Janetmi nin: “Teytä wanurinqampita ichik tiempullatam, juk warmiyoqna kanqanta qowä nimarqan. Juk junaqmi mana despedikushpa, röpanta aparkur ëwakurqan, wamräkunata y noqata jaqirayämar”. Trabajarpis, Janetqa manam llapan gastunkunapaqtsu tinkutseq. Y manam tsëllatsu problëman karqan, kënömi willakun: “Wamräkunata japallälla wätanäpaq kaqmanmi alläpa yarpachakurqä. Wakin teytakunanö wamräkunata llapanta qoyta mana puëdinqäpitam mana alli sientikoq kä. Kanampis yarpachaküran noqapaq y wamrakunapaq wakinkuna imata pensayanqanta. ¿Casädu kawakïnïta salvanäpaq imatapis mana ruranqätatsuraq niyan?”.

Diosman mañakunqanmi Janettaqa yanapan alläpa mana yarpachakunampaq y pëpa lädunchö mas sientikunampaq. Jina ninmi: “Paqaskunapaqa masmi llakikö. Yarpachakïkunam peqäman shamun. Diosman mañakunqä y Bibliata leyinqämi punïta tarinäpaq yanapaman. Mas gustamanqan juk textuqa Filipensis 4:6 y 7 (NTCN) textum, kënömi nin: ‘Ama ni imapagpis yarpachacurnin llaquicuyaytsu. Imayca sufrimientucunata päsarpis Diosta agradëcicurnin yanapayäshunayquipag mañacuyay. Tsaymi Dios cuyacuy yanapacuyninwan yanapayäshuptiqui, manana llaquicur alli päsacuychö cawacuyanqui’. Mëtsika paqaskunam Diosman mañakurqö y yamë këta qomanqantam cuentata qokurqö”.

Diosman mañakïpaq Jesus parlanqanmi, yanapamënintsikta puëdin yarpachakïnintsikkunachö. Kënömi nirqan: “Manaraq mañacuyaptiquim, Dios Yayaqa musyanna imata wanayanqequitapis” (Mateu 6:8). Tsënö kaptimpis, pëman mañakunantsiktaran  Diosqa shuyaran. Yarpäshun, Diosman mas witinapaqqa mañakïmi yanapamantsik. Tsënöpam noqantsikman ‘Paypis witimunqa’ (Santiägu 4:8, NTCN).

Jehoväman mañakïqa manam shoqakïta tarinallapaqtsu yanapakun. “Mañakïkuna Wiyaq” karmi, pëman markäkoqkunataqa cuidan (Salmu 65:2). Tsëmi, Jesuspis qateqninkunata kënö nirqan: ‘Imaypis, mana gelanar Dios Yayaman mañacuyay’ (Lücas 18:1, NTCN). Pëman markäkurnin mana jaqita mañakushun pushamänapaq y yanapamänapaq, tsënö rurarqa Diosman markäkunqantsiktam rikätsikushun. Pëqa yanapamënintsiktam munan y tsënömi ruranqa (1 Tesalonicensis 5:17).

Diosman markäkunapaqqa, pëtam alleq reqinantsik (Juan 17:3). Bibliata estudiarmi imanö kanqanta y imata pensanqanta yachakuntsik. Llapantsikpaq yarpachakunqantam musyarintsik. Peru manam Dios pï kanqanllatatsu musyanantsik, sinöqa juk alli amïgutanömi alleq reqinantsik. Tsëtaqa manam juk ishkë junaqllachötsu lograshun, sinöqa tiempuwanran. Jina tsënöllam, Diosta mas reqishqaqa markäkïnintsikpis mas miranqa, pë munanqannömi kawashun y yanapakïnintam chaskishun (2 Corintius 10:15; Juan 8:29). Tsënö markäkïmi Janettapis yanapan alläpa yarpachakïninta vencinampaq.

Janetmi kënö nin: “Jehovä imanö cuidayämanqanmi yanapamashqa markäkïnï mas sinchiyänampaq. Imëka mana allikunam pasayämarqan y tsëqa imëpis mana ushakaqnömi karqan. Jehovämanmi kutin kutin mañakuyarqä y pëqa mana shuyaräyanqä höram yanapayämarqan. Agradecikur Diosman mañakurmi yarpä noqakunarëkur imëkata ruramunqanman. Mana pensayanqä hörakunachömi yanapakïnintaqa chaskiriyarqä. Jina juk bendicionqa kashqa, markanchö alli amïgukunata tariyanqämi, pëkunaqa imëpis listum këkäyan yanapayämänampaq y wamräkunatapis alli kaqtam yachatsiyan. *

”Malaquïas 2:16 textuchö divorciakïta chikinqanta Jehovä ninqantaqa alleqmi kananqa entiendirï. Mana imëpis traicionakoq majapaqqa, alläpa llakikïpaqmi majan engañanqan. Atska watana pasashqa kaptimpis, höraqa japallämi sientikü. Tsë pasamaptinqa wakinkunapaqmi imallatapis rurä, tsënöpam llakikïnïta qonqarï”. Tsënöpam, wakinkunapita mana rakikänampaq Biblia consejakunqanta Janetqa cäsukun (Proverbius 18:1). *

Jina Janetqa ninmi: “‘Teytannaqkunapa teytan y viudakunapa jueznin’ Diosnintsik kanqanta musyëqa alläpam shoqaman. Manam qowänötsu Pëqa jaqirayämanqa” (Salmu 68:5). Janetqa musyanmi mana allikunawan Dios mana probamanqantsikta. Tsëpa rantinqa wananqantsik yachëtam y yamë këtam qomantsik alläpa yarpachakïnintsikkunata vencinapaq (Santiägu 1:5, 13; 2 Corintius 4:7, NM).

Peru kawënintsik peligruchö kanqan alläpa yarpakachätsimashqaqa, ¿imataraq rurashwan?