Filemón 1:1-25
1 Ñucaca Pablomi cani. Cristo Jesusmantami prezupi cani. Ñucanchij huauqui Timoteondijmi ñucanchijhuan sirvij cꞌuyashca Filemonman cai cartata quillcani.
2 Shinallataj ñucanchij pani Apfiamanpish, Cristopaj soldado shina ñucanchijhuan sirvij Arquipomanpish, cambaj huasipi tandanacuj huauqui panicunamanpishmi* quillcani:
3 Ñucanchij Yaya Diospish, Amito Jesucristopish yallitaj llaquij cashcata ricuchichun, sumaj causaitapish cancunaman cuchun.
4 Ñuca mañacushpaca canta yuyarishpami Diostaca siempre pagui nini.
5 Achcacuna nishca shinaca canca Amito Jesuspimi feta charingui. Tucui shunguhuanmi paita cꞌuyangui. Tucui jucha illajcunatapish chashnallatajmi cꞌuyangui.
6 Canpish, Jesusta catij caishujcunapish feta charishcamanta tucui bendicioncunata Cristomanta ñucanchij chasquishcata cuentata cuchunmi Diosta mañani.
7 Cambaj cꞌuyaimanta uyashpaca achcatami cushicurcani, achcatami animarircani. Ñuca huauquilla, canmantami jucha illajcunapaj shunguca animarishca.
8 Ñucaca Cristopaj apóstol cashcamanta allita rurachun mandangapaj autoridadta charishpapish,
9 can cꞌuyaj cashcata yachashpami rogasha nini. Ñucaca ñami mayorlla cani. Cunancarin Cristo Jesusmantami prezushca cani.
10 Ñuca churi Onesimota ayudachunmi rogapani. Ñucaca prezupi cashpami paipajca shuj yaya shina tucurcani.
11 Ñaupaca Onesimoca cambajca ima allita mana rurajchu carca. Shinapish cunanca cambajpish, ñucapajpish allita rurajmi can.
12 Paitami cambajman tigrachishpa cachani. Ñucaca tucui shunguhuanmi paitaca cꞌuyani.
13 Alli huillaicunata huillashcamanta ñuca prezupi cajpi, cambaj randi ñucata sirvishpa ayudachunmi Onesimotaca caipi saquirichun munani.
14 Shinapish can permisota mana cujpica mana imata rurasha ninichu. Cai alli ruraita obligado shina rurachunca mana munanichu. Ashtahuanpish cambaj quiquin munaimanta rurachunmi munani.
15 Paica canhuan siempre cangapaj, can cutin chasquichunchari canmantaca shuj tiempota* caruyashcanga.
16 Shinapish cunanca ña mana shuj sirvij runata shinallachu chasquingui, ashtahuanpish cambaj cꞌuyashca huauquita shinami chasquingui. Ñucaca paitaca achcatami cꞌuyani. Shinapish canta sirvij cashcamanta, Amito Jesusta catij cashcamantami cancarin paitaca ashtahuan cꞌuyangui.
17 Shinaca ñuca cambaj amigo cashcata yuyashpaca ñucata chasquij shinallataj paitapish alli chasquipai.
18 Ashtahuanpish pai ima dañota rurashca cajpi, imata dibijpica ñucami canman pagasha.
19 Ñuca propio maquihuanmi cai cartataca quillcani: Onésimo tucui dibishcataca ñucami pagasha (shinapish canca cambaj causaita ñucaman dibishcataca allimi yachangui).
20 Ari huauquicu, ishquindijllataj Amitota catij cashcamanta cai favorta rurapai. Cristomanta ñuca shunguta animapai.
21 Canman ñuca ima mandashcata ruranataca allimi yachani. Ñuca nishcatapish ashtahuan yalli rurana cashcata yachashpami quillcani.
22 Ñuca maipi saquirinatapish allichipangui. Cancuna Diosta mañashcamanta cancunapajman tigrashapishchari.
23 Epafrasmi canmanca saludocunata cachan. Paica Cristo Jesushuan shuj shinalla cashcamantami ñuca shinallataj prezupi can.
24 Shinallataj ñucahuan sirvij Marcos, Aristarco, Demas, Lucaspishmi cantaca saludan.
25 Cancuna alli yuyaita ricuchishcamanta Amito Jesucristoca yallitaj llaquij cashcata cancunaman ricuchichun.
Notacuna
^ Griego rimaipica: “congregacionmanpishmi” ninmi.
^ Griego rimaipica: “shuj horata” ninmi.
