¿Papänikitawan mamëkita cäsunëki fäcilku?. . . ¿Höraqa manam aw? Peru ¿imataq yanapashunkiman cäsukoq kanëkipaq? Jesus ruranqanmi. ¿Pëqa Jehovätawan Patsachö papäninta y mamänintam cäsukurqanku?. . . Masllata Jesuspita yachakurishun.

Jesusqa papänin Jehoväwanmi ciëluchö tärarqan. Peru Patsaman shamunqanchöpis teytankunaqa karqanmi. Josëwan Marïam kayarqan. ¿Musyëta munankiku teytankuna këman imanö chäyanqanta?. . .

Kë Patsachö Jesus yurinampaqqa Jehovämi juk milagruta rurarqan. Jesuspa kawënintam Marïapa pachanman churëkurqan. Isqun killapam wakin wamrakunanö, Jesusqa mamampa pachanchö winarqan, tsëpitanam yurikurirqan. Tsënöpam Marïaqa llulluyoq tikrarirqan. Qowan (ollqun) Josëwanmi Jesusta wätayarqan.

Jesusqa 12 watayoq këkarmi, papänin Jehoväta kuyanqanta rikätsikurqan familianwan Jerusalenta ëwayanqanchö. Jehovä adoraqmi ëwayarqan. Wayinkunata kutikïkarnam Josëwan Marïaqa mäkuriyarqan, pëkunawan Jesus mana ëwëkanqanta, tsëmi ashiyarqan y ¡manam tariyarqantsu! ¿Imatataq Josëwan Marïa rurayarqan?. . .

Jinan höram Jerusalenta kutikuyarqan. Y më tsëpam kima (kimsa) junaqpa ashiyarqan. ¡Alläpa mantsakashqam këkäyarqan! Peru taririyarqanmi. ¿Mëchötaq tariyarqan?. . . Templuchömi. ¿Imanirtaq tsëchöqa këkarqan? Porqui tsëchömi Jehoväpita yachakïta puëdeq. Jehoväta kuyarmi kushitsinqanta rurëta munaq. Jatunyärirpis y nunakuna chikikäyaptimpis Jehovätaqa cäsukïkarqanllam. ¿Y Josëtawan Marïataqa cäsurqanku?. . . Awmi, tsëtam Bibliaqa willakun.

¿Jesusqa imëpis cäsukoqmi karqan aw?. . . Qampis pënö cäsukoq këta puëdinkim. Cäsukunan sasaraq (ajaraq) kaptimpis papänikita y mamänikita cäsukunëkiqa alläpam precisan. ¿Cäsunkitsuraq?. . .