Apocalipsis 16:1-21
16 Chai qꞌuipaca Diospaj huasi ucumanta* shuj sinchi rimashcatami uyarcani. Chai rimashcami canchis angelcunataca: “Richij, Dios yallitaj pꞌiñarishca canchis tazoncunataca allpapi talligrichij” nicurca.
2 Primer ángel rishpaca paipaj tazontaca allpapimi tallirca. Chashna tallijpica millai, nanachij sisu ungüimi manchanai millai animalpaj señalta charijcunata, paiman rijchajta rurashca animalta adoraj gentecunatapish achcata llaquichirca.
3 Segundo angelca paipaj tazontaca mama cucha yacupimi tallirca. Chashna tallijpimi mama cucha yacuca huañuchishca runapaj yahuar shina tucurca. Chaimi mama cucha yacupi causajcunaca tucuicuna huañurca.
4 Tercer angelca paipaj tazontaca jatun yacucunapi, pugyucunapimi tallirca. Chashna tallijpimi chai yacucunaca yahuar tucurca.
5 Chai qꞌuipaca yacucuna jahuapi autoridadta charij ángel cashna nicujtami uyarcani. Paica: “Canca cunanpish tiyaj, ñaupapish tiyaj, Pajtachij Diosmi cangui. Cashcata ruraj cashpami cai juiciocunataca apamushcangui.
6 Paicunaca jucha illajcunapaj, profetacunapaj yahuartami jicharcacuna. Chaimantami canpish paicuna chasquina cashca shinallataj yahuarta ubyachishcangui” nicurcami.
7 Shinallataj altarmanta shuj rimashcatami uyarcani. Chai rimashcami: “Tucui poderta charij Jehová* Dioslla canca cashcata rurashpa, allimi juzgangui” nicurca.
8 Cuarto angelca paipaj tazontaca intipimi tallirca. Chaimi intica gentecunata ninahuan rupachingapaj poderta chasquirca.
9 Chaimantami inti yallitaj rupachijpi gentecunaca ruparca. Shinapish paicunaca mana arrepintirircacunachu. Ashtahuanpish Diospaj shutitami cꞌamircacuna. Diostaca mana jatunyachircacunachu. Diosmi cai llaquicunata apamungapajca poderta charin.
10 Quinto angelca paipaj tazontaca manchanai millai animalpaj jatun tiyarinapimi tallirca. Chaimi pai tucui mandacushcaca amsayarca. Gentecunaca nanaihuanmi paicunapaj cꞌalluta canirircacuna.
11 Shinapish paicunapaj millai ruraicunamantaca mana arrepintirircacunachu. Ashtahuanpish nanaimanta, sisu ungüimantami jahua pacha Diosta cꞌamircacuna.
12 Sexto angelca paipaj tazontaca Éufrates jatun yacupimi tallirca. Chaimi yacucunaca chaquirirca. Inti llujshin ladomanta shamuj mandajcunapaj ñanta allichingapajmi chashna chaquirirca.
13 Shinallataj dragonpaj shimimanta, manchanai millai animalpaj shimimanta, llulla profetapaj shimimantapish sapocuna shina quimsa mapa huillaicuna* llujshicujtami ricurcani.
14 Chai huillaicunaca demoniocunamantami* shamun. Chai huillaicunami Tucui poderta charij Diospaj jatun punllapi tucui muyundij allpamanta mandajcunata macanacuiman tandachingapaj jatun milagrocunata ruran.
15 “¡Ricui! Shuhua shinami shamucuni. Maijanpish rijcharishca, paipaj churanatapish churarishca cajca cushicungami. Paica mana lluchulla cashcamantami gentecuna ricujpica mana pingaringa”.
16 Chai huillaicunaca mandajcunataca hebreo rimaipi Armagedón* nishcamanmi tandachircacuna.
17 Séptimo angelca paipaj tazontaca huairapimi tallirca. Chaimi Diospaj huasi ucumanta, jatun tiyarinamantapish shuj sinchi rimashca uyarishpaca: “¡Ñami tucurishca!” nirca.
18 Chai qꞌuipaca relampagocuna, rimaicuna, cꞌulun nishcacuna, shuj jatun terremotopishmi tiyarca. Chashna laya jatun terremotoca gentecuna cai allpapi tiyai callarishcamantapacha mana tiyashcachu carca. Chai terremotoca yallitaj sinchi, jatunmi carca.
19 Chaimantami jatun llajtaca quimsa partepi chꞌicanyarirca. Muyundij allpapi caj llajtacunapishmi urmarca. Shinallataj Diosca pai yallitaj pꞌiñarishca cashca copa vinota ubyachingapajmi Babilonia Jatun llajtata yuyarirca.
20 Tucui islacunapish huashicurcami, urcucunapish chingarircami.
21 Jahua pachamantaca jatun rumicuna shina rundumi gentecunapaj jahuapi urmarca. Cada rundumi shuj talento* shinata pesarca. Chai runduca yallitajmi llaquichirca. Chai rundu llaquichishcamantami gentecunaca Diosta cꞌamircacuna.
Notacuna
^ Caipica Diospaj huasi ucu nishpaca Diospajlla ashtahuan chꞌicanyachishca ucumantami parlacun.
^ “Jehová” shutita huasha diccionariopi ricui.
^ Griego rimaipica: “mapa espiritucuna” ninmi.
^ O “supaicunamantami”.
^ Griego rimaipica: “Har Maguedṓn” ninmi. Cai shimica hebreo rimaipica: ‘Meguidó urcu’ nisha ninmi.
^ Grecia llajtamanta talentoca 20.4 kilogramocunatami charirca (44.88 libras).
