Éxodo 40:1-38
40 Chai qꞌuipami Jehová Diosca Moisestaca cashna nirca:
2 “Primer quillapaj punta punllapica tandanacuna carpa huasita shayachingui.
3 Chaipimi Leyta huaquichina arcataca cortina huashapi churashpa pacana cangui.
4 Shinallataj mesatapishmi chai ucupi churana cangui. Mesa jahuapi churana cosascunatapishmi alajata allichina cangui. Candelerotapishmi chai ucupi churashpa lamparacunata japichina cangui.
5 Chai qꞌuipaca Leyta huaquichina arca ñaupajpimi inciensota rupachina oro altarta churana cangui. Shinallataj carpa huasiman yaicuna cortinataca maipi churana cashcapimi churana cangui.
6 Rupachishca ofrendata cuna altartaca tandanacuna carpa huasi ñaupajpimi churana cangui.
7 Tandanacuna carpa huasihuan altarhuan chaupipimi shuj tanqueta churashpa chaipi yacuta jundachina cangui.
8 Chai huashaca carpa muyundijpimi shuj patiota rurana cangui. Patioman yaicunapica cortinatami huarcuna cangui.
9 Chai qꞌuipaca agllana aceiteta churashpami carpa huasitapish, tucui chaipi imalla tiyajtapish chꞌicanyachina cangui. Carpa huasitapish, tucui shujtaj cosascunatapishmi chuyayachina cangui.
10 Shinallataj rupachishca ofrendata cuna altartapish, chaipi tiyaj tucui cosascunatapishmi chꞌicanyachina cangui. Chai altartaca yallitaj chuya cachunmi chuyayachina cangui.
11 Shinallataj tanquetapish, tanquepaj basetapishmi chꞌicanyachishpa chuyayachina cangui.
12 Chai huashaca Aarontapish, Aaronpaj churicunatapishmi tandanacuna carpa huasi yaicunaman cꞌuchuyachina cangui. Paicunataca yacuhuanmi maillana cangui.
13 Aaronmanca sacerdote churarina churanatami churachina cangui. Shinallataj paita agllashpami ñucapajlla cachun chꞌicanyachina cangui. Paica ñuca sacerdotemi canga.
14 Chai huashaca Aaronpaj churicunatami cꞌuchuyachina cangui. Paicunamanpishmi churanacunata churachina cangui.
15 Paicunatapish ñuca sacerdotecuna cachunmi paicunapaj yayata agllashca shinallataj agllana cangui. Chashna agllashcamantami paicunaca siempre sacerdotecuna canga. Paicunapaj huahua huahuacunapishmi sacerdotecuna canga” nircami.
16 Moisesca Jehová Dios mandashcatami tucuita rurarca. Paica Dios nishca shinallatajmi rurarca.
17 Moisesca segundo huatapaj primer quillapaj punta punllapimi carpa huasita shayachirca.
18 Moisesca carpa huasita rurashpaca basecunatami churarca. Basecuna jahuapica armazoncunatami churarca. Barracunatapish maipi churana cashcapimi churarca, pilarcunatapishmi shayachirca.
19 Moisesca Jehová Dios mandashca shinami carpa huasi jahuataca telacunahuan cꞌatachirca. Cutin chai telacuna jahuataca caracunahuanmi cꞌatachirca.
20 Chai qꞌuipaca Leyta quillcashca tabla rumicunata japishpami Arca ucupi huaquichirca. Arca argollacunapica caspicunatami churarca. Shinallataj arca tapatapishmi churarca.
21 Cutin Arcataca carpa huasi ucupimi churarca. Chꞌicanyachij cortinataca maipi churana cashcapimi churarca. Chashnami Leyta huaquichina arcaca Jehová Dios mandashca shina pacalla saquirirca.
22 Chai huashaca mesataca tandanacuna carpa huasi janaj ladoman, cortina caishuj ladomanmi churarca.
23 Chai mesa jahuapica Jehová Dios mandashca shinami Jehová Diospaj ñaupajpi montonashca tandacunata allichirca.
24 Candelerotaca tandanacuna carpa huasi ucupimi churarca. Ura ladoman, mesa chꞌimbapurapimi churarca.
25 Shinallataj Jehová Dios mandashca shinami Jehová Diospaj ñaupajpi lamparacunata japichirca.
26 Chai qꞌuipaca tandanacuna carpa huasipimi cortina ñaupajpi oro altarta churarca.
27 Jehová Dios mandashca shina mishquijllata ashnacuj inciensota rupachingapajmi chashna churarca.
28 Chai huashaca carpa huasiman yaicunapimi cortinata churarca.
29 Shinallataj Jehová Dios mandashca shinami rupachishca ofrendata cuna altartaca tandanacuna carpa huasi ñaupajpi churarca. Chai altarca rupachishca ofrendata cungapaj, grano ofrendata cungapajmi carca.
30 Chai qꞌuipami tanquetaca tandanacuna carpa huasihuan altarhuan chaupipi churarca. Chai tanquepica maillaringapajmi yacuta jundachirca.
31 Chaipimi Moisespish, Aaronpish, Aaronpaj churicunapish maquicunata, chaquicunata maillarircacuna.
32 Jehová Dios Moisesman mandashca shinami tandanacuna carpa huasiman cada yaicuita o altarman cada cꞌuchuyaita maillarijcuna carca.
33 Ultimopica carpa huasi muyundijpi, altar muyundijpimi patiota rurarca. Patioman yaicunapica cortinatami churarca.
Chashnami Moisesca chai obrata tucuchirca.
34 Chai qꞌuipami tandanacuna carpa huasitaca pꞌuyu taparca. Chaimi carpa huasipica Jehová Diospaj sumaj achijnicuj jundarca.
35 Moisesca tandanacuna carpa huasi jahuapi pꞌuyu cashcamantami chaimanca mana yaicui tucurca. Carpa huasipica Jehová Diospaj sumaj achijnicujmi jundarca.
36 Israelitacunaca chaquishca pambapi puricushpaca tandanacuna carpa huasi jahuamanta pꞌuyu anchurijpimi paicunapaj carpa huasicunata pascajcuna carca.
37 Pero pꞌuyu mana anchurijpica paicunapaj carpa huasicunataca mana pascajcunachu carca. Pꞌuyu anchuringacamami shuyajcuna carca.
38 Israelitacunaca paicunapaj tucui viajepimi punllaca carpa huasi jahuapi Jehová Diospaj pꞌuyu cajta ricurcacuna. Cutin tutaca chai jahuapica lunyacuj nina cajtami ricurcacuna.
