanuratseqmanmi karqan, peru manam munarqötsu”. Pensari, ¿tsëpita patsëqa allinatsuraq Davidta Saul tratarqan?

Manam. Antis kutin kutinmi wanutsita munarqan. Juk kutim, Davidwan sobrinun Abisäi yachëllapa yëkuriyarqan Saul punïkanqan carpanman. Saulta cuidaq Abnerpis paqwë punukashqam këkarqan. Tsënam Abisäiqa Davidta kënö nirqan: “¡Kananmi sïqa makintsikchö këkan! Juklla wanuratsimushaq”. Peru Davidqa, “Jehoväpa makinchö jaqirishun. Antis lanzanta y yaku winakunan kuntullata apakamï” nirqanmi.

Davidqa juk jirkamanmi witsarqan, tsëpitam Saulwan tröpankuna këkäyanqan sitiuman kënö qayakurqan: “¡Abner! ¿Imanirtaq reyta cuidarqunkitsu? ¿Mëtaq lanzan y kuntun?”. Saulqa parlakïnimpita reqirirmi kënö nirqan: “Wanuratsimankimanmi karqan, peru llakipämarqunkim. Kananqa alleqmi musyä qamna Israelpa reynin kanëkipaq kaqta”. Tsënö nirirmi wayinta kutikurqan. Peru Saul chikipaptimpis wakin familiankunaqa Davidta kuyayaqmi.