Alli tsarakoq këqa yanapamantsik mana allikunapa pasarpis mana qelanäkurinapaqmi. Alli tsarakoq këtaqa yachakuntsik tiempu pasanqanmannöran. Wamrakunaqa purita yachakurnin atska kutim ishkiyan, tsënöllam alli tsarakoq këtapis mana allikunapa pasar-raq yachakuyan.

Wakin wamrakunaqa rurayanqankuna mana alli yarquptin, mana allikunapa pasar o corregiyaptinmi qelanäkuriyan, y wakinkunaqa rurëkäyanqantapis dejariyanmi. Peru wamrakunaqa këkunatam entiendiyänan:

• llapantaqa allillata rurëta mana puëdinqantsikta (Santiägu 3:2).

• llapantsikpis mana yarpanqantsik hörakuna mana allikunapa pasanqantsikta (Eclesiastes 9:11).

• llapantsikpis corregimänata wananqantsikta y tsëraq yachakunqantsikta (Proverbius 9:9).

Wamrëki alli tsarakoq këta yachakurqa, mana allikunapa pasarpis allim tsarakunqa.

Imatapis pantaptin

BIBLIACHÖ CONSËJU: “Alli nunaqa qanchis kuti ishkirpis sharkunqam” (Proverbius 24:16).

Wamrëkita entienditsi, ruranqankuna höraqa alli o mana alli yarqunampaq kaqta. Këllaman pensari: ¿imataraq ruranqa exäminchö mana alli yarqapukur? ¿Qelanärirtsuraq, “llapan ruranqäpis mana allillam yarqun” nir dejarinqa?

Wamrëkita alli tsarakunampaq yachatsirnin yanapë imanö mas alli ruranampaq kaqta. Tsënöpam mana allikunapa pasar quejakurlla kanampa rantin, tsë problëmata altsëta procuranqa.

Peru ama qamqa wamrëkipa rantin tsë problëmata altsëtsu. Tsëpa rantinqa, kikin altsanampaq yanapë. Y wamrëkitam kënö tapunkiman: “¿Imataraq rurankiman tsë yachëkätsiyäshunqëkita maslla entiendinëkipaq?”.

Desgraciakuna pasakuptin

BIBLIACHÖ CONSËJU: “Qamkunaqa manam musyayankitsu warë imanö këkäyänëkipaq kaqta” (Santiägu 4:14).

Manam musyantsiktsu warë warantin imanö kawanapaq kaqta. Qellënintsik kaptimpis rasllam o sasllam ushakärinman y alli saloryoq karpis mana pensanqantsik höram qeshyarishwan. Tsëmi Bibliachöqa kënö nin: “Alli cörreq karpis höraqa manam ganayantsu, puëdeq karpis höraqa manam guërrata ganayantsu [...]. Llapankunapis mana pensayanqan höram imëka mana allikunapa pasayan” (Eclesiastes 9:11).

Imëka peligrukunapita wamrëkita cuidanqëkiqa allim. Peru rasumpa kaqchöqa, manam kë vïdachö llapan problëmakunapitaqa cuidëta puëdinkitsu.

Capazchi wamrëkiqa trabäjupaq o qellëpaq yarpachakunraqtsu, tsënö kaptimpis juk problëmakunapaqa pasanqam. Capazchi amïgunnaq tikrarinman o kuyanqan familiankuna wanurinman. a

Alli kananta munar corregiyaptin

BIBLIACHÖ CONSËJU: “Yachaq nuna kanëkipaqqa, consejayäshuptiki y corregiyäshuptiki cäsukuy” (Proverbius 19:20).

Mas alli kanampaq corregiyaptinqa, manam mana alli tratëkäyanqantatsu pensanan. Tsëpa rantinqa, mas alli pensanampaq y mas alli portakunampaq corregikäyanqantam entiendinan.

Wamrëkita entienditsi corregiyanqanta cäsukurqa, pëpis y qamkunapis mana sufriyänëkipaq kaqta. John jutiyoq teytam kënö nin: “Wamrëkipa problëmanta qam altsaptikiqa, wamrëkiqa manam yachakunqatsu y mas problëmamanmi chanqa. Ninata prendir prendir ëwaptin qepanta upitsir upitsir ëwaq cuentam yanapanqëkiqa kanqa. Y manam ishkëkipis kushishqaqa kawayankitsu”.

¿Imanötan wamrëkita yanapankiman mas alli kanampaq corregiyaptin? Escuëlachö kar o juk sitiuchö karpis corregiyaptinqa, ama wamrëkipa biennin yarqur defenditsu. Tsëpa rantinqa kënö tapuy:

• “¿Imanirtan corregïkäyäshunki?”.

• “¿Imatataq rurankiman mas alli kanëkipaq?”.

• “Yapëchöqa tsënö pasakuptin, ¿imataraq rurankiman?”.

Mas alli kanampaq corregiyaptin chaskikunampaq wamrëkita yanaparqa, poqu nuna tikrarpis alli kawakunampaqmi yanapëkanki.