1 Timoteo 4:1-16
4 Shinapish Diospaj espirituca shamuj punllacunapica maijancunaca llulla huillaicunata* uyashpa, demoniocunapaj* yachachishcacunata uyashpami Diospi crinata saquingacuna ninmi.
2 Mishqui shimi jayaj shungu runacuna llullacunata parlashcamantami chashna tucunga. Cai runacunapaj concienciaca rupacuj fierrohuan rupachishca shinami imata mana sintin.
3 Paicunaca ama cazarachunmi jarcancuna. Maijan micunacunatapish ama micuchunmi mandancuna. Shinapish chai micunacunataca Diosmi rurarca. Mana llullata alli yachashpa, feta charijcuna pagui nishpa micuchunmi chashna rurarca.
4 Dios tucui imalla rurashcacunaca yallitaj sumajmi. Chaimantami diosolopagui nishpa imatapish mana millashpa chasquinalla can.
5 Micunaca Diospaj shimimanta, Diosta mañashcamantapishmi chuyayachishca can.
6 Huauquicunaman cai consejocunata cushpaca Cristo Jesusta alli sirvijmi cangui. Ñucanchij crishcacunata alli yachashcata, alli yachaicunata tucui shunguhuan caticushcatapishmi ricuchingui.
7 Shinapish yuyaj huarmicuna parlashca shina Diosta yangapi churaj llulla parlocunataca ama uyangui. Chaipaj randica ejerciciota ruraj shina Diosta tucui shunguhuan adorangapaj sinchita esforzari.
8 Ejerciciota ruranaca cuerpota sinchiyachingapajmi ashata ayudan. Shinapish Diosta tucui shunguhuan adoranaca tucuipajmi alli can. Diosta tucui shunguhuan adorajcunaca cunan punllacunapipish, shamuj punllacunapipishmi bendicioncunata chasquingacuna.
9 Cai huillashca shimicunaca ciertomi. Chaitaca tucui shunguhuan chasquinallami.
10 Chaimantami ñucanchijca sinchita trabajashpa esforzaricunchij. Causaj Diospimi ñucanchij shunguta churashcanchij. Paica tucui laya gentecunata, ashtahuantajca tucui shunguhuan paita sirvijcunata Quishpichijmi.
11 Caicunata mandashpa cati. Cai mandashcacunatapish yachachishpa cati.
12 Maijanpish can joven cashcallamanta canta mana valichichunca ama saquingui. Ashtahuanpish cambaj rimaihuan, cambaj ruraihuan, cambaj cꞌuyaihuan, cambaj crishcahuan, cambaj chuya causaihuanmi Diosta tucui shunguhuan sirvijcunapaj alli ejemplo cana cangui.
13 Ñuca chayangacamaca aconsejangapaj,* yachachingapaj, shujtajcunapaj ñaupajpi liyingapajpish esforzarishpa cati.
14 Dios cushca regalotaca ama yangapi churangui. Profetacuna canmanta huillashcamantami ancianocunaca cambaj jahuapi paicunapaj maquicunata churarca. Chashnami chai regalotaca chasquircangui.
15 Caicunapi yuyai, Diosta shungumanta sirvicushcata tucuicuna ricuchunca chaicunapi cambaj tucui shunguta churai.
16 Alli ejemplo cangapaj, alli yachachij cangapaj esfuerzota rurai. Caicunata ruranataca ama saquingui. Chashnami canpish quishpiringui, canta uyajcunapish quishpiringacuna.
