Santiago 4:1-17
4 ¿Cancunapurapica maimantataj macanacuicuna, pꞌiñanacuicunaca shamun? ¿Manachu cancunapaj shungu ucupi macanacucuj aicha munaicunamanta shamun?
2 Cancunaca imata munashpapish mana charinguichijchu. Huañuchishpa, shujtajcunapajta munashpami catinguichij. Shinapish imata munashcataca mana japinguichijchu. Pꞌiñanacushpa, macanacushpami catinguichij. Mana mañashcamantami imata mana charinguichij.
3 Mañashpapish mana chasquinguichijchu. Mana allicunata rurangapaj, cancunapaj aicha munaicunata rurangapaj mañashcamantami mana chasquinguichij.
4 Huainayajcuna, ¿cai pachapaj amigo cajcuna Diospaj enemigocuna cashcataca manachu yachanguichij? Maijanpish cai pachapaj amigo tucusha nijca Diospaj enemigomi tucucun.
5 Dios quillcachishcapica: “Ñucanchij shungupi envidiana munai tiyashcamantami caita chaita ashtahuan munashpa catinchij” ninmi. ¿Chai quillcachishcapi nishca yangamanta cashcatachu yuyanguichij?
6 Shinapish Dios yallitaj llaquij cashcata ricuchishcaca ñucanchij shungutapish yallimi. Chaimantami quillcachishcapica: “Diosca jatun tucushcacunahuanca mana cushicunchu. Ashtahuanpish humilde gentecunamanmi pai yallitaj llaquij cashcata ricuchin” ninmi.
7 Chaimanta Diosta cazuichij. Shinapish Diablopaj contra shayarichij. Chashna rurajpica Diabloca cancunamanta caruyangallami.
8 Diospajman cꞌuchuyaichij paipish cancunapajman cꞌuchuyangami. Juchayujcuna maquicunata maillarij shina mana allicunata ruranata saquichij. Ishqui yuyaiyujcunapish cancunapaj shunguta chuyayachichij.
9 Llaquilla caichij, nanarichij, huacaichij. Asinapaj randica huacanami canguichij. Cushilla canapaj randica llaquillami cana canguichij.
10 Jehová* Diospaj ñaupajpica humildecuna caichij. Paimi cancunataca jatunyachinga.
11 Huauquicuna, caishujmanta chaishujmanta mana allita rimanata saquichij. Maijanpish shuj huauquita mana allita rimashpa mana cashpaca paipaj huauquita juzgashpaca leymantami mana allita riman, leytapishmi juzgan. Canca leyta juzgashpaca leyta pajtachijca mana canguichu. Ashtahuanpish shuj juezmi cangui.
12 Diosllami Leyta cujpish, Juezpish can. Paillami quishpichi tucun mana cashpaca tucuchi tucun. Shinapish canca, ¿shujtajcunata juzgangapajca pitaj canguiyari?
13 Uyaichij, cancunamanta maijancunaca “Cunan cashpa, caya cashpami chai llajtaman rishun, chaipimi shuj huatata pasashun, chaipica negociocunatami rurashun, cullquitapishmi ganashun” ninguichijmi.
14 Shinapish caya punlla cancunapaj causaihuan ima tucunataca mana yachanguichijchu. Cancunapaj causaica asha tiempota ricurishpa qꞌuipaman chingarij pꞌuyu shinallami.
15 Chaipaj randica cancunaca “Jehová* Diospaj munai cajpica causashunmi, caita o chaitami rurashun” ninami canguichij.
16 Shinapish cunanca cancunaca jatun tucushpami cancunallataj alabaricunguichij. Chashna alabarinaca mana allichu.
17 Maijanpish ima alli cashcata ruranata yachashca jahua mana rurajca ñami juchata ruracun.
Notacuna
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
