Gálatas 3:1-29
-
Leypi nishca ruraicunaca feta charishcamanta ruraicunahuanca mana igualchu (1-14)
-
“Cashcata rurajca feta charishcamantami causanga” (11)
-
-
Abrahanca Dios cusha nishcataca mana Leyta cazushcamantachu chasquirca (15-18)
-
Abrahanpaj huahua huahuaca Cristomi (16)
-
-
Ley callarishcamanta, Ley imapaj tiyashcamantapish (19-25)
-
“Feta charishcamantami tucui cancunaca Diospaj huahuacuna canguichij” (26-29)
-
Cristopaj cajcunaca Abrahanpaj huahua huahuacunami can (29)
-
3 Galacia llajtapi causajcunalla. Cancunaca yuyai illajmi canguichij. Jesucristota caspipi clavashpa huañuchishcataca cancunamanca allimi intindichircanchij. ¿Chashnapish pitaj cancunataca pandachircari?
2 Cancunataca caillatami tapusha nini:* ¿espíritu santotaca leypi nishcata pajtachishcamantachu chasquircanguichij, mana cashpaca cancuna uyashca alli huillaicunapi feta churashcamantachu chasquircanguichij?
3 ¿Cancunaca yallitaj yuyai illajcunachu canguichij? Espíritu santo yuyachishca shina puri callarishca jahuachu, ¿cunanca runacunapaj yuyaita caticunguichij?
4 ¿Tucui laya llaquicunataca yangamantachu ahuantarcanguichij? Mana yangamantachu ahuantarcanguichij. Chaitaca allimi yachani.
5 Cancunaman espirituta cujpish, cancunapurapi milagrocunata rurajpish, ¿cancuna leypi nishcata pajtachishcamanta mana cashpaca cancuna uyashca alli huillaicunapi feta churashcamantachu chaicunata ruran?
6 Abrahanhuanca cashnami tucurca: “Abrahanca Jehová* Diospimi feta churarca. Chaimantami Diosca paitaca cashcata rurajta shina ricurca”.
7 Feta charijcunami Abrahanpaj huahuacuna can. Chaitaca cancunaca allimi yachanguichij.
8 Diosca ñaupamantami pai Quillcachishcapica shujtaj llajta gentecunaca feta charishcamantami cashcata rurajcuna nishca canga nishpa huillarca. Chaimantami Abrahanmanca: “Canmantami tucui llajta gentecunaca bendiciashca canga” nishpa alli huillaicunata ñaupaman huillarca.
9 Abrahanca feta charishcamantami bendiciashca carca. Feta charijcunapish Abrahán shinallatajmi bendiciashca cangacuna.
10 Leypi nishcallata cazuj gentecunaca tucuicunami mana alli nishca cangacuna. Quillcachishcapica: “Maijanpish quillcashca Leypi nishcata mana pajtachishpa catijca mana alli nishca cachun” ninmi.
11 Shinallataj maijanpish leypi nishcallata cazujca Diospaj ñaupajpica cashcata ruraj shinaca mana ricuringachu. Quillcachishcapica: “Cashcata rurajca feta charishcamantami causanga” ninmi.
12 Leypi nishcata pajtachingapaj feta charinaca mana minishtirinchu. Ashtahuanpish “shuj runaca Leypi nishca shina cashcata rurashpaca causangami” ninmi.
13 Shinallataj quillcachishcapica: “Caspipi huarcushca caj runaca mana alli nishca cachun” ninmi. Ñucanchijca Leymantami mana alli nishca carcanchij. Shinapish Cristomi ñucanchijpaj randi mana alli nishca tucushpa chai Leymanta cacharichirca. Chashnami paica ñucanchijta randirca.
14 Caica Abrahanman cusha nishca bendicioncunata Cristo Jesusmanta shujtaj llajta gentecunapish japichunmi chashna tucurca. Shinallataj ñucanchijpish feta charishcamanta pai cusha nishca espirituta chasquichunmi chashna tucurca.
15 Huauquicuna, shuj ejemplota churashpami parlasha nini: imata ari ninacushpa allimi nishpaca, shuj yanga runalla ari nishca cajpipish ni pi mana yangapi churai tucunchu, imata mana mirachi tucunchu.
16 Diosca Abrahanman paipaj huahua huahuamanmi allicunata cusha nirca. Quillcachishcapica achca gentecunamanta parlacushca shinaca mana “huahua huahuacunaman” ninchu. Ashtahuanpish shujllamanta parlashpami cambaj “huahua huahuaman” nin. Paica Cristomi can.
17 Caitapishmi nini: Diosmi puntapica ari nirca. 430 huatacuna qꞌuipami Leyta curca. Chai Leyca Dios ari nishcataca mana yangapi churai tucunchu. Shinallataj Dios cusha nishcatapish mana chingachi tucunchu.
18 Leyta cazushcallamanta herenciata Dios cujpica, mana pai cusha nishcamantachu chai herenciata cunman. Ashtahuanpish Diosca llaquishcamantami pai cusha nishca herenciataca Abrahanman curca.
19 Shinaca ¿Diosca imamantataj Leytaca curca? Abrahanpaj huahua huahua chayamungacama, gentecuna mana allita ruracushcata ricuchingapajmi Leytaca curca. Diosca angelcunata cachashpami Leytaca Moisesman huillachirca. Chai huashami Moisesca gentecunaman huillarca.
20 Shujlla ari nijpica ari ninacushcata huillajca mana minishtirinchu. Dioshuanpish chashnallatajmi tucun. Ari nicui ratoca paillami carca.
21 Shinaca ¿Dios cusha nishcacunatachu Leyca jarcan? ¡Mana chashnachu! Gentecunaca causaita cuj leyta chasquishca cashpaca chai leyta cazushpami cashcata rurajcuna nishca canman carca.
22 Ashtahuanpish Jesucristopi feta charishcata ricuchijcuna Dios cusha nishcata chasquichunmi Dios quillcachishca shimica tucuicunata jucha mandachun saquirca.
23 Shinapish Cristopi manaraj feta churajpica leymi ñucanchijtaca mandacurca. Shinallataj Dios imata ricuchinata shuyacushpaca leypi huatashca shinami carcanchij.
24 Feta charishcamanta Diospaj ñaupajpi cashcata rurajcuna nishca cangapajmi, Leyca Cristopajman chayachingacama pushaj runa shina* ñucanchijtaca pushacurca.
25 Cunanca Cristopi feta charishcamantami ñucanchijca Ley pushachunca ña mana minishtinchij.
26 Shinaca Cristo Jesuspi feta charishcamantami tucui cancunaca Diospaj huahuacuna canguichij.
27 Cancunaca Cristohuan shuj shinalla cangapajmi bautizarircanguichij. Chaimantami cunanca Cristo rurashca shinallataj ruranguichij.*
28 Cristo Jesushuan shuj shinalla cashcamantami tucui cancunaca judío cashpapish, griego cashpapish, sirvij cashpapish, cacharichishca cashpapish, cꞌari cashpapish, huarmi cashpapish chai shinallataj canguichij.
29 Ashtahuanpish Cristota catijcuna cashpaca Abrahanpaj huahua huahuacunami canguichij. Abrahanman Dios cusha nishca herenciatapishmi chasquinguichij.
Notacuna
^ Griego rimaipica: “Cancunamantami yachasha nini” ninmi.
^ “Jehová” shutita huasha diccionariopi ricui.
^ Pushaj runaca huahuacunatami cuidaj carca, yachachij carca.
^ Griego rimaipica: “Cristota churaricunguichij” ninmi.
