•   “Chïna nacionchömi imëpitapis mas achachëkan, y kananwanqa kima kutinam alläpa usyan. Tsënöqa manam ni imëpis pasashqatsu kashqa” (The Guardian, 7 de setiembre, 2022).

•   “Gran Cuerno de Africa niyanqan sitiukunachömi, kananwanqa pitsqa kutipana alläpa usyaptin yaku kanqatsu” (ÖNU willakunqan, 26 de agostu, 2022).

•   “Euröpachö këkaq pullampitapis mas nacionkunachömi yaku mana kanan kaptin mantsakashqa këkäyan, y tsënöqa manam 500 watachö pasashqatsu kashqa” (BBC News, 23 de agostu, 2022).

 Pïmëmi niyan alläpa usyar y mëtsëchö yaku ushakar sïguinampaq kaqta o mas peor kanampaq kaqta. ¿Imanöraq warë warätin kashun? ¿Ima nintan Bibliachö?

 Bibliachöqa kënö nirmi tiempuntsikpaq willakushqa karqan:

•   “Wakchö këchömi mallaqë [...] kanqa” (Lücas 21:11).

 Alläpa usyaptin yaku mana kaptinqa mëtsëchömi mikuy kantsu. Bibliachöqa willakushqanam karqan alläpa mallaqë kaptin nunakuna sufriyänampaq y wanuyänampaq kaqta (Apocalipsis 6:6, 8).

 Bibliachömi kënö nin:

•   “Noqaqa allim musyä nunakunaqa kikinkunallapita imanö kawayänampaq kaqta mana musyayanqanta” (Jeremïas 10:23).

 Këchö ninqanmi rikätsikun nunakuna kikinkuna pensayanqannölla imatapis rurayaptin o gobernanakuyaptinqa imëkapis mana alli yarqunqanta. Tsëmi imatapis llutalla rurar Diosnintsik kamanqankunata malograyaptin tiempupis kananqa jukläyana.

•   Pïmë cientïficu nunakunam niyan mëtsëchö alläpa usyaptin yaku ushakanqanqa nunapa culpan kanqanta.

•   Qellëpaqrëkurmi mëtsika montikunata mëtsëchö llutalla ushayan, imëkata rakchatäyan o qanratäyan y llutalla imëkatapis ushakätsiyan. Tsëmi wakin sitiukunachöqa yakupis ushakëkanna, o karpis, mana upuypaqnatsu.

 Tsënö kaptimpis, Bibliachöqa nin tsë llapan altsakänampaq kaqtam.

 Bibliachömi nin yaku mana ushakänampaq Diosnintsik imata ruramunampaq kaqta. ¿Imatataq ruramunqa?

1.  1. Diosnintsikqa, ’patsata ushakëkätseqkunatam ushakätsinqa’ (Apocalipsis 11:18). Awmi, Diosnintsikqa manam permitinqanatsu kikinkunallapaq imëkatapis munar imëkata ushakätseq nunakuna kananta (2 Timoteu 3:1, 2).

2.  2. “Tsaki sitiukunapis qochamanmi tikrayanqa” (Isaïas 35:1, 6, 7). Awmi, Diosnintsikpa bendicionninwanmi tsaki sitiukunachö mëtsika yaku kanqa, y entëru patsam juk shumaq huertaman tikranqa.

3.  3. “Teyta Dios qam patsata bendiciptikim, imëkapis shumaq wayun” (Salmus 65:9). Awmi, Diosnintsikpa bendicionninwanmi mëtsëchö imëkapis shumaq wayunqa, y yakupis limpiu y mëtsikam kanqa.