2024 wata 9 de octubrichömi, Fondo Mundial para la Naturaleza niyanqanchö trabajaqkuna juk llakikuypaq noticiata kënö nir willakayämushqa: “Qepa 50 watakunachömi (1970-2020), montikuna rurinchö kawaq animalkuna imëpitapis mas ushakëkäyan (73% mënusnam)”. Nïkurmi niyan: “Mana creipaqnö kaptimpis, kanampita 5 watachö pasanqankunam cläru rikätsikunqa Patsachö imëka kawëkaqkuna imachö ushanampaq kaqta”.

 Tsënö noticiakunata wiyarqa pïmëmi llakikuyan. Llapantsikmi munantsik kë Patsa shumaq kananta, y animalkuna sufreqta rikarqa llakikuntsikmi. Diosnintsikqa kamamarqantsik animalkunata shumaq cuidanapaqmi (Genesis 1:27, 28; Proverbius 12:10).

 Capazchi kënö nir yarpachakunki: “¿Puëdishwantsuraq animalkuna mana ushakäyänampaq imallatapis rurëta? ¿Ima ninraq Bibliachö?”.

 Kë Patsa y animalkuna ushakänampaq o mana ushakänampaq kaqqa manam noqantsikpitatsu, sinöqa kamakoq Diosnintsikpitam. Bibliachömi Apocalipsis 11:18 textuchö nin Diosnintsikqa ‘patsata ushakëkätseqkunata ushakätsinampaq’ kaqta. Tsë textuchö ninqampitaqa ishkëtam yachakuntsik:

1.  1. Diosnintsikqa manam permitinqatsu nunakuna Patsata ushakätsiyänanta.

2.  2. Nunakunaqa imëpitapis masmi kananqa animalkunata ushakëkätsiyan, tsëmi musyantsik Diosnintsikqa ichikllachöna tsëta ruraq mana alli nunakunata ushakätsinampaq kaqta.

 ¿Imanöraq kë problëmata Diosnintsik arreglamunqa? Ichikllachönam ciëluchö Diosnintsik patsätsinqan Gobiernu entëru munduta gobernamunqa (Mateu 6:10). Tsë Gobiernu gobernamuptinqa alli nunakunallanam Patsachö quedayanqa, y animalkunata shumaq cuidëtam yachakuyanqa (Isaïas 11:9).