¿Imanirtaq Davidqa shuyararqan Dios cuentaman churananta y pëman interesäkunanta? ¿Qamman Dios interesäkunku? Mëtsikaq nunakunam creiyantsu Llapanta Puëdeq Dios pëkunaman interesäkunqanta. ¿Imanir?

Tsënöqa creiyan nunakunapita Dios mas puëdeq kaptinmi. Alläpa puëdeq kaptinmi Diospaqqa, ‘matipita juk shutuy yakunölla nacionkuna kayan’ (Isaïas 40:15). Tsëmi, Diosman mana creeq juk nunapis kënö nirqan: “Ruranqantsikkunaman juk Dios interesäkunqanta creiqa upa këmi”.

Wakinkunanam creiyan imëka mana allikunata rurayanqanrëkur Dios yanapananta mana mericiyanqanta. Tantiyarinapaq, Jim jutiyoq nunam willakun: “Diostam imëpis mañakoq kä mana alli geniüta dominanäpaq yanapëkamänanta, peru höraqa dominëta manam puëdeqtsu kä. Tsëmi pensaq kä mana alli nuna kaptï ni Diospis mana yanapamänampaq kaqta”.

¿Diosqa alläpa karuchöku këkan noqantsikpita cuentaman mana churamänapaq? ¿Imatataq sientin jutsasapa nunakunarëkur? Diospa yanapakïninwanqa kë tapukïkunapa respuestanta tarita puëdintsikmi. Palabran Bibliachömi änimantsik alläpa karuchö mana kanqanta y noqantsikpaq interesäkunqanta. Hëchus 17:27 (NM) textum nin: “[Diosqa] noqantsikpita manam alläpa karuchötsu këkan”. Qateqnin chusku yachatsikïkunachömi yachakushun, Biblia tsë asuntupita yachatsikunqanta y nunakunapaq Dios interesäkunqanta imanö rikätsikunqanta.