Santiago 3:1-18
3 Ñuca huauquicunalla, cancunapuramantaca mana achcacunachu yachachijcuna cana canguichij. Cancuna yachashca shinaca Diosca ñucanchijtami caishujcunatapish yalli sinchita juzganga.
2 Tucuicunami achca cutin pandarinchij. Maijanpish pai rimashca shimicunahuan mana nunca pandarijca jucha illaj runami. Paipaj tucui cuerpotapish jarcari tucujmi.
3 Ñucanchijta cazuchunca caballocunapaj shimipimi frenota churanchij. Shinallataj ñucanchij maiman risha nishcamanmi pushai tucunchij.
4 Barcocunapipish yuyaichij: barcocuna jatun cajpipish, sinchi huaira cuyuchijpipish barcota purichij runaca shuj uchilla timonhuanmi pai maiman risha nishcaman pushan.
5 Chashnallatajmi cꞌalluhuanpish tucun. Cuerpomanta ashtahuan uchilla parte cashpapish yallitaj alabarinllami. Ninaca uchilla cashpapish shuj jatun bosquetami rupachi tucun ¿nachu?
6 Cꞌallupish nina shinami. Ñucanchij cuerpopi caj tucui miembrocunamantaca cꞌallumi mana allita rurashpa tucui cuerpota mapayachin. Gehena* tucuchij shinami shuj runapaj causaitapish chingachi tucun.
7 Tucui laya sacha animalcunapish, pajarocunapish, llucashpa purij animalcunapish, yacupi causaj animalcunapish mansoyachinallami can. Gentecunami chai animalcunataca mansoyachi tucuncuna.
8 Shinapish cꞌallutaca ni maijan runa mana jarcai tucunchu. Cꞌalluca mana jarcaipaj, llaquichijmi can. Huañuchij venenohuan jundami.
9 Cꞌalluhuanmi Yaya Jehová* Diosta alabanchij. Chai cꞌallullahuantajmi “Diosman rijchaj” rurashca runacunatapish maldicinchij.
10 Chai shimillamantatajmi bendicianapish, maldicinapish llujshin.
Ñuca huauquicunalla, caicunata ruranaca mana allichu.
11 Pugyu yacumantaca mishqui yacupish, jayaj yacupish mana llujshinchu ¿nachu?
12 Ñuca huauquicunalla, higo yuraca aceitunastaca mana pꞌucui tucunchu, uva yurapish higocunataca mana pꞌucui tucunchu ¿nachu? Chashnallataj shuj pugyumantaca cachi yacupish, mishqui yacupish mana llujshi tucunchu.
13 ¿Cancunapurapica alli yachaj, alli intindij runa tiyanchu? Chashna cajpica alli causashpami alli yachaimanta manso shunguhuan tucuita ruracushcata ricuchina can.
14 Shinapish yallitaj envidiashpa, cancunapaj shungupi pꞌiñarishpaca* alli yachajcunami canchij nishpa ama jatun tucushpa purichijchu. Chashna rurashpaca llullacunguichijmi.
15 Caica mana jahua pachamanta shamuj alli yachaichu. Ashtahuanpish cai pachamanta, animalcuna shina cajcunamanta, demoniocunamantami shamun.
16 Maipimi envidianacuicuna, pꞌiñanacuicuna* tiyan chaipica maipishcachun causaipish tucui laya mana alli ruraicunapishmi tiyanga.
17 Shinapish jahua pachamanta shamuj alli yachaita charij runaca puntapica chuya shungumi can. Chai qꞌuipaca sumajta causaj, intindij, utca cazuj, llaquij, alli ruraicunata ruraj, tucuicunata igual ricujmi can, mishqui shimi jayaj shunguca mana canchu.
18 Shujtajcunahuan alli apanacuj gentecunaca sumajta causanatami mashcancuna. Chashnami cashcata rurajcuna can.
Notacuna
^ “Gehena” shimita huasha diccionariopi ricui.
^ “Jehová” shutita huasha diccionariopi ricui.
^ Caitaca “cancunapajlla imatapish ashtahuan charinata munashpaca” nishpapishmi traducishcacuna.
^ Caitaca “imatapish ashtahuan charina munaicuna” nishpapishmi traducishcacuna.
