Achca jovencunami Diosta mañancuna. Pero huaquincunallami cada punlla mañanata yachancuna. Chaimantami huaquincunaca: “¿Mañanaca alli sintiringapajllachu can? ¿Mañanaca imamantataj importante can?” nishpa tapuringacuna.

•  ¿Diosta mañanaca imataj can?

•  ¿Diosca ñucanchijta uyanchu?

•  ¿Imacunamantataj Diosta mañai tucuni?

•  ¿Shujtaj jovencunaca imatataj yuyan?

 Mañanaca tucuita ruraj Dioshuan parlanami can. Caipi yuyai, Jehová Diosca runacunamanta ashtahuan yalli cashpapish paica “ñucanchijmantaca mana carupichu” can (Hechos 17:27). Bibliapica “Diosman cꞌuchuyaichij, paipish cancunapajman cꞌuchuyangami” ninmi (Santiago 4:8).

 ¿Diospajman ashtahuan cꞌuchuyangapajca imatataj rurai tucungui?

•   Diostami mañana cangui. Diosta mañashpami paihuan parlanacungui.

•   Bibliatami estudiana cangui. Bibliata estudiashpami Dios canman “ima nishcata” uyangui.

 Diosta mañashpa, Bibliata estudiashpami Dioshuan parlacushca shina can. Chashnami Dioshuan ashtahuan alli amigo tucungui.

 Jeremyca: “Jehová Dioshuan parlanaca ñucanchijpajca shuj jatun bendicionmi can” ninmi.

 Mirandaca: “Ñuca ima shina sintirishcata Jehová Diosman parlashpami paipaj cꞌuchullapi cashcata sintini” ninmi.

 Diospi crishpapish, paita mañashpapish pai uyacushcata crinaca sinchichari ricurin. Pero Bibliapica Jehová Diostaca “quiquinca mañashcata uyanguimi” ninmi (Salmo 65:2). Shinallataj Jehová Diosca can imamanta sustarishcata paiman parlachunmi munan. ¿Imamanta? Yaya Diosca canmantami sustarin (1 Pedro 5:7).

 Caipi yuyai: ¿Cambaj alli amigocunahuan parlangapajca tiempota llujchinguichu? Yaya Dioshuanpish chaillatatajmi rurai tucungui. Jehová Dioshuan siempre parlai, paipaj shutita nombrashpa paita mañai (Salmo 86:​5-7; 88:9). Bibliallapitajmi Diostaca “mañaraichij” nishpa invitan (1 Tesalonicenses 5:​17).

 Moisesca: “Diosta mañashpaca ishquindijlla parlacuj shinami can, paimanca ñuca imata yuyashcata ima shina sintirishcatami tucuita huillani” ninmi.

 Karenca: “Ñuca mamaman shina, ñuca alli amigocunaman shinami Jehová Diosmanca importante cosascunata parlani” ninmi.

 Bibliapica: “Diosta mañacushpaca paiman tucuita huillaichij. Tucui imamantapish Diosta mañashpaca pagui nichij” ninmi (Filipenses 4:6).

 Shinashpaca ¿Yaya Diosmanca tucui ñucanchij llaquicunatachu parlai tucunchij? Ari. Bibliapica: “Cambaj llaquitaca Mandaj Diosman apachi. Paica canta charirangami” ninmi (Salmo 55:22).

 Pero Yaya Diostaca mana cambaj llaquicunallamanta parlangapajchu mañana cangui. Chantelle shuti shuj jovencitaca: “Yaya Diosta ñucata ayudachunlla mañashpaca paipaj alli amiga cashcataca mana ricuchimanchu. Puntapica Yaya Diostaca pagui ningapajmi mañana canchij. Paitaca achca cosascunamantami agradici tucunchij” ninmi.

 Caipi yuyai: ¿Imallacunamantataj Diostaca agradici tucungui? Cai punllapi imalla quimsa cosascunamanta Diosta agradici tucushcata yuyai.

 Anitaca: “Shuj sumaj sisata ricushpallami Yaya Diosta pagui ningapaj mañai tucunchij” ninmi.

 Brianca: “Bibliamanta can munashca shuj versopi yuyai. Mana cashpaca Yaya Dios rurashcacunamanta can ashtahuan munashcapi yuyai, qꞌuipaca chaicunamanta Diosta pagui ningapaj mañai” ninmi.