Juan 10:1-42
10 Jesusca cashnami nirca: “Cancunamanca manataj llullanichu. Maijanpish ovejacunapaj corralman mana punguta yaicushpa, pata jahuata yaicujca shuhuami.
2 Ashtahuanpish punguta yaicujca, ovejacunata michijmi.
3 Chai michij yaicuchunmi corralta cuidajca punguta pascan. Ovejacunapish pai rimashcatami uyan. Michijca paipaj ovejacunataca shutipi cayashpami canllaman llujshichin.
4 Paipaj ovejacunata corralmanta tucui llujshichishca qꞌuipaca paicunata ñaupashpami rin. Ovejacunaca michijpaj rimashcata rijsishcamantami paita catishpa rinllacuna.
5 Ovejacunaca mana rijsishca michijtaca mana catincunachu. Ashtahuanpish pai rimashcata mana rijsishcamantami paimanta caruyashpa maitapish rinllacuna” nircami.
6 Jesús cai chꞌimbapuraita churashpa parlajpipish judiocunaca pai imata nicushcataca mana intindircacunachu.
7 Cutinllatajmi Jesusca paicunamanca cashna nirca: “Cancunamanca manataj llullanichu. Ñucaca ovejacuna yaicuna pungumi cani.
8 Ñuca shutipi llullashpa tucui shamujcunaca shuhuacunami. Chaimantami ovejacunaca paicunataca mana uyancuna.
9 Punguca ñucami cani. Maijanpish corralman yaicungapaj ñucapajman shamujca quishpiringami. Paica yaicungami, llujshingami, qꞌuihuatapish charingami.
10 Shuhuaca shuhuangapaj, huañuchingapaj, llaquichingapajllami shamun. Ashtahuanpish ñucaca, ñuca ovejacuna causaita charichun, paicuna achcata causachunmi shamushcani.
11 Ñucaca alli michijmi cani. Alli michijca paipaj ovejacunata quishpichingapajmi paipaj causaita* cun.
12 Cullquillamanta ovejacunata cuidaj runaca michijpish mana canchu. Ovejacunapaj dueñopish mana canchu. Chaimantami lobo shamujta ricushpaca ovejacunata shitashpa, miticushpa rinlla. Chaimi lobo shamushpa maijan ovejacunata apajpica, caishuj ovejacunapish urata janajta miticushpa rincuna.
13 Cullquillamanta trabajaj cashcamantami chai runaca ovejacunamanta mana sustarin.
14 Ñucaca alli michijmi cani. Ñuca ovejacunataca rijsinimi. Ñuca ovejacunapish ñucataca rijsinmi.
15 Ima shinami Yayaca ñucata rijsin, shinallatajmi ñucapish Yayataca rijsini. Chaimantami ñuca ovejacunamantaca ñuca causaita* cuni.
16 Ñucaca shujtaj ovejacunatapishmi charini. Paicunaca mana cai corralmantachu. Chai ovejacunatapishmi pushamuna cani. Paicunapishmi ñuca rimashcata uyangacuna. Chaipimi shujlla canlla ovejacuna tucunga. Michijpish shujllami canga.
17 Cutinllataj ñuca causaita chasquingapajmi ñuca causaita* cuni. Chaimantami Yayaca ñucata cꞌuyan.
18 Maijan runapish ñuca causaitaca mana quichunchu. Ashtahuanpish ñuca munaimantami ñuca causaita cuni. Ñuca causaita cungapajpish, cutinllataj chasquingapajpish derechota charinimi. Ñuca Yayami chaita rurachun mandarca” nircami.
19 Chashna nishcata uyashpami judiocunaca cutinllataj paicunapura mana shuj yuyailla tucurcacuna.
20 Paicunamantaca achcacunami: “Paica demonio* japishca, locoyashcamari. ¿Imamantataj paitaca uyacunguichij?” nircacuna.
21 Cutin shujtajcunaca: “Demonio japishca runaca mana chashna rimanchu. Shuj demonioca mana ricuj runataca mana alliyachinmanchu* ¿nachu?” nircacunami.
22 Chai punllacunapica Diospaj huasita mingashcata yuyarina fiestatami* Jerusalenpica ruracurcacuna. Chai punllacunaca tamya punllacunami carca.
23 Jesusca Diospaj huasipimi* Salomón nishca Corredorpi puricurca.
24 Chaipimi judiocunaca Jesuspaj muyundijpi shayarishpaca: “¿Imamantataj canca pi cashcata mana huillanguiyari? Cristo cashpaca ña huillayari” nircacuna.
25 Chashna nijpimi Jesusca cashna cutichirca: “Ñami huillarcani, shinapish cancunaca mana cringuichijchu. Ñuca Yayapaj shutipi rurashcacunami ñucamantaca huillan.
26 Ashtahuanpish cancunaca mana ñuca ovejacuna cashcamantami ñucataca mana cringuichij.
27 Ñuca ovejacunaca ñuca rimashcata uyanmi. Ñucapish paicunataca rijsinimi. Paicunapish ñucataca catinmi.
28 Ñucami huiñai causaita paicunamanca cuni. Paicunaca mana nunca huañungacunachu. Ñuca maquimantapish ni pi mana quichungachu.
29 Ñuca Yaya cushca ovejacunaca tucuimanta yalli valishcami. Yayapaj maquimantaca chai ovejacunataca ni pi mana quichui tucunchu.
30 Ñucapish, Yayapish shujllami* canchij” nircami.
31 Cutinllatajmi judiocunaca rumicunahuan shitangapaj rumicunata japircacuna.
32 Chaimi Jesusca: “Yaya mandashca achca alli ruraicunatami cancunamanca ricuchishcani. ¿Chai ruraicunamantaca maijanmantataj ñucataca rumicunahuan shitashun ninguichijyari?” nirca.
33 Chashna nijpimi judiocunaca: “Alli ruraicunamantaca mana rumicunahuan shitagrinchijchu. Ashtahuanpish Diosta cꞌamishcamantami cantaca rumicunahuan shitagrinchij. Canca runa cashpapish canllatajmari dios tucungui” nishpa cutichircacuna.
34 Chaimi Jesusca paicunamanca cashna nirca: “¿Manachu cancunapaj Leypica quillcashca tiyacun? Diosca: ‘Ñucami cancunataca cashna nini: “Cancunaca dioscunami canguichij” nircami’.
35 Diosca paipaj shimipimi llaquichina cashca gentecunataca: ‘Cancunaca dioscunami canguichij’ nirca. (Chashnapish Dios quillcachishcaca mana cambiai tucunchu).
36 Ashtahuanpish Yayami ñucataca jucha illajta rurarca, cai pachamanpish cacharca. ¿Cancunaca ‘Diospaj Churimi cani’ nishcamantachu ñucataca ‘Diostami cꞌamicungui’ ninguichij?
37 Ñuca Yaya rurai nishcacunata mana rurajpica ñucapica ama crichijchu.
38 Ashtahuanpish chai ruraicunata rurajpica ñucapi mana crishpapish, ñuca rurashcacunata ricushpa crichij. Chashnami Yaya ñucahuan shuj shinalla cashcata, ñucapish Yayahuan shuj shinalla cashcata yachashpa ashtahuan intindinguichij” nircami.
39 Chashna nijpimi cutinllataj Jesustaca japishun nircacuna. Shinapish paicunapaj maquimantami paica vincishpa rirca.
40 Jesusca cutinllatajmi Jordán yacu caishuj ladoman rishpa chaipi saquirirca. Chaipimi Juanca callaripica bautizaj carca.
41 Achca gentecunami Jesustaca ricunaman rircacuna. Paicunapura parlanacushpaca: “Juanca ima milagrota mana rurarcachu. Ashtahuanpish cai runamanta Juan imalla huillashcacunaca mana llullachu cashca” nircacunami.
42 Chaipi caj gentecunaca achcacunami Jesuspi crircacuna.
Notacuna
^ O “almata”. “Alma” shimita huasha diccionariopi ricui.
^ O “almata”. “Alma” shimita huasha diccionariopi ricui.
^ O “almata”. “Alma” shimita huasha diccionariopi ricui.
^ O “supai”.
^ Griego rimaipica: “ñahuicunata mana pascanmanchu” ninmi.
^ “Diospaj huasita mingashcata yuyarina fiesta” shimita huasha diccionariopi ricui.
^ “Diospaj huasi” shimita huasha diccionariopi ricui.
^ O “tandallami”.
