Juan 5:1-47
5 Chai qꞌuipaca judiocunapaj fiestami* tiyarca. Jesuspishmi Jerusalenman huichiyarca.
2 Jerusalenpica Ovejacunapaj Pungu cꞌuchupimi shuj cucha yacu tiyan. Chai yacuca hebreo rimaipica Betzata shutimi can. Chai yacu muyundijpica pilarcunayuj pichca corredorcunami tiyan.
3 Chaipica achca ungushcacunapish, mana ricujcunapish, cojocunapish, chaquicunata maquicunata mana cuyuchi tucujcunapishmi* pambapi siricurcacuna.
4 *——
5 Chaipica 38 huatacunata ungushca shuj runapishmi carca.
6 Jesusca chai runa siricujta ricushpa, achca huatacunata ungushca cashcata yachashpami: “¿Alliyasha ninguichu?” nishpa tapurca.
7 Chashna nijpimi ungushca runaca: “Amito, yacu cuyurijpi ñucata cucha yacuman uriyachichunca pi mana tiyanca. Ñuca yaicusha ningacamaca shujtajmi mishashpa yaicunlla” nirca.
8 Chashna nijpimi Jesusca: “¡Jatari! Cambaj camillata apashpa puri” nirca.
9 Shina nijpimi chai runaca chai rato alliyarca. Chashna alliyashpami paipaj camillata apashpa puri callarirca.
Chai punllaca sabadomi carca.
10 Chaimi judiocunaca chai alliyashca runata ricushpaca: “Cunanca sábado punllamari. Cai punllapica camillataca mana aparinachu cangui” nircacuna.
11 Shina nijpimi paica: “Ñucata alliyachij runami ‘Jatari cambaj camillata apashpa puri’ nirca” nircami.
12 Chashna nijpimi paicunaca: “¿Pitaj cantaca ‘Camillata apashpa puri’ nircari?” nishpa tapurcacuna.
13 Shinapish alliyashca runaca chaipi caj achca gentecunapaj chaupipi Jesús chingarishpa rishcamantami paita pi alliyachishcataca mana yacharca.
14 Chai qꞌuipami Jesusca Diospaj huasipi chai runahuan tuparca. Chaipi tupashpaca: “Cunanca ñamari alliyashcangui. Juchata ama rurashpa catingui. Ñataj ashtahuan llaqui tucunguiman” nircami.
15 Chai runa chaimanta rishpaca Jesús paita alliyachishcatami judiocunaman huillarca.
16 Chaimi judiocunaca sábado punllapi gentecunata alliyachicujta ricushpa Jesustaca cꞌamishpa llaquichi callarircacuna.
17 Ashtahuanpish Jesusca: “Ñuca Yayaca cunancamami trabajashpa caticun. Chaimantami ñucapish trabajashpa caticuni” nishpami cutichirca.
18 Chaita uyashpacarin judiocunaca huañuchingapajmi Jesustaca ashtahuan mashcai callarircacuna. Shinallataj sábado punllata Jesús mana pajtachishcamanta, Dios shina tucushpa Diostapish ñuca Yayami nishcamantami chashna mashcacurcacuna.
19 Chaimi Jesusca paicunamanca cashna cutichirca: “Cancunamanca manataj llullanichu. Churica paipaj munaimantaca imatapish mana rurai tucunchu. Ashtahuanpish Yaya imata rurashcata ricushpami paipish ruran. Yaya tucuita rurashcatami Churipish chashnallataj ruran.
20 Yayaca paipaj Churitaca cꞌuyanmi. Chaimantami Churimanca tucui pai imalla rurashcata ricuchin. Shinallataj caitapish yalli ruraicunatami ricuchinga. Chaita ricushpami cancunaca mancharishca saquiringuichij.
21 Ima shinami Yayaca huañushcacunaman causaita cushpa causachin. Chashnallatajmi Churipish pai munashcacunamanca causaita cun.
22 Yayaca ni pita mana juzganchu. Ashtahuanpish tucuicunata juzgachunca Churimanmi mingashca.
23 Yayata shinallataj Churitapish tucuicuna jatunyachichunmi chashna rurashca. Churita mana jatunyachijca paita cachaj Yayatapish mana jatunyachinchu.
24 Cancunamanca manataj llullanichu. Ñuca nishca shimicunata uyajpish, ñucata cachajta crijpish huiñai causaitami charinga. Paica mana juzgashcachu canga, ashtahuanpish huañuimantaca causaimanmi pasachishca canga.
25 Cancunamanca manataj llullanichu. Diospaj Churi rimashcata huañushcacuna uyana punllaca chayamucunmi. Chai punllaca ñamari chayamushca. Chaipica paita uyashpa cazujcunaca causangacunami.
26 Yayaca causaita cungapajmi poderta charin. Shinallataj Churimanpish causaita cuchunmi poderta cushca.
27 Runapaj Churi cashcamantami juzgangapajpish paimanca poderta cushca.
28 Chashna nishcamanta ama mancharichijchu. Pambana jutcucunapi* cajcunaca tucuicunami Diospaj Churi rimashcata uyangacuna. Chai punllaca ñamari chayamucun.
29 Chaipimi paicunaca causaringacuna: allita rurajcunaca huiñai causaita charingapajmi causaringacuna. Cutin mana allita rurajcunaca* juzgashca cangapajmi causaringacuna.
30 Ñuca munaimantaca imatapish mana rurai tucunichu. Yaya nishca shinami gentecunataca juzgani. Ñuca munaitaca mana ruranichu, ashtahuanpish ñucata cachaj Yayapaj munaitami rurani. Chaimantami cashcata rurashpa juzgani.
31 Ñucallamantataj ñuca huillajpica, ñuca huillashcaca mana valinmanchu.
32 Ashtahuanpish shujtajmi ñucamantaca huillan. Pai mana llullashpa ñucamanta huillashcataca yachanimi.
33 Cancunaca runacunatami Juanpajman cacharcanguichij. Paimi mana llullashpa ñucamantaca huillarca.
34 Shinapish shuj runa ñucamanta huillachunca mana minishtinichu. Ashtahuanpish cancuna quishpirichunmi caicunamantaca parlani.
35 Chai runaca japichishca lámpara shinami achijnicurca. Cancunaca asha tiempollatami chai lámpara achijyachichun saquishpa achcata cushicurcanguichij.
36 Yayamanta ñuca shamushcatami Juanca gentecunaman huillarca. Shinapish ñucata cachaj Yayapaj ruraicunata pajtachishpami Yaya ñucata cachashcata ñucaca ricuchini.
37 Ñucata cachaj Yayallatajmi ñucamantaca huillashca. Cancunaca pai rimashcatapish mana uyashcanguichijchu, paipaj ñahuitapish mana ricushcanguichijchu,
38 pai cachashca huillajtapish mana crircanguichijchu, chaimantami Diospaj shimitaca cancunapaj shungupi mana charinguichij.
39 Cancunaca huiñai causaita charishun yuyashpami Dios quillcachishcacunataca yachashpa catinguichij. Shinapish chai quillcachishcacunallapitajmi ñucamantaca huillan.
40 Chashna huillajpipish huiñai causaita charingapajca mana ñucapajman shamushun ninguichijchu.
41 Gentecuna ñucata jatunyachichunca mana munanichu.
42 Shinapish cancuna Diosta mana cꞌuyashcataca allimi yachani.
43 Ñucaca ñuca Yayapaj shutipimi shamurcani. Shinapish cancunaca ñucataca mana chasquinguichijchu. Ashtahuanpish paipaj quiquin munaillamanta shujtaj shamujpica paitaca chasquinguichijmanmi.
44 Cancunaca shujlla Diospaj ñaupajpi alli ricurinata mashcanapaj randica caishuj chaishuj cancunata jatunyachichunmi munanguichij. Chashna rurashpaca, ¿ima shinataj ñucapica cringuichijyari?
45 Yayapaj ñaupajpi cancunata ñuca juchachinataca ama yuyaichijchu, Moisesmi cancunataca juchachicun. Paipimi cancunaca shunguta churanguichij.
46 Moisesca ñucamantami quillcarca. Pai quillcashcata crishpaca ñucatapish cringuichijmanmi.
47 ¿Pai quillcashcata mana crishpaca ima shinataj ñuca nishcatacarin cringuichijyari?” nircami.
Notacuna
^ Chaica Pascua fiestami cashcanga.
^ O “chaquicuna maquicuna chaquirishcacunapishmi”.
^ Cai versoca ñaupa quillcachishcacunapica mana ricurinchu. Huaquin Bibliacunapi ricurijpipish chai yuyaicunataca Diosca mana quillcachishcachu.
^ “Pambana jutcu” shimita huasha diccionariopi ricui.
^ Causarishca huasha paicunapaj rurashcacunamantami parlacun.
