1, 2. (1) Diospa jatun qarëninchöqa, ¿imakuna mastaq këkan? (2) ¿Ima tapukïkunatataq kë yachatsikïchö contestashun?

JEHOVÄQA alläpa kuyamarnintsikmi, noqantsikrëkur wanunampaq kuyë Wamranta kachamurqan (Juan 3:16; 1 Juan 4:9, 10). Këmi Jehovä qomanqantsik mas jatun kaq qarëqa. Tsëmi apostol Pabluqa, ‘allapa jatun qarëmi’ nirqan (2 Corintius 9:15). Tsënö nirqa, ¿imapaqtaq parlëkarqan?

² Jesus wanunqanqa, clärum rikätsikun Diosnintsik llapan änimanqantsikkunata cumplinampaq kaqta, tsëtam apostol Pabluqa musyarqan (leyi 2 Corintius 1:20). Diospa ‘jatun qareninqa’ Jesus wanunqan, Dios alläpa kuyamanqantsik y imëka allikunata qomanqantsikmi. ¡Kë jatun qarëwanqa manam imapis igualantsu! Peru ¿imanötaq sientikuntsik kë jatun qarëpita? ¿Imatataq rurëkänantsikna Jesus Wanunqanta Yarpë junaq këllachöna këkaptinqa? Kë wataqa yarpäshun mierculis 23 de marzu killam.

3, 4. (1) ¿Imanötaq sientikuntsik juk qarëta chaskirirnin? (2) ¿Imanöraq juk qarë kawënintsikta cambiarinman?

³ Llapan qarëkunam kushitsimantsik. Peru wakin qarëkunaqa hasta kawënintsiktam cambiarinman. Këllaman pensarishun, imatapis mana allita rurarinkiman y tsërëkur wanunëkipaq condenariyäshunkiman. Y wanunëkipaqna këkaptiki, juk mana reqinqëki nuna rantiki wanunampaq änikurinman. ¿Imanöraq sientikunkiman?

⁴ Itsachi mana alli kawakïnikita jaqirir allina kawakunkiman: mas kuyakoq këta, wakinkunata shumaq tratëta o mana allita rurayäshoqnikikunatachi perdonëta sinchikunkiman. Llapan kawënikichöchi tsë mana reqinqëki nuna qampaq ruranqampita agradecikunqëkita rikätsikïta procurankiman.

5. ¿Imanirtaq nintsik imëka qarëpitapis mas jatun kaq qarëta Diosnintsik qomanqantsikta?

⁵ Kë igualatsikïchö rikanqantsikpitapis, mas jatun qarëtam Jehoväqa qomarquntsik (1 Pëdru 3:18). Jutsasapa karninmi wanunantsikpaq llapantsik condenashqa kantsik (Romänus 5:12). Peru Diosqa alläpa kuyamarnintsikmi rantintsik wanunampaq kuyë Wamranta kachamurqan (Hebrëus 2:9). Peru manam wanïllapitatsu libramantsik, sinöqa wanïtam chipyëpa ushakäratsinqa (Isaïas 25:7, 8; 1 Corintius 15:22, 26). Jesusman markäkoq kaqqa, wakinmi ciëluchö y wakinnam Patsachö kushishqa imëyaqpis kawakuyanqa (Romänus 6:23; Apocalipsis 5:9, 10). Peru Dios qomanqantsik qarëchöqa maskunam kan.

6. (1) ¿Ima qarëtataq masqa rikëta munanki? (2) ¿Imanötaq Diosnintsik kuyamanqantsikpita agradecikushwan?

⁶ ¿Ima maskunataq Jehoväpa qarëninchö këkan? Patsam juk paraïsuman tikranqa, qeshyaqkunam kachakäyanqa y wanushqakunam kawariyämunqa (Isaïas 33:24; 35:5, 6; Juan 5:28, 29). Kë shumaq qarëpitaqa Jehovätawan Jesustam alläpa kuyantsik. Peru ¿imanötaq agradecikoq kanqantsikta rikätsikushwan? Jesus ruranqanta qatirnin, cristiänu mayintsikkunata kuyarnin y shonqupita patsë perdonakoq karninmi.

7, 8. (1) Jesus kuyamanqantsikpita agradecikurqa, ¿imataraq rurëta munashun? (2) ¿Imatataq ruranantsik Jesuspa kuyakïnimpita agradecikurqa?

⁷ Dios kuyamanqantsikpita agradecikoq kanqantsikmi yanapamänantsik, kawënintsikchö Jesusta respetanapaq. Apostol Pablum kënö nirqan: “Jesucristopa cuyacuyninmi nogacunataga obligayäman” (leyi 2 Corintius 5:14, 15 *). Jesus kuyamanqantsikpita agradecikurqa, kuyëta y respetëtam munashun, tsëtam Pabluqa musyarqan. Noqantsikrëkur Jehovä ruramunqankunata alleq entiendirqa, Jesus munanqannömi kawakïta procurantsik. ¿Imanö?

⁸ Cristu ruranqantam “alleq tantiyëkur” ruranantsik (1 Pëdru 2:21, NM; 1 Juan 2:6). Jehovätawan Jesucristuta wiyakurninqa, kuyanqantsiktam rikätsikuntsik. Tsëmi Jesus kënö nirqan: “Pipis mandacushqäcunata wiyar cäsucorqa noqatam cuyaman. Cuyamaqnïtaqa Papänï  cuyanqam, y noqapis cuyashaqmi. Y cuyamaqnïtaqa mäcatsishaqmi pewan quecanqäta” (Juan 14:21; 1 Juan 5:3).

9. ¿Imapitataq alleq tsarakunantsik?

⁹ Jesus Wanunqanta Yarpë witsanchöna këkarqa, alleqmi pensanantsik kawënintsikta imanö utilicëkanqantsikman (rikäri “Maslla entiendinapaq” neq recuadruta). Kënö tapukushun: “¿Imakunachötaq Jesus ruranqanta qatikäna? ¿Imakunachötaq pishinraq mas alliyänä?”. Kë tapukïkunata rurakunantsikqa alläpam precisan, porqui Diosta mana reqeqkunaqa llapan nunakuna rurayanqanta ruranapaqmi obligamënintsikta munayan (Romänus 12:2). Alkäbulla mana këkarqa, yachaq o reqishqa nunakuna rurayanqantam rurar qallëkushwan (Colosensis 2:8; 1 Juan 2:15-17). ¿Imatataq rurashwan tsëman mana ishkinapaq?

10. (1) ¿Ima tapukïkunatataq rurakunantsik Jesus Wanunqanta Yarpë witsanchö? (2) ¿Precisaptinqa imatataq ruranantsik? (Rikäri kë yachatsikïpa qallananchö këkaq dibüjuta.)

¹⁰ Jesus Wanunqanta Yarpë witsanchöqa allichi kanman röpantsik imanö kanqanta, ima müsicata wiyanqantsikta, ima pelïculata rikanqantsikta, celularnintsikta, computadörantsikta o tabletantsikta alleq revisanantsik. Kënö tapukushun: “¿Imanö vistishqa këkanqäta Jesus rikëkamaptin penqakümantsuraq?” (leyi 1 Timoteu 2:9, 10). “¿Vistikïnïchö rikätsikïkäku Jesus ruranqanta qatikanqäta? ¿Jesusta gustanmantsuraq rikanqä pelïcula o wiyanqä müsica? ¿Kushishqatsuraq Jesus mañamaptin celularnïta o tabletäta qorïman? ¿Jesusta rikäratsïmantsuraq katsinqä vidëujuëgukunata y nirïmantsuraq imanir gustamanqanta?”. Jehoväta kuyarninqa, gustamashqapis mana alli cösaskunataqa llapantam ushakätsinantsik (Hëchus 19:19, 20). Jehovällatana sirwinapaq änikurninqa, llapan kawënintsikchö Jesusta respetanapaqmi änikurqantsik. Tsëmi Jesus ruranqanta qatinantsikta michämaqnintsik cösaskunataqa, ni imatapis katsinantsiktsu (Mateu 5:29, 30; Filipensis 4:8).

11. (1) Jehovätawan Jesusta kuyarqa, ¿ima mastataq rurashwan? (2) ¿Imanötaq yanapashwan congregacionnintsikchö wawqintsikkunata y panintsikkunata?

¹¹ Jina Jehoväta y Jesusta kuyarninqa kushishqam yachatsikunantsik (Mateu 28:19, 20; Lücas 4:43). ¿Manatsuraq Jesus Wanunqan Yarpë witsanchö 30 o 50 hörapa precursor auxiliarnö yanapakushwan? 84 watayoq viudu wawqiman yarpärishun. Pëqa edäna karnin y qeshyapäkurninmi precursor auxiliar këta mana puëdinampaq kaqta pensarqan. Peru amänunchö täraq precursorkunam juk territoriuta akrapuyarqan y yachatsikoq seguïdu apayarqan. Tsënöpam tsë killachö 30 hörapa yachatsikurqan. ¿Manatsuraq noqantsikpis congregacionnintsikchö wawqintsikkunata o panintsikkunata yanaparishwan marzuchö o abrilchö precursor kayänampaq? Awmi, manam llapantsiktsu precursor auxiliar këta puëdishun, peru llapan puëdinqantsikmannömi tiempuntsikta y kallpantsikta utilicëta puëdintsik. Tsënö rurarqa, apostol Pablu ruranqannömi Jesucristu kuyamanqantsikpita agradecikïkäshun. ¿Ima mastataq rurashwan Jehovä kuyamanqantsikpita agradecikurqä?

12. ¿Imatataq ruranantsik Diosnintsik kuyamänata munarqa?

¹² Jehovä Dios kuyamanqantsikpita  agradecikoq kanqantsikmi yanapamänantsik, cristiänu mayintsikkunata kuyanapaq. Apostol Juanmi nirqan, Dios alläpa kuyamanqantsikrëkur “noqantsicpis jucnintsic jucnintsic” kuyanakunapaq (1 Juan 4:7-11). Diosnintsik kuyamänata munarqa, cristiänu mayintsikkunatam kuyanantsik (1 Juan 3:16). ¿Imanötaq kuyanqantsikta rikätsishwan?

13. ¿Imatataq Jesusqa rurëninwan yachatsimarquntsik?

¹³ Jesusqa rurëninwanmi yachatsimarquntsik wakinkunata kuyanapaq. Kë Patsachö këkarmi nunakunata yanaparqan, masqa humildi kaqkunatam; qeshyaqkunata, cöjukunata, wiskukunata, sordukunata y mana parlaqkunatam kachakätsirqan (Mateu 11:4, 5). Jesusqa manam pushakoq religiösukunanötsu karqan; Diospita yachakïta munaq nunakunataqa kushishqam yachatseq (Juan 7:49). Awmi, humildi nunakunatam kuyaq y yanapaq (Mateu 20:28).

14. ¿Imatataq rurashwan cristiänu mayintsikta kuyanqantsikta rikätsinapaq?

¹⁴ Jesus Wanunqanta Yarpë witsankunaqa alläpa allim congregacionnintsikchö cristiänu mayintsikkunata y masqa mayor kaqkunata imanö yanapanapaq kaqman pensanapaq. ¿Manatsuraq watukarishwan, ima mikïllatapis makyarishwan, wayinchö rurapakïkunawan yanaparishwan, yachatsikoq o reunionkunamampis pusharishwan? (Leyi Lücas 14:12-14.) Dios kuyamanqantsikpita agradecikoq kanqantsikmi yanapamänantsik, cristiänu mayintsikkunata kuyanapaq.

15. ¿Imatataq llapantsik cuentachö katsinantsik?

¹⁵ Dios kuyamanqantsikpita agradecikoq kanqantsikmi yanapamänantsik, shonqupita patsë cristiänu mayintsikkunata perdonanapaq. Llapantsikmi jutsata y wanïta Adanpita chaskirquntsik, tsëmi Jesus wanïninwan pagakunqanta mana wananqantsiktaqa nita puëdintsiktsu. Diosta mana jaqipa sirweqkunapis tsëtaqa wanayanmi. Llapantsikmi cuentachö katsinantsik alläpa jatun jaqata Dios perdonamashqantsikta. ¿Imanirtaq tsëta cuentachö katsinantsik? Juk igualatsikïwan Jesus parlanqanta rikärishun.

16, 17. ¿Imatataq Jesusqa yachatsimënintsikta munëkarqan esclävunta juk rey perdonanqampita willakïchö?

¹⁶ Jesusmi willakurqan juk esclävu mëtsika waranqa qellëta juk reyta debinqampita, y reyqa llapan jaqanta perdonëkunqanta o manana cobranqanta. Peru tsë esclävutapis juk esclävu mayinmi ichiklla qellëta debinaq y pëqa manam perdonarqantsu. Rey perdonanqampita tsë esclävu agradecikurqa, esclävu mayinta perdonëkunmanchi karqan. Mana perdonanqanta musyarirmi reyqa alläpa piñakurqan.  Tsëmi tsë mana alli esclävuta qayëkatsir kënö nirqan: “‘¡Ä, mana ancupäcoq malafe! Noqaqa rogamaptiqui, llapan jaqätam perdonecorqaq. ¿Imanirtaq qamqa tse nuna mayiquita noqa ancupanqaqno ancuparqonquitsu!’” (Mateu 18:23-35). ¿Imatataq Jesus yachatsikïta munëkarqan kë willakïwan? Jutsantsikpita Jehovä perdonamarnintsikqa, juk alläpa jatun jaqatam perdonëkamarquntsik. ¿Imatataq rurashwan agradecikoq karqa?

¹⁷ Jesus Wanunqanta Yarpëpaq alistakurnin kënö tapukushun: “¿Cristiänu mayïkunapita mëqanllapis mana alli tratamashqaku? ¿Sasaraqku (ajaraqku) perdonanäpaq?”. Jehovä ruranqanta qatirmi perdonëkunantsik (Salmu 86:5; Nehemïas 9:17). Jehovä perdonamanqantsikpita agradecikurqa, shonqupita patsëmi cristiänu mayintsikta perdonëkushun. Jehovä kuyamänata y perdonamäta munarqa, cristiänu mayintsikkunatam kuyanantsik y perdonanantsik (Mateu 6:14, 15). Rasunmi, manam perdonanqantsikwanqa chipyëpaqa altsarinqatsu, peru kushishqa kawakunapaqmi yanapamäshun.

18. ¿Imataq juk panita yanaparqan juk cristiäna mayimpa imanö këninta aguantanampaq?

¹⁸ Höraqa manam fäciltsu cristiänu mayintsikkuna imanö kayanqanta aguantanantsik (leyi Efesius 4:32 y Colosensis 3:13, 14). Lily ^[1] jutiyoq panintsik pasanqanllaman pensarishun. Pëmi änikurqan Cärol jutiyoq juk viuda panita yanapanampaq. Lilyqa më tsëpam puritseq y rantipakïchö y juk rurëkunachöpis yanapaqmi. Tsënö alläpa yanapëkaptimpis, Cärolqa llapan ruranqampitam quejakoq. Höraqa manam Lilypaqqa fäciltsu kaq. Peru Cärol imakunachö alli kanqanman pensëtam Lilyqa kallpachakurqan. Tsënöpam qeshyarir wanukunqanyaq atska watapa Cärolta yanaparqan. Lilyqa nin, Cärolta kawarimushqata y jutsannaqtana reqita munanqantam. Jehovä kuyamanqantsikpita agradecikoq karninqa, noqantsikpis cristiänu mayintsik imanö kayanqanta aguantëta puëdishunmi. Jina tsë kuyakïmi yanapamantsik jutsannaqna kanantsik y mana allikunata manana ruranqantsik junaqta shuyaränapaq.

19. ¿Imataraq rurashun noqantsikpaq Diosnintsik ruramunqampita agradecikoq karqa?

¹⁹ Rikanqantsiknömi, Jehoväqa juk jatun qarëta qaramarquntsik. Jesus Wanunqanta Yarpë witsanta alleq provechashun, noqantsikrëkur Jehoväwan Jesus llapan rurayämunqankunaman yarpachakunapaq. Llapan junaqkuna rikätsikushun agradecikoq kanqantsikta. Jesus ruranqanta qatishun, cristiänu mayintsikkunata kuyashun y shonqupita patsë perdonakoq kashun.