Noqaqa 1960 watachömi yurikurqä, tsë witsampaqqa, mamänïtam chunka qanchis (17) watayoq këkaptin teytä jaqirishqa karqan. Mamänïwan noqaqa awilükunawanmi Alemania nacionpa Burg nishqan ichikllan markanchö täräyarqä. Familiäqa wakinkunanömi Diosman creiyaqtsu.

Awilüqa alläpam kuyamaq y tsëqa alläpam kushitsimaq. Imallatapis ruranäpaqmi imëpis nirëkämaq, montikunaman lloqarkur rämankunata rutunäpaqmi nimaq. Tsë rurëqa alläpam gustamaq. Wamra kënïchöqa alläpa kushishqam karqä.

Qanchis watayoq këkar escuëlachö segundu gräduta qallëkarmi, juk accidenti pasëkamarqan. Escuëläpita wayïman kutikarmi, alta tension postiman lloqarïkurqä, y puwaq metrutanö lloqëkaptïmi electricidä ruparamarqan y wanushqa cuentatam jaqiramarqan. Hospitalchöraqmi mäkamurqä, peru rikrannaqnam këkarqä. Rikräta electricidä paqwë ruparishqa kaptin y heridäkuna alläpa grävi kaptinmi roquramushqa kayarqan, porqui tsëta mana rurayaptinqa wanurïmanmi karqan. Awilükunawan mamänïqa alläpa llakishqam këkäyarqan. Peru noqaqa wamrallaraq karmi cuentata qokurqätsu warë warätin alläpa sufrinäpaq kaqta.

Hospitalpita yarqurirqa, escuëlämanmi estudiaq kutirirqä, y defendikïta mana puëdiptïmi estudiaq mayïkuna noqapita burlakuyaq, tanqayämaq y imëkawan qompayämaq (saqmayämaq). Tsënö mana väleqtanö sientitsimar insultayämanqanmi alläpa llakitsimarqan. Tsëmi Birkenwerder escuëlaman churëkayämarqan. Wayïpita karuchö kaptinmi, mamänïwan awilükunaqa watukayämëta puëdiyaqtsu qellëninkuna mana kaptin, vacacionkunallachömi pëkunataqa rikaq kä. Chunka watapam tsë escuëlachö quedakurqä.

Chakïwanmi imëka rurëta yachakurqä. Noqapaqqa alläpa difïcilmi karqan cucharata o tenedorta chakïllawan tsarirkur mikïqa, peru imëkanöpam yachakurirqä. Jinamampis, kirüta cepïlluwan paqakïta (awikuyta) y naqtsakïtam yachakurqä. Hasta chakïwanmi sëñas rurëta yachakurqä parlanqä höra. Chakïqa imëka makï cuentam tikrarirqan.

 Jövin kanqä witsanqa ciencia ficcion nishqampaq parlaq librukunata leyim gustamaq. Tsëmi imëka rurëta puëdinäpaq, rikräta robotpatanö rurayäpamänampaq pensaq kä. Chunka chusku (14) watayoq këkarmi cigärru shoqïta qallëkurqä, y tsëqa wakinkunanölla kanqätam sientitsimaq. Kënömi pensaq kä: “¡Cigärru shoqïqa mayorkunallapaqmi, peru rikrayoq o rikrannaq karpis tsëtaqa rurëta puëdïmi!”.

Markächöqa ocupädum karqä. Juventud Libre Alemana nishqanmanmi apuntakurqä, tsë grüpuchö jövinkunaqa, llapankunapis igual-lla kayänampaqmi yanapakuyaq, y tsëtaqa gobiernum yanapaq. Tsëchöqa secretariunömi trabajarqä. Jina, cantayanqankunaman, poesïata y tukï pukllakunata rurayanqankunamanmi apuntakurqä. Estudiükunata usharirqa juk tiempupam yachakurllaraq karqä, tsëpitanam markächö juk trabäjuta taririrqä. Y tsëpitaqa, wakinkunanö këta munarmi postïsu makita mas seguïdu utilizarqä.

Juk junaqmi trabäjüman ëwanäpaq trenta shuyëkaptï, noqa kaqman juk nuna witiramur, Diosqa rikräta kutiratsimïta puëdimunqanta nimarqan. Tsënö nimanqanman yarpachakurmi quedarirqä. Rikrayoq këtaqa alläpam munëkurqä, peru tsënö nimanqanmanqa manam ichikllapis creirirqätsu. Porqui noqaqa manam Diosman creeqtsu kä. Tsëpita witsëpaqa, manam tsë nunawan tinkïta munarqätsu.

Tsëpita ichik tiempullatam, juk trabajaq mayï familianta reqitsimänampaq wayinman invitamarqan. Cafëta upïkäyaptïmi, teytankunaqa Diospaq parlar qallëkuyarqan. Jehovä jutin kanqantam niyarqan. Manam imëpis wiyashqatsu karqä Diospa jutimpaqqa (Salmu 83:18). Peru kënömi pensarirqä: “Imapis jutin kakutsun, peru Diosqa manam kantsu. Pantashqa këkäyanqantaqa rikäratsishaqmi”. Dios mana kanqanta creikarpis, Bibliapita parlapäyämänantaqa munarqämi. Peru Dios mana kanqanta rikätsikïtaqa manam puëdirqätsu.

Bibliapa willakïninkunata yachatsiyämanqanmi, Diosman creir qallanäpaq yanapamarqan. Cuentatam qokurirqä mëtsika watakunapana Bibliachö Dios willakunqankuna cumplikashqana kanqanta. Tantiyarinapaq, juk doctortaqa imanö sientikuyanqanta willayanqanmi yanapan imawan qeshyayanqanta cuentata qokunampaq. Tsënöllam ‘ushanan junaqkunapaq’ Biblia willakunqan cumplikëkanqanta cuentata qokurinäpaqqa, entëru Patsachö pasakïkanqankunata, Mateu librupa 24 kaq capïtuluntawan, Lücas librupa 21 kaq capïtuluntawan y 2 Timoteu 3 kaq capïtuluntawan igualatsiyanqä yanaparamarqan. a ¡Espantashqam quedarirqä! Bibliachö tsë willakïkuna cumplikëkanqanqa clärum këkarqan.

Yachakïkanqä rasumpa kanqantam següru këkarqä. Noqaqa chunka watapitapis maspam cigärruta shoqurqä, peru tsëta jaqirinäpaqmi Jehoväman mañakunqä yanapamarqan. Juk watapam Bibliapita yachakur sïguirqä, y 1986 wata 27 de abril killam bañakuyänan tïnallachö pakëllapa bautizarayämarqan,  porqui tsë witsampaqqa Alemania nacionchömi Jehoväpa testïgunkuna yachatsikuyänanta michäkïkäyarqan.

Wayikunallachömi wallkaqlla juntakäyaq kayä, porqui Diospita yachatsikuyänätam michäkuyarqan. Tsëmi wallkaq Testïgukunallata reqeq kä. Peru kushikïpaqqa karqan, Alemania occidental markaman viajanäpaq autoridäkuna permitirayämanqanmi, tsëchöqa manam yachatsikuyänäta michäkuyarqantsu. Tsëmi asamblëakunaman ëwëta puëdirqä, y tsëmanqa manam imëpis ëwashqatsu karqä. Shumaqmi karqan mëtsika cristiänu mayïkunata rikëqa.

Berlin markapa perqankunata juchuratsiyanqampita ichik tiempu pasarinqanchöqa, mananam Testïgukuna yachatsikuyänantaqa michäkuyarqannatsu. Tsëmi mana mantsapakushpana yachatsikïta puëdir, Diospita mas yachatsikïta munarqä. Peru mana reqishqäkunawan parlëtaqa alläpam mantsapakoq kä. Porqui rikrannaq kanqä, y atska tiempupa internäduchö kashqa karmi mana väleqnö sientikoq kä. Peru tsënö kaptimpis, 1992 watachöqa, killachö joqta chunka (60) hörakuna yachatsikïtam procurarqä y puëdirqämi, y tsëqa alläpam kushitsimarqan. Tsëmi llapan killakuna tsënö yachatsikunäpaq churapakarqä y kima watapam tsëta rurarnin sïguirqä.

Biblia kënö ninqanmanmi imëpis yarparä: “¿Pitaq pishipan, y noqapis mana pishipätsu?” (2 Corintius 11:29). Rikrannaq karpis pensëta y parlëtaqa yachämi, tsëmi wakinkunata yanapanärëkur imëkata rurä, y noqanö pasëkaqkunataqa entiendïmi. Musyämi imëkata rurëta munarpis mana puëdir imanö sientikuyanqanta, tsëmi tsënö sientikoqkunataqa yanapëta procurä. Tsëta ruranqäqa alläpam kushitsiman.

Höraqa alläpa llakishqam sientikü, porqui wakin nunakunanö sänu këmi gustamanman. Imëkata rurëta puëdirpis, rikrannaq karmi wakinkunanötsu imatapis raslla rurarï. Cada junaqmi kë textuta yarpä: “Dios kallpata qomaptinmi imëkapaq kallpä kan” (Filipensis 4:13). Cada junaq imëkata ruranäpaqmi Jehoväqa imëpis kallpata qomashqa. Pëqa manam imëpis jaqimashqatsu, tsëmi noqapis pëta jaqita munätsu.

Jehovä Diosqa juk familiä qomarninmi bendicimashqa, tsënö familiayoq këtaqa wamra kar y jövin karmi alläpa munëkurqä. Elki jutiyoq juk alläpa alli warmitam tarirqö. Pëqa alläpa kuyakoq y llakipäkoqmi. Jinamampis, entëru Patsachö millonyëpayan Jehoväpa testïgunkunam, wawqïkuna y panïkuna cuenta kayan.

Shumaq Patsachö ‘imëkakunata mushoqta ruranampaqmi’ Diosnintsik änikushqa, tsëta cumplimunampaq kaqta musyëqa alläpam shoqaman. ¡Rikrämi yapë kanqa! (Revelacion 21:5). Jesusqa qeshyëkaqkunatam kachakätsirqan, jina juk nunapa rinrinta roqurayäpuptimpis kachakäratsirqanmi, tsëkunaman pensëmi, Dios änikunqanta mas entiendinäpaq yanapaman (Mateu 12:13; Lücas 22:50, 51). Jehovä änikunqankuna y Jesus milagrukunata ruranqankunam yanapaman ichikllachöna rikrayoq kanäpaq kaqman markäkunäpaq.

Tsënö kaptimpis, Jehoväta reqinqämi mas jatun kaq bendicionqa. Pëqa Teytä y amïgümi tikrashqa, shoqaman y kallpatam qoman. Rey David ninqanmi noqachö cumplikan, pëqa kënömi nirqan: “Jehovämi kallpä [...,] tsëmi shonqü alläpa kushikun” (Salmu 28:7). Rasumpa kaqtam yachakurqö y manam imëpis jaqishaqtsu. Rikrannaq karpis, kushishqam Jehoväta sirwï.