Mateo 8:1-34
-
Jesusca lepra ungüihuan cajtami alliyachirca (1-4)
-
Soldadocunata mandaj feta charishcamanta (5-13)
-
Jesusca Capernaúm llajtapimi achca ungushcacunata jambirca (14-17)
-
Jesusta ima shina catinamanta (18-22)
-
Huairapish, yacupish casijlla tucushcamanta (23-27)
-
Jesusca demoniocunataca cuchicunapajmanmi cacharca (28-34)
8 Jesús urcumanta uriyajpica achca gentecunami paita catircacuna.
2 Chaipica lepra* ungüihuan caj runa cꞌuchuyashpami, Jesuspaj ñaupajpi cungurishpaca: “Amito, can jambisha nishpaca ñucata jambihuai” nirca.
3 Chashna nijpimi Jesusca paipaj maquita chutashpa chai runata tuparishpaca: “Ari jambisha ninimi. Alli tucuilla”* nirca. Chashna nijpica ñapish chai runaca lepra ungüimanta alliyarcallami.
4 Chai runata alliyachishpaca Jesusca: “Ñataj piman huillanguiman. Ashtahuanpish sacerdotecunapaj ñaupajpi ricurigri. Shinallataj Moisesman cushca leypi nishca shinaca shuj ofrendata cugri. Chashnami paicunaca can alliyashcata yachangacuna” nircami.
5 Capernaúm llajtaman Jesús chayajpica 100 soldadocunata mandajmi Jesuspajman cꞌuchuyashpa paita ayudachun rogarirca.
6 Paica: “Amito, ñucata sirvijmi parálisis ungüihuan mana jatari tucushpa achca nanaihuan huasipi sufricun” nircami.
7 Chashna nijpimi Jesusca: “Chaiman chayashpami paitaca jambisha” nirca.
8 Jesús chashna nishcata uyashpami 100 soldadocunata mandajca: “Amito, ñucaca imallapish cajpichu canca ñuca huasimanca yaicunguiyari. Ñucata sirvij runata alliyachun nishpa mandai. Can chashna mandajpica paica alliyangallami.
9 Ñucapish mandajcuna mandashcallami cani. Shinallataj soldadocunata mandajmi cani. Shuj soldadota ‘¡Ri!’ nijpica paica rinllami. Cutin caishuj soldadota ‘¡Shamui!’ nijpica paica shamunllami. Ñucata sirvijta ‘¡Caita rurai!’ nijpica paica ruranllami” nircami.
10 Chashna nijta uyashpami Jesusca achcata cushicushpa, paihuan cajcunamanca: “Cancunamanca mana llullanichu. Cai runa shina sinchi feta charijtaca Israel llajtapica manataj ricushcanichu.
11 Caitapishmi nini: Achcacunami inti llujshin ladomanta, inti yaicun ladomantapish shamungacuna. Paicunaca jahua pacha Gobiernopimi* Abrahanhuan, Isaachuan, Jacobhuan micungapaj tiyaringacuna.
12 Ashtahuanpish jahua pacha Gobiernopi cangapaj Dios cayashcacunarajmi canlla amsaman shitashca cangacuna. Chaipimi huacashpa paicunapaj quirucunapish caniringacuna” nircami.
13 Chashna nishca qꞌuipami Jesusca, 100 soldadocunata mandajtaca: “Huasiman tigrailla. Can crishca shinallataj can mañashca pajtarichun” nirca. Chashna nijpica chai ratomi paita sirvijca alliyarca.
14 Jesusca Pedropaj huasiman yaicushpaca, Pedropaj suegra fiebrehuan ungushca camapi siricujtami ricurca.
15 Ungushcapaj maquita Jesús tuparijpica fiebreca paimanta anchurcallami. Chai qꞌuipami chai huarmica jatarishpa micunata Jesuspaj rurai callarirca.
16 Ña tutayamucujpica, gentecunaca demonio* japishca achcacunatami Jesuspajman pushamurcacuna. Chaipimi Jesusca shuj shimita nishpalla demoniocunataca paicunamanta llujshichirca. Shinallataj tucui laya ungüihuan cajcunatapishmi jambirca.
17 Profeta Isaiasman Dios huillachishca pajtarichunmi chashna tucurca. Isaiasca: “Ñucanchij ungüicunataca paimi alliyachirca, ñucanchij llaquicunatapish paimi anchuchirca” nircami.
18 Jesusca paipaj muyundijpi achca gentecuna cajta ricushpami paita catijcunataca: “Galilea mama cucha caishuj ladoman richij” nishpa mandarca.
19 Chaipimi mandashcacunata quillcaj shuj runa Jesuspajman cꞌuchuyashpaca: “Yachachij, can maiman rijpipish canhuanmi ñucaca risha” nirca.
20 Chashna nijpimi Jesusca: “Zorrocunapish causangapaj jutcuta charinmi. Jahuata purij pajarocunapish paicunapaj tazinta charinmi. Shinapish Runapaj Churica maipi samarinallatapish mana charinchu” nirca.
21 Qꞌuipaca paita catijcunapuramanta shujca: “Amito, ñuca yayataraj puntapica pambanaman richun saquihuai” nircami.
22 Chashna nijpimi Jesusca: “Ñucata catinataca ama saquichu. Huañushcacuna paicunapaj huañushcacunata pambachun saquilla” nirca.
23 Jesús barcoman huichiyajpica, paita catijcunapishmi paihuan rircacuna.
24 Ña mama cuchata ricujpica ñapishmi achca huaira jatarishpa yacuta caiman chaiman cuyuchirca. Chaimi yacuca barcopi jundai callarirca. Shinapish Jesusca dormicurcallami.
25 Jesusta catijcuna paipajman cꞌuchuyashpaca: “¡Amito, ñucanchijta ayudahuai! ¡Huañugrinchijmari!” nishpami rijchachircacuna.
26 Chaimi Jesusca: “Ashalla feta charij runacuna, ¿imamantataj yallitaj mancharishca canguichij?” nirca. Chashna nishcahuanmi Jesusca jatarishpa huairatapish, mama cuchatapish sinchita rimarca. Shina rimajpimi tucui casijlla tucurca.
27 Chaita ricushpami paita catijcunaca: “¿Cai runaca pitaj canyari? Paitaca huairapish, mama cuchapish cazunllamari” nishpa mancharircacuna.
28 Jesusca mama cuchata pasashpaca Gadara llajtamanmi chayarca. Chaipimi demonio japishca ishqui runacunaca panteonmanta llujshishpa Jesusta tupanaman shamurcacuna. Chai ishqui runacuna yallitaj millaicuna cajpimi, chai ñanta purinataca ni pi mana munarcacuna.
29 Paicunaca caparirishpami: “Diospaj Churi, ¿imapajtaj shamushcanguiyari? ¿Llaquichina tiempo manaraj pajtajpichu ñucanchijtaca llaquichinaman shamushcangui?” nircacuna.
30 Paicunamanta asha carullapica achca cuchicunami micucurcacuna.
31 Chaimi demoniocunaca: “Cai runacunamanta ñucanchijta llujshichishpaca, chai achca cuchicunapi yaicuchun cachahuai” nishpa rogarircacuna.
32 Chashna nijpimi Jesusca: “¡Richij!” nirca. Chaimi demoniocunaca chai runacunamanta llujshishpa cuchicunapi yaicurcacuna. Shina yaicujpimi chai tucui cuchicunaca cꞌacata* huashicushpa mama cuchapi huañurcacuna.
33 Chaimi cuchicunata cuidaj runacunaca llajtaman callpashpa rircacuna. Chaipica imalla tucushcatami tucuita huillarcacuna, demonio japishca runacunahuan ima tucushcatapishmi huillarcacuna.
34 Chashna huillajpimi chai llajtamantaca tucuicuna Jesusta mashcanaman llujshircacuna. Jesushuan tupashpaca paicunapaj llajtamanta richunmi rogarcacuna.
Notacuna
^ “Lepra” shimita huasha diccionariopi ricui.
^ O “Limpio saquirilla”.
^ Caipica Diospaj Gobiernomantami parlacun.
^ O “supai”.
^ O “ucu quinrita”.
