Mana imëpis ëwanqëki sitiuman chëta munarqa, ¿imatataq rurankiman?

1. 1. ¿Pensanqëki nänipa o allitanö rikanqëki nänipatsuraq ëwankiman?

2. 2. ¿Nänita reqiyanqanta pensartsuraq jukkunapa qepanta ëwankiman?

3. 3. ¿Mëpa ëwanëkipaq kaqta musyanëkipaqtsuraq mäpata rikankiman o tsë nänita reqeq alli amïguykitatsuraq tapunkiman?

Juk y ishkë kaqchö ninqankunata rurarqa capaz mëmampis chanki. Tsënö kaptimpis, capazchi munanqëki sitiumantsu chanki. Peru kima kaqchö ninqanta rurarqa munanqëki sitiumanmi chanki.

Kawë vïdantsikqa mëtapis ëwënömi, llapantsikmi musyëta munantsik kushishqa kanapaq imata ruranapaq kaqta. Kushishqa o mana kushishqa kanqantsikqa imata decidinqantsikpitam kanqa, tsëmi allita decidinapaq alli consëjukunata wanantsik.

Kawë vïdantsikchö wakin decidinqantsikkunaqa manam alläpa precisantsu, peru wakin decidinqantsikqa allipaq o mana allipaqpis kanmanmi y vïdantsiktapis cambiarinmanmi. Tsëkunachö decidinqantsikmi rikätsikun imakunata allitanö o mana allitanö rikanqantsikta, y noqantsikpaq o familiantsikpaqpis allipaq o mana allipaqmi kanqa. Wakin asuntukunaqa këkunam kanman:

• Oqllanakuy asuntu y casädu vïda

• Honrädu kë, trabäju y qellë asuntu

• Wamrakunata wätë

• Jukkunata imanö tratanapaq kaq

¿Imanötan musyankiman tsë asuntukunachö decidinqëki qampaq y familiëkipaqpis alli kanampaq kaqta?

Llapantsikmi këman pensanantsik: “¿Imatan yanapamanqa alli decidinäpaq?”.

Kë Täpakoq revistachömi yachakunki ima alli kanqanta musyanëkipaq y alli decidinëkipaq Bibliaman imanir confiakunëkipaq kaqta.