PASAQ watakunachömi, kananqa 30 watayoqna Rúbia (1) jutiyoq pani viajarqan Brasilpa sur kaq lädonman, takshalla congregacionchö precursöranö yanapakïkaq Sandra (2) jutiyoq amïganta watukanampaq. Tsë watukanqan sitiochö pasakunqanta rikanqanmi Rubiata alläpa pensatsirqan y kawëninta cambiarqan. ¿Imataq karqan? Kikinmi willaramäshun.

“Sandram apamarqan Bibliapita yachakïkaq juk warmita watukayänäpaq. Yachëkätsiyaptïmi tsë warmi kënö nirqan: ‘Trabajanqächömi kimaq shipashkuna Bibliapita yachakïta munayan, pero kë watachö alläpa ocupado kanqëkita musyarmi, shuyäyänampaqraq nirqö’. ¡Manam creita puëderqätsu! Alläpa atskaq nunakunam Jehoväta reqita  munëkuyaq, tsëmi Sandraqa llapankunata atiendita mana puëdernin wakinkunataqa shuyäyänampaqraq neq. ¡Noqapaqqa, yachatsikunqä sitiochö jukllëllatapis yachakï munaq nunata tariqa sasaraqmi o ajaraqmi kaq! Tsë höram, tsë warmipa wayinchö këkar, chipyëpa munarirqä tsë markachö nunakunata yanapëta. Tsëpita ichik tiempollatanam jatun markäpita, Sandra yanapakïkanqan markaman ëwakurqä.”

¿Imanötaq yarqapushqa Rubiata? Kikinmi kënö willakun: “Ishkë killallachömi 15 nunakunatana Bibliapita yachëkätsirqä. Y mana creipaqnö kaptimpis, ichik tiempollachömi Bibliapita wakinkunata yachatsinäpaq tiempö karqannatsu, tsëmi noqapis shuyaräyämänampaqraq neq kä”.

20 watayoqnö Diego (3) jutiyoq wawqim, Brasilpa sur kaq lädonchö Prudentópolis nishqan markachö yanapakïkaq ishkë precursorkunata watukaq ëwarqan. Pëkunawan junto kanqanmi yanaparqan Diospita yachatsikïchö imanö këkanqanta yapë rikänampaq. Kikinmi kënö nin: “Congregacionnïchöqa Diospita yachatsikïchö manam alläpatsu sinchikoq kä, y killachö wallka hörakunallam yachatsikoq kä. Pero tsë precursorkunawan karnin y imakunapa pasayanqanta rikanqämi, yanapamarqan kushishqa rurëkäyanqanta noqa rurëkanqäwan igualatsinäpaq. Alläpa kushishqata rikarninmi kënö pensarqä: ‘¡Imanö alliraq kanman pëkunapanö kawënï kaptinqa!’”. Wayinta kutirirmi Diëgoqa precursor tikrarirqan.

Y qamqa, ¿ima ninkitaq? ¿Diospita yachatsikoq y reunionkunam ëwaq Testigo jövenku kanki? ¿Höraqa tantearqunkiku Diospita yachatsikïta ruranëkipaq kaptinlla rurëkanqëkita y manana gustashunqëkita? Tsënö kaptinqa, capaz kawënikichö cambiokunata rurankiman Diospita yachatsikoqta necesitäyanqan markakunaman yanapakoq ëwar qampis kushikïta tarinëkipaq. Rasun kaqchöqa, quizás alläpaqa gustashunkitsu tukï kapushunqëkikunata dejariman pensëqa. Pero tsëtam edä mayiki jövenkuna rurayashqa, Jehoväta más sirwiyänanrëkurmi kallpata tsarirkur munëninkunata dejayashqa. Bruno ruranqanta rikärishun.

Kanan 28 watayoq këkaq Bruno (4) jutiyoq jövenmi músico kanampaq alli reqishqa conservatorio nishqanchö estudiarqan. Pëqa munarqan orquestapa dirigeqnin këtam, allipa yachakushqa kaptinmi, orquesta sinfónica nishqanta diriginampaq atska kuti invitayarqan. Reqishqa y qellëyoq kanampaqmi allipa yarqapakïkarqan. Tsënö kaptimpis, kënömi nin: “Imapis pishimaqtanömi sienteq kä. Jehovällata sirwinapaqmi awnikushqa karqä, pero tsënö karpis manam llapan puëdenqätatsu pëpaq rurëkarqä, tsëmi mana allita sientetsimaq. Jehovätam shonqupita patsë mañakurqä y poqushqa cristiänokunawanmi parlarqä. Alleq yarpachakurirninmi Diospita yachatsikïta puntaman churarqä, conservatorio nishqantam dejarirqä y mana fácil kanan kaptimpis, Jehoväpita yachatsikoqta necesitäyanqan markaman yanapakoq ëwanapaqmi churapakarqä”. ¿Allitaku akrarqan?

Brünoqa yanapakoq ëwakurqan São Paulo reqishqa markapita 260 kilömetroschö këkaq Guapiara nishqan markamanmi, tsëchöqa 7.000 nunakunam täräyan o tiyapäkun. Kikin willakunqannömi, tsëchö kawëqa alläpa jukläya karqan, kënömi nin: “Wayiqa ichikllëllam karqan, manam karqantsu refrigeradora, televisión ni Internet. Tsënö kaptimpis, imëpis mana kapamanqan fruta plantakunayoq huertam kapamaq”. Brünoqa wallkalla publicadoryoq congregacionchömi yanapakoq. Semänachö juk kutim, publicacionninkuna, mikïnin y yakun apakurkur, Diospita yachatsikïta imëpis mana wiyashqa nunakunaman estanciakunapa motosiclëtanwan yachatsikoq ëwaq. Pëmi kënö willakun: “18 nunakunatam Bibliapita yachatseq kä. Tsë nunakuna Dios munanqannö kawar qallaqta rikëqa alläpa kushikïpaqmi kaq. Tsëchömi pishipamanqanta taririnqäta cuentata qokurirqä; awmi, Diospa kaqta puntaman churëqa imawampis mana igualaq kushikïtam apamun. Manachi tsënö kushikïtaqa imëkayoq karpis tarïmantsu karqan”. ¿Y imata rurartaq Guapiara markachö kawanampaq qellëta tareq? Asinëkarmi kënö nin: “¡Guitarra toquëtam yachatsikü!”. Imanö karpis, músico këtaqa manam dejashqatsu.

Brünota pasanqannömi, 20 watayoqpita más watayoqna Mariana (5) jutiyoq shipashta pasarqan. Abogada karnin atska qellëta ganarpis, manam kushishqatsu sientekoq. Kikinmi kënö nin: “Kawënïchöqa imëka ‘vientollata tsarinapaq qatikachaqnömi’ sientekoq kä” (Ecl. 1:17). Atskaq cristiano mayinkunam precursora këman pensanampaq parlapäyarqan. Alleq yarpachakurirninmi, Bianca (6), Caroline (7) y Juliana (8) amïgankunawan churapakäyarqan Bolivia nacionpa amänunchö këkaq Barra do Bugres nishqan markachö këkaq congregacionchö yanapakuyänampaq, tsë congregacionqa, wayinkunapita atska waranqa kilömetroschömi këkarqan. ¿Imataq pasakurqan?

Mariänam këta nin: “Kima killalla quedakïtam pensarqä. Pero kima killa ushanan witsampaqqa, 15 nunakunatam Bibliapita yachëkätsirqä, kë estudiantekunaqa rasumpa kaqta reqiyänampaq alläpam yanapakïta necesitäyaq. Tsënö këkaptinqa, ¿imanöraq kutikunäpaq kaqta nïman karqan? Manam tsëta nïta puëderqätsu. Quedakurqämi”. Chuskunmi quedakuyarqan. Y kananqa Mariänaqa más allinam sientekun, kënömi nin: “Alläpam kushikö nunakuna más alli kawayänampaq yanapanäpaq Jehová utilicëkämanqanta y tiempöta y kallpäta más precisaq kaqchö utilicëkanqätapis”. Chuskun imanö sientekuyanqampitam ichik parlakïllachö Caroline kënö nin: “Diospa Gobiernompaq llapan puëdenqänö ruranqäpita alläpa kushishqam cada paqas patsäkö o chachakü. Bibliapita yachakïkaqkunata yanapëmanmi más yarparä, y yachakuyanqanmannö kawar qallaqta rikëqa alläpa shumaqmi. ‘Jehová alli kanqanta rikäyë y kushikuyë’ nir Biblia ninqan rasumpa kanqantam alli claro rikarqö” (Salmo 34:8).

Rasumpa kaqchöqa, Jehoväqa alläpachi kushikun alli willakïnimpita käru markakunachö yachatsikuyänampaq entero Patsachö jövenkunata sinchikoqta rikarnin (Sal. 110:3; Prov. 27:11). Y tsënö rurayanqampitam kë jövenkunaqa atska bendicionkunata chaskiyan (Prov. 10:22).