APOSTOLKUNAPA tiempunchö cristiänukunaqa, Diospa ‘Gobiernumpita alli willakïkunata’ nunakunata yachatsiyänampaqmi imëkanöpa kallpachakuyarqan (Mat. 24:14). Wakinkunaqa hasta juk nacionkunayaqmi ëwayarqan. Tsëtam rurarqan apostol Pablupis, pëqa ëwarqan kanan ­Turquïa nacionchö këkaq markakunayaqmi. Tsëkunachömi misionërunö viajanqanchö mëtsika kuti yachatsikurqan. * Tsëpita ishkë ­waranqa watakunanö pasarishqanchönam, 2014 wata Turquïa nacionchö Diospita yachatsikur yanapakuyänampaq juk campäña karqan. ¿Pitaq patsätsirqan y imanir?

Turquïa nacionchöqa 79 millonnömi nunakuna kayan, peru Diospitaqa yachatsikuyan 2.800 publicadorkunapitapis masmi. Tsëqa rikätsimantsik juk publicadorlla 28.000 nunakunapaq kanqantam. Rikanqantsiknöpis publicadorkunaqa wallkaq nunakunallatam Diospita yachatsiyashqa. Tsëmi wallka tiempullachö mëtsika nunakunata Diospita yachatsiyänampaq juk campäñata patsätsiyarqan. Tsëchöqa, më tsë nacionpita turcu idiöma parlëta yachaq 550 cristiänukunam, Turquïa nacionta viajayarqan tsëchö täraq publicadorkunawan juntu yachatsikuyänampaq. ¿Imatataq lograyarqan?

Mëtsika nunakunatam Diospita yachatsikuyarqan. Estambul markachö këkaq congregacionpitam kënö nir qellqayarqan: “Jehoväpa testïgunkunata më tsëpa rikarmi, nunakunaqa pensayaq juk precisaq reunion kanampaq kaqta”. Izmir nishqan markachö këkaq congregacionpitam kënö nir qellqayarqan: “Taxikunapa paradërunchö trabajaq nunam juk anciänuman witikur kënö nir tapurqan: ‘¿Imataq pasëkan? ¿Masnaku yachatsikïkäyanki?’”. Rasumpam, Diospita tsënö yachatsikuyanqantaqa nunakuna cuentata qokuriyarqanmi.

Juk nacionpita ëwaq cristiänukunapis Diospita yachatsikuyanqantaqa alläpam kushikuyarqan. Dinamarca nacionpita Steffen jutiyoq cristiänum kënö nirqan: “Llapan junaqkunam, Jehoväpita imëpis mana wiyashqa nunakunata yachatsita puëdirqä. Jehoväpa jutimpita rasumpa parlëkanqätam sientirqä”. Y Francia nacionpita Jean-David jutiyoq cristiänunam kënö nir qellqarqan: “Mëtsika nunakunam Jehoväpa testïgunkunataqa reqiyantsu. Mëtsika hörakunam juk cällillachö yachatsikuyarqä. ¡Imanö  shumaqmi karqan! Cäsi llapan punkukunachömi nunakunawan parlayarqä, videukunata rikätsiyarqä y publicacionkunata jaqipuyarqä”.

Ishkë semänallachömi 550 publicadorkunaqa, 60.000 publicacionkunata nunakunata jaqipuyarqan. Rikanqantsiknöpis tsë campäñata patsätsiyanqanqa, mëtsika nunakunata Diospita yachatsikuyänampaqmi yanapakurqan.

Gänas gänasllam Diospita yachatsikur qallëkuyarqan. Diospita yachatsikïchö yanapakuyänampaq campäñaqa, tsë markakunachö täraq cristiänukunatapis yanaparqanmi. Y mëtsikaqmi llapan tiempunkunawan sirwir qallëkuyarqan. Awmi Turquïa nacionchö tsënö yanapakuyänampaq patsätsiyanqampitaqa, juk watallachömi precursorkunaqa 82 mas mirariyarqan.

Tsë yachatsikïchö yanapakuyanqanqa, nacionninkunaman kutiriyaptimpis yanapëkanqanllatam niyarqan. Alemania nacionpita Şirin jutiyoq juk cristiänam kënö nirqan: “Turquïa nacionchö cristiänukunaqa fäcil-llam mëchö këkarnimpis Diospita yachatsikuyan. Noqaqa mantsakoq karmi tsënö rurëtaqa puëdeqtsu kä, peru Turquïachö yanapakuyänampaq patsätsiyanqampita y tsë nacionchö cristiänukuna rurayanqanta rikarnin y mañakurninmi tsë rurëtaqa puëdirqäna. ¡Hasta trenchöpis yachatsikurqämi y tratädukunatapis nunakunata jaqipurqämi! Kananqa manam unënönatsu mantsakü”.

Alemania nacionpita Johannes jutiyoq juk cristiänum kënö nirqan: “Diospita yachatsikunqächö imanö ruranapaq kaqtam yachakurqö, Turquïa nacionchö cristiänukunaqa mas nunakunatam Diospita yachatsita imëkanöpa procurayan, tsëmi mëchö këkarpis yachatsikuyänampaq provechayan. Alemaniata kutirirqä tsënölla ruranäpaqmi decidirqä. Awmi, kananqa mas nunakunatam Diospita parlapä”.

Francia nacionpita Zeynep jutiyoq juk cristiänam kënö nirqan: “Turquïa nacionchö yachatsikïpaq patsätsiyanqanqa, Jehoväpita yachatsikurnin mana mantsakoq kanäpaq y pëman mas confiakunäpaqmi yanapamashqa”.

Cristiänukunaqa juk familianöllam sientikuyarqan. Tukï nacionpita këkarpis, kuyanakuyanqan y juknölla kayanqanqa alläpam yanapakurqan. Jean-Davidmi  kënö nirqan: “Wawqikuna y panikuna posadatsikoq kayanqantam rikäyarqä. Amïgunkunatanö y familiankunatanömi tratayämarqan y wayinkunamanmi chaskiyämarqan. Publicacionkunachö leyishqa karmi, entëru Patsachö juk familialla kanqantsikta musyarqä, peru kananqa tsëta kikïnam rikarqö. Jehoväta sirwinqäpitaqa alläpam kushikü y agradecikü”.

Francia nacionpita Claire jutiyoq juk cristiänam kënö nirqan: “Alemaniapita, Dinamarcapita, Franciapita o Turquïapita karpis juk familianöllam kayarqä. Tsëqa karqan nacionkunapa lindërunkunata imëka Jehovä borrarishqannömi”.

Francia nacionpita Stëphanie cristiänam nirqan: “Turquïachö yachatsikïpaq patsätsikanqanqa yachatsiyämashqa, Jehoväta kuyanqantsikrëkurmi juknöllaqa kantsik y manam costumbrintsik o idiömantsikrëkurtsu”.

Turquïa nacionman yanapakoq ëwaq mëtsikaq cristiänukunam, tsë nacionchö mas yanapakuyänampaq kutita pensëkäyan. Wakinkunaqa tsë nacionta ëwakuyashqanam y tsëta rurayanqampitaqa alläpam agradecikuntsik.

Juk takshalla markachömi, 25 publicadorkunalla kayarqan. Y mëtsika watakunapam juk anciänulla yanapakurqan. Peru 2015 watachöqa Alemaniapita y Païses Bäjos nishqan nacionkunapitam, joqta wawqikuna yanapakoq ëwayarqan. Tsëchö publicadorkunaqa, ¡alläpam kushikuyarqan!

Tiempupana Turquïa nacionchö yanapakïkaq cristiänukunaqa, ¿imanötaq sientikuyan? Qallananchö fäcil mana kashqa kaptimpis, mëtsika bendicionkunatam chaskiyashqa. Wakinkuna imata niyanqanta rikärishun.

Espäña nacionpita Federïcu jutiyoq 40 watayoqnö juk casädu wawqim kënö nin: “Mëtsika cösaskuna mana kapamanqanmi yanapaman libri sientikunäpaq y mas precisaq kaqkunata ruranäpaq. Nunakuna Jehoväta reqiyänampaq yanapakoq juk nacionta ëwakurqa, Jehoväpa makinchömi llapantapis jaqintsik y imanö cuidamanqantsiktam rikantsik”.

 Païses Bäjos nishqampita Rudy jutiyoq 50 watayoqnöna y casädu cristiänum kënö nin: “Alläpam kushikuyä ‘punta puntachö yanapakurnin’ y Jehoväpita mana imëpis wiyashqa nunakunata yachatsirnin. Rasumpa kaqta yachakurir kushikuyanqanta rikëqa, alläpa kushikïpaqmi”.

Alemania nacionpita Sascha jutiyoq 40 watayoqnö juk casädu wawqim kënö nin: “Jehoväpita yachatsikur yarqurninqa pëpita mana imëpis wiyashqa nunakunatam tarï. Tsëmi pëkunata Jehoväpita yachatsiqa alläpa kushitsiman”.

Japon nacionpita Atsuko jutiyoq 30 watayoq casäda cristiänam kënö nin: “Puntataqa Armagedon chäramunantam imëpis munaq kä. Peru Turquïa nacionta ëwakunqäpitam alläpa agradecikü Jehovä pacienciayoq kanqanta. Jehovä llapanta imanö dirigikanqanta rikarmi pëman mas witita munä”.

Rusia nacionpita Alïsa jutiyoq 30 watayoqnö juk cristiänam kënö willakun: “Tsënö yanapakur Jehoväta sirwinqäqa, pë rasumpëpa alli kanqanta rikänäpaqmi yanapamashqa (Sal. 34:8). Jehoväqa manam teytällatsu, sinöqa imëkapa pasarpis witinäpaq läduchö këkaq juk amïgümi. Kawënïchöqa imëka kushikïpaq cösaskunam pasamashqa y mëtsika bendicionkunatam chaskirqö”.

Turquïa nacionchö yachatsikur yanapakuyänampaq campäñarëkurmi, Diospa Gobiernumpita alli willakïkunaqa mëtsika nunakunaman chashqa. Peru Diospita yachatsikï manaraq chanqan sitiukunaqa kanran. Turquïa nacionta ëwaq cristiänukunaqa cada junaqkunam tariyan Jehoväpita mana wiyashqa nunakunata. ¿Tsënö sitiukunachö yanapakïta munankimantsuraq? Tsënö kaptinqa Juan 4:35 textu kënö ninqanta yarpë: “Peqëkikunata pallariyë y chakrakunata rikäyë, qarwanam këkäyan cosëchapaq”. ¿Puëdinkimanku yanapakïta tsënö cosëchapaq qarwana këkaq markakunachö? Tsëqa, kanampitana qampis yanapakunëkipaq kallpachakï. “Patsapa mas karu kuchunyaq” Diospita yachatsikï chänampaq yanapakurninqa, mana pensanqëki bendicionkunatam chaskinki (Hëch. 1:8).