LECCIÓN 02

Bibliaga shuj esperanzadami cun

REPRODUCIR EN

Mundo enterobimi, gentecanchaga problemagunada charishcamunda triste, preocupado, nanarishca causan. Tal vez shuj familia huañushcamunda, unguigunamundaga llaqui, sufrishmi causangui, pero tapurishcanguillari ¿ima funchashi caigunaga tucuringa? nish. Bibliami cai tapuimunda tranquilizaj respuestada cun.

1. ¿Bibliaga ima esperanzada cun?

Bibliaga mundo enterobi imamunda ashca problemaguna tiyashcadami huillan. Shinalladi alli noticiadashmi cun, cai problemaguna ñalla tucurinadami huillan. Biblia “shamuj funchagunabi alli causaida y shuj esperanzadashmi” cun (Jeremías 29:11, 12-da liyi). Cai promesami cunun funchagunabi problemagunada aguantangabu y contento causangabu ayudan. Shinalladi ciertomi para siempre felices causai pudishcada yachachin.

2. Biblia shamuj funchagunabi causaimundaga ¿imadadi yachachin?

Bibliaga shamuj funchagunabi “huañuibish, llaquibish, nanaibish ña na tiyangallu” nin (Apocalipsis 21:4-da liyi). Llaquichij problemaguna, por ejemplo: pobreza, injusticia, unguiguna y huañuibish ña na tiyangallu. Bibliaga alli genteguna cai allpa paraíso tucujpi para siempre feliz causanadami huillan.

3. Bibliabi tiyaj esperanzabi confiallunga ¿imadi ayudanga?

Ashca gentegunami cashna laya causai cambianada yuyan. Pero, cierto mejorarinadaga paigunalladimi na crinajun. En cambio, Bibliabi nishcaga tucuimi fajtaringa. Biblia ima nishcagunabi confiangabuga “escribishcagunada liyish allimi intindina” ganchi, chaibuga Bibliadami estudiana ganchi (Hechos 17:11). Caida rrurrashmi quiquinlladi shamuj funchagunabi ima tucunada yachangui y Biblia huillashcada crinada o na crinada agllai pudingui.

CAI TEMAMUNDA MÁS YACHASHUNCHI

Biblia shamuj funchagunabu ima alli promesaguna charishcada yachashunchi. Chai esperanzaguna imashina cutishuj gentegunada ayudajushcadash rricushunchi.

4. Bibliaga para siempre alli causana esperanzadami cun

Bibliamunda tarishca huaquin promesagunada rricui ¿majinda munangui? ¿imamunda?

Bibliamunda cai promesagunabu textogunada liyish, chaimunda parrlaichi:

¿Cai textoguna esperanza cujtaga cringuillu? Familiagunabi, amigogunabi yuyai ¿paigunada ayudangallu?

Cai laya mundobi causajushcada yuyai:

NI PI...	TUCUI GENTEGUNAMI...
... na sufringa, na yuyajyanga ni huañunga (Isaías 25:8).	... huañushca familiaguna, amigoguna causarish cai allpabi cutin causanajujtami rricunajunga (Juan 5:28, 29).
... ima unguida na charingallu ni discapasitadollu ganga (Isaías 33:24; 35:5, 6).	... sanos, jovenguna shinami ganga (Job 33:25).
... injusticiamundaga na sufringallu (Isaías 32:16, 17).	... ashca micunada, maibi causanada y munashca trabajoda charinga (Salmo 72:16; Isaías 65:21, 22).
... guerragunamundaga llaqui na causangallu (Salmo 46:9).	... tranquilosmi causanga (Salmo 37:11).
... llaquigunamunda malos pensamientogunadaga ña na yuyaringallu (Isaías 65:17).	... para siempremi contento alli causanga (Salmo 37:29).

5. Bibliabi tiyaj esperanzami alli causaida cunga

Ashca gentegunami cai mundobi problemaguna tiyashcamunda llaquilla o colerashcami causan. Huaquingunaga chai problemaguna mejorarillun munashcamundami tucuida rrurran. Bibliabi tiyaj promesaguna imashina cunun funchagunabi ashca gentegunada ayudajushcada rricui. VIDEODA rricush caimunda parrlaichi:

VIDEO: Injusticiaguna ama tiyallunmi ayudanada munarcani (4:07)

Videobi rricushca shinaga, Rafikaga ¿ima injusticiamundadi preocuparirca?
Pai rricushca injusticiaguna na chingarijpibish Biblia paidaga ¿imashinadi ayudarca?

Bibliabi rricurij esperanzami ama demas llaquilla sintirillun y problemagunada charishash alli causallun ayudan. Proverbios 17:22 y Romanos 12:12-da liyish, chaimunda parrlaichi: