LECCIÓN 53
Jehová Diosda contentachingabuga alli diversiongunada agllai
Jehová Diosga “contento Diosmi” gan (1 Timoteo 1:11). Paiga ñucunchiguna contento alli causallunmi munan. Chaimundami trabajomunda o cutishuj rrurraigunamunda, samangabu tiempoda llujchillun munan. Cai leccionbimi, samarina alli gashcada, shinalladi Jehová Diosda contentachingabu ima laya diversiongunada agllana gashcada yachashun.
1. ¿Diversiongunada agllagrijushaga imabidi yuyana ganchi?
Samangabuga, ¿imadadi rrurranada munangui? Huaquingunaga samaringabumi huasibi saquirish shuj libroda liyin, musicada uyan, shuj peliculada rricun o internetbi pasanada munan. Cutishujgunaga amigogunaun pasanada o llancanadami munan. Ima laya diversionda agllashash, “Taita Diosbu ñaupujpi ima alli gashcada” rricuna ganchi (Efesios 5:10). Caibi yuyanaga, ¿imamundadi importante gan? Genteguna munashca huaquin diversiongunaga Jehová Dios na munashca rrurraigunaunmi tsagrurishca gan, por ejemplo: peleanaun, huainayanaun y brujeriaun (Salmo 11:5-da liyi). Alli diversiongunada agllallunga, ¿imadi ayudanga?
Jehová Diosda juyaj amigogunada charijpiga, paigunami alli diversiongunada agllallun ayudanga. Lección 48-bi yachashca shinaga, “yachaisapagunaun tandanajujga yachaisapami tucunga”. Pero Jehová Diosbu mandashcagunada na cazujgunaun tandanajujga “llaquibimi urmanga” (Proverbios 13:20).
2. ¿Diversiongunabiga mashna tiempodadi pasana ganchi?
Alli diversionguna gajpish, chaibi ama yalli tiempoda pasangabumi cuidadoda charina ganchi. Diversiongunabi demas tiempoda pasashaga, importante cosasgunada rrurrangabuga tiempoda na charishunllu. Bibliabiga “tiempoda alli aprovechaichi” nishmi aconsejan (Efesios 5:15, 16-da liyi).
CAI TEMAMUNDA MÁS YACHASHUNCHI
Alli diversiongunada agllangabu imada rrurrana gashcadami yachashun.
3. Na alli diversiongunamunda caruyai
Diversiongunadaga, ¿imamundadi alli rricush agllana ganchi? VIDEODA rricush caimunda parrlaichi:
-
¿Ñaupa tiempobi peleash huañuchij llancaigunaun y cunun tiempobi tiyashca diversiongunaunga imabidi igual gan?
-
Videobi rricushca Danny shuti jovenga, ¿diversiongunamundaga imadadi yacharca?
Romanos 12:9-da liyish, chaimunda parrlaichi:
-
Cai texto diversiongunada alli agllallunga, ¿imashinadi ayudan?
¿Jehová Diosga ima laya rrurraigunadadi na munan? Proverbios 6:16, 17 y Gálatas 5:19-21-da liyi. Textogunada liyishca jipa, chaimunda parrlaichi:
-
¿Cai textoguna rricuchishca shinaga cunun tiempobiga majin diversiongunadi na alli gan?
Alli diversiongunadaga, ¿imashinadi agllana gangui?
Cashna tapuri:
-
¿Ima laya diversiondi gan? ¿Jehová Dios na munashca cosasgunaunllu tsagrurishca gan?
-
¿Tiempoda quichunllu? ¿Importante rrurraigunamundallu jarcan?
-
¿Pigunaundi pasajuni? ¿Jehová Diosda na juyaj gentegunaunllu demas tiempoda pasasha?
Ima atraso ama japillunga, chaimunda rratomi caruyana ganchi. Shinalladi na alli diversiongunamundash enseguidami anchurina ganchi.
4. Canbu tiempoda alli utilizai
VIDEODA rricush caimunda parrlaichi:
-
Videobi rricushca huauquiga ima maloda na rrurrajushash tiempodaga, ¿imashinadi na alli aprovechajurca?
Filipenses 1:10-da liyish, chaimunda parrlaichi:
-
Cai texto diversiongunabi mashna tiempoda pasana gashcada yachallunga, ¿imashinadi ayudanga?
5. Alli diversiongunada agllai
Jehová Diosga divertirillunmi munan, chaimunda alli diversiongunada agllashmi, contentos sintirishun. Eclesiastés 8:15 y Filipenses 4:8-da liyish, chaimunda parrlaichi:
-
¿Canga ima diversiongunadadi munangui?
Alli diversiongunada agllashmi contentos sintirishun.
HUAQUINGUNAGA NINMI: “Brujeriaun, peleanaun, huainayanaun tsagrurishca diversiongunada rricunaga na malollu gan. Chaida rrurranami malo ganga”.
-
¿Canga imadadi ninguimun?
RESUMEN
Jehová Diosga alli diversiongunada agllash contentos sintirillunmi munan.
Repaso
-
Diosda sirvijgunaga, ¿ima laya diversiongunamundadi caruyana ganchi?
-
Diversiongunabiga, ¿imamundadi na ashca tiempoda pasana ganchi?
-
¿Canga Jehová Dios munashca diversiongunadallu agllanada munangui? ¿Imamunda?
ASHTAUN YACHAI
Ñucunchi diversiongunada pi agllana gashcada yachai.
Alli diversiongunada agllangabu imada rrurrana gashcada rricui.
“¿Son sanas nuestras diversiones?” (La Atalaya, 15 de octubre de 2011)
“Cutishujgunada fiñanadami saquircani” nishca partebi shuj jari imamunda na alli diversiongunada saquishcada rricui.
“La Biblia les cambió la vida” (La Atalaya, 1 de febrero de 2010)
Brujeriagunaun tsagrurishca diversiongunamunda caruyangabu, shuj huarmi imada rrurrashcada rricui.
