Juan 14:1-31
14 Jesusca cashnapishmi nirca: “Cancunapaj shungupica ama yallitaj sustarichijchu. Ashtahuanpish Diospi feta churashcata, ñucapi feta churashcatapish ricuchichij.
2 Ñuca Yayapaj huasipica maipi causanaca achcami tiyan. Mana tiyashca cajpica cancunamanca mana chashna huillaimanchu carcani. Ashtahuanpish cancuna maipi causanata allichinamanmi rigrini.
3 Ñuca rishpaca maipi causanata cancunapaj allichishpami tigramusha. Ñuca maipi cashcapi cancunapish cachunmi cancunataca ñucahuan pushasha.
4 Ñuca maiman ricuj ñantaca cancunaca rijsinguichijmi” nircami.
5 Chaimi Tomasca: “Amito, can maiman rigrishcataca mana yachanchijca. ¿Ima shinataj ñantaca rijsishunyari?” nirca.
6 Shina nijpimi Jesusca cashna cutichirca: “Ñucami ñanpish, mana llullapish, causaita cujpish cani. Maijanpish Yayapajmanca mana cꞌuchuyai tucunchu. Ñucallamantami cꞌuchuyai tucun.
7 Ñucata rijsishpaca ñuca Yayatapish rijsinguichijmi. Paitaca cunanmantami ña rijsinguichij, ña ricushcanguichij” nirca.
8 Chashna nijpimi Felipeca: “Amito, cambaj Yayata ñucanchijman ricuchihuai, chaipimi ñucanchij shungupica cushilla sintirishun” nirca.
9 Chaimi Jesusca cashna nirca: “Felipe, achca tiempotamari cancunahuan cashcani. Chashna jahuachu, ¿ñucataca manaraj rijsingui? Ñucata ricujca ñuca Yayatapishmi ricushca. Shinaca ¿imamantataj ‘Cambaj Yayata ñucanchijman ricuchi’ ninguiyari?
10 ¿Yayapish ñucahuan shuj shinalla cashcata, ñucapish Yayahuan shuj shinalla cashcataca manachu cringui? Ñuca nishcacunaca mana ñuca yuyaimantachu. Ashtahuanpish ñucahuan caj Yayami paipaj munaita ruracun.
11 Yayapish ñucahuan shuj shinalla cashcata, ñucapish Yayahuan shuj shinalla cashcataca crichijyari. Shinapish ñuca nishcata mana crishpaca ñuca rurashcacunata ricushpa crichijyari.
12 Cancunamanca mana llullanichu. Ñucaca Yayapajmanmi rigrini. Maijanpish ñucapi feta charishcata ricuchijca ñuca rurashcacunatami ruranga. Ashtahuanpish paica ñuca rurashcacunatapish yallimi ruranga.
13 Shinallataj Churimanta Yaya jatunyachishca cachunmi cancuna ñuca shutipi imata mañajpipish ñucaca cusha.
14 Imata ñuca shutipi cancuna mañajpica ñucaca rurashallami.
15 Ñucata cꞌuyashpaca cancunaca ñuca mandashcacunatami cazunguichij.
16 Chaimi ñucallataj ñuca Yayata mañajpi paica cancunamanca shujtaj ayudajta* cunga. Chai ayudajmi cancunahuanca huiñaita canga.
17 Chai ayudajca Diospaj mana llulla espiritumi. Cai pacha gentecunaca chai espirituta mana ricushcamanta, mana rijsishcamantami mana chasqui tucuncuna. Ashtahuanpish cancunahuan cashcamanta, cancunapi tiyashcamantami chai espiritutaca rijsinguichij.
18 Cancunataca manataj shitashpa* saquishachu. Cancunapajmanca tigramushami.
19 Cai pacha gentecunaca ñallami ñucataca mana ashtahuan ricungacuna. Ashtahuanpish cancunaca ñucataca ricunguichijmi. Ñuca causacushcamantami cancunapish causanguichij.
20 Chai punllami ñucapish ñuca Yayahuan shuj shinalla cashcata, cancunapish ñucahuan shuj shinalla cashcata, ñucapish cancunahuan shuj shinalla cashcataca yachanguichij.
21 Ñuca mandashcacunata chasquishpa pajtachijca ñucatami cꞌuyan. Ñucata cꞌuyajtaca ñuca Yayapishmi cꞌuyan. Ñucapishmi paitaca cꞌuyasha, ñucata alli ricuchunpishmi saquisha” nircami.
22 Chaimi Judasca: “Amito, ¿ima nishpataj cai pacha gentecunaman mana ricurishpa, ñucanchijlla canta alli ricuchun saquigringui?” nirca. (Paica mana Judas Iscariotechu carca).
23 Chashna nijpimi Jesusca cashna cutichirca: “Maijanpish ñucata cꞌuyajca ñuca nishca shimicunatami cazunga. Ñuca Yayapish paitaca cꞌuyangami. Ñucapish, ñuca Yayapish paipajman shamushpami paihuan causashun.
24 Ñuca nishca shimicunata mana cazujca ñucataca mana cꞌuyanchu. Cancuna uyashca shimicunaca mana ñucapajchu, ashtahuanpish ñucata cachaj Yayapajmi.
25 Cancunahuan cashparajmi caicunataca huillani.
26 Shinapish ñuca shutipi, ñuca Yaya cachashca espíritu santomi cancunataca ayudanga. Chai espiritumi tucuita cancunamanca yachachinga. Ñuca ima nishcatapish tucuitami yuyachinga.
27 Cancunamanca sumaj causaitami saquini. Ñuca sumaj causaitami cuni. Chaimanta cancunapaj shungupica ama manchaichijchu, ama sustarichijchu. Cai pacha gentecunaca chai sumaj causaitaca mana cui tucuncunachu.
28 Cancunaca: ‘Ñucaca rigrinimi, cancunapajman cutin tigramushami’ ñuca nishcatami uyarcanguichij. Ñucata cꞌuyashpaca ñuca Yayapajman rijpica cushicunguichijmanmi. Ñuca Yayaca ñucata yallimi.
29 Chashna tucujpi ñuca nishca shimicunata crichunmi, manaraj chashna tucujpi cancunamanca huillashcani.
30 Cai pachata mandaj shamucushcamantami cancunahuanca ña mana ashtahuan parlasha. Shinapish paica ñucataca mana mandai tucunchu.
31 Ashtahuanpish cai pacha gentecuna ñuca Yayata cꞌuyashcata yachachunmi pai mandashcatataj rurani. Jatarichij, caimanta jacuchij.
