1. ¿Imamantataj angelcunamanta yachana canchij?

ANGELCUNACA Diospaj familia partemi can. Chaimantami Job 38:7-pica ‘Diospaj churicuna’ nin. Diosca angelcunamanta yachachunmi munan. ¿Angelcunaca imatataj rurancuna? ¿Ñaupa tiempopica ima shinataj gentecunata ayudarcacuna? ¿Cunan tiempopipish ayudai tucuncunachu? (Nota 8-ta ricui).

2. ¿Angelcunataca pitaj rurarca? b) ¿Mashna angelcunataj tiyan?

² Puntapica angelcunata pi rurashcatami yachana canchij. Jehová Diosca Jesusta rurashca qꞌuipami jahua pachapi tucui tiyashcacunata, angelcunata rurarca. Shinallataj cai pachapi tucui imalla tiyashcacunatapishmi rurarca (Colosenses 1:16). ¿Mashna angelcunatataj Diosca rurarca? Bibliapica achca millones angelcuna tiyashcatami nin (Salmo 103:20; Apocalipsis 5:11).

3. ¿Dios Allpata rurajpica angelcunaca ima shinataj sintirirca?

³ Bibliapica, Diosca Allpata manaraj rurashpami angelcunata rurarca ninmi. Jehová Dios Allpata rurajpica ¿angelcunaca ima shinataj sintirirca? Job libropica achcatami cushicurcacuna ninmi. Callaripica tucui angelcunami shuj shinalla Diosta sirvijcuna carca (Job 38:4-7).

4. ¿Angelcuna gentecunamanta preocuparij cashcataca ima shinataj yachanchij?

⁴ Angelcunaca gentecuna alli causachun, Diospaj munai cai Allpapi pajtarichunmi munancuna (Proverbios 8:30, 31; 1 Pedro 1:11, 12). Adán y Eva Diospaj contra  tucujpica angelcunaca llaquillami sintirishcangacuna. Cunan punllapi achca gentecuna Diosta mana cazujpicarin ashtahuanmi llaquilla cangacuna. Pero maijan juchamanta arrepintirishpa Diospajman cutirijpica achcatami cushicuncuna (Lucas 15:10). Jehová Diosca paita sirvijcunataca angelcunahuanmi cuidan (Hebreos 1:7, 14). Huaquin ejemplocunata ricushun.

5. ¿Ñaupa tiempopi Diosta sirvijcunataca angelcunaca ima shinataj ayudarca?

 ⁵ Lotpish paipaj familiapish Sodoma y Gomorra llajtapi ama huañuchunmi Diosca angelcunata cachashpa chaimanta llujshichirca (Génesis 19:15, 16). Shinallataj profeta Danielta leoncuna causana jutcupi shitajpica, shuj angelmi leoncunapaj shimita huichcashpa Danielta salvarca (Daniel 6:22). Apóstol Pedro prezupi cajpipish Diosca shuj angelta cachashpami chaimanta llujshichirca (Hechos 12:6-11). Jesús bautizarishca qꞌuipapish angelcunami paita ayudangapaj shamurcacuna (Marcos 1:13). Shinallataj Jesús manaraj huañujpimi shuj ángel shamushpa llaquita apachun paita sinchiyachirca (Lucas 22:43).

6. a) ¿Diosta sirvijcunata angelcuna cuidacushcataca ima shinataj yachanchij? b) ¿Ima tapuicunamantataj yachashun?

⁶ Angelcunaca gentecunapaj ñahuipica ña mana ricurinchu. Pero Yaya Diosca paita sirvijcunataca angelcunahuanmi ayudashpa catin. Salmo 34:7-pica: “Mandaj Diosta manchajcunataca, paipaj angelmi muyundijta cuidan” ninmi. Pero, ¿imamantataj angelcuna cuidachun minishtinchij? Ñucanchijtaca achca poderta charij enemigocunami llaquichisha nincuna. ¿Chai enemigocunaca picunataj can? ¿Ima shinataj llaquichisha nincuna? Caita intindingapajca Adanta, Evata Dios rurashca qꞌuipa ima pasashcata yachashun.

7. ¿Evata pandachishca punllamantaca Diabloca imatataj rurashca?

⁷ Capítulo 3-pi yachashca shinaca shuj angelmi Diospaj contra tucushpa gentecunata mandasha nirca. Chai angelca Diablo, Satanás shutimi can (Apocalipsis 12:9). Diabloca gentecunapish Diospaj contra tucuchunmi munarca. Evata pandachishca punllamantaca  casi tucui gentecunatami pandachishca. Pero, Abel, Enoc, Noé shinami huaquin gentecunaca Diosta tucui shunguhuan sirvishpa catishcacuna (Hebreos 11:4, 7).

8. a) ¿Huaquin angelcunaca ima shinataj demoniocuna tucurca? b) ¿Jatun tamyapi ama huañungapajca millai angelcunaca imatataj rurarcacuna?

⁸ Noepaj punllacunapimi huaquin angelcunaca cai Allpaman uriyamushpa huarmicunahuan cazararcacuna (Génesis 6:1, 2-ta liyipai). Pero paicunaca chaitaca mana ruranachu carca (Judas 6). Chai millai angelcuna shinami, achca gentecunapish yallitaj millai tucurcacuna. Chaimantami Yaya Diosca jatun tamyata cachashpa tucui millai gentecunata tucuchirca. Diosta alli sirvijcunallami quishpirircacuna (Génesis 7:17, 23). Jatun tamyapi ama huañungapajmi millai angelcunaca cieloman tigrarca. Bibliapica chai millai angelcunataca “supaicuna” o demoniocuna ninmi. Paicunaca Diablopaj parte tucushpami, Diablo paicunata mandachun saquirca (Mateo 9:34).

9. a) ¿Demoniocuna cieloman tigrajpica Yaya Diosca imatataj rurarca? b) ¿Cunanca imatataj yachagrinchij?

⁹ Demoniocuna cieloman tigrajpica Yaya Diosca paipaj familia parte cachun ña mana saquircachu. Demoniocunaca ña mana gentecuna shina aichayuj, tulluyuj cai tucuncunachu. Pero ‘tucui cai pachapi causajcunatami umashpa’ catincuna (Apocalipsis 12:9; 1 Juan 5:19). Cunanca gentecunata ima shina pandachij cashcata yachashun (2 Corintios 2:11-ta liyipai).

10. ¿Demoniocunaca ima shinataj gentecunata pandachin?

¹⁰ Ima shinami shuj runa tucui laya trampacunata churashpa animalcunata japin, chashnallatajmi demoniocunapish  tucui laya trampacunata churashpa gentecunata pandachin (nota 26-ta ricui). Por ejemplo, huaquin gentecunaca demoniocunahuanmi directo parlancuna. Cutin, maijancunaca adivinopajman o yumbopajman rishpami demoniocunahuan parlancuna. Pero Jehová Diosca, demoniocunahuan chagrurishca ruraicunamantaca caruyaichij ninmi (Gálatas 5:19-21).

11. a) ¿Shamuj punllacunapi ima tucunata adivinangapajca maijancunaca imatataj rurancuna? b) ¿Adivinación ruraicunamantaca imamantataj caruyana canchij?

¹¹ Maijan gentecunaca shamuj punllacunapi ima tucunata yachasha nishpami cuyita, lulunta, velata utilizancuna. Chashna rurashpami supaicuna pandachichun saquicuncuna. Paicunaca caita ruranaca ima jucha mana canchu nishpachari yuyancuna. Ñucanchijpish chaicunata rurashpaca jatun llaquicunatami charishun. Shuj runa imata adivinashpa parlachunca Diablomi paitaca ayudan. Por ejemplo, Diospaj Shimipica, ‘adivinachij supaimi’ shuj jovencitataca shamuj punllacunapi ima tucunata huillachij carca ninmi (Hechos 16:16-18). Pero apóstol Pablo chai jovencitamanta demoniota llujchijpimi adivinangapaj ña mana poderta charirca.

12. a) ¿Huañushcacunahuanca imamantataj mana parlana canchij? b) ¿Diosta sirvijcunaca imamantataj yanga costumbrecunapi mana participanchij?

¹² Demoniocunaca huañushcacuna causashpa catishcata, paicunahuan parlai tucushcata, ñucanchijta llaquichi tucushcata o ayudai tucushcata yuyachunmi munancuna. Huañushca familiahuan o amigohuan parlasha nishpami maijancunaca brujocunapajman rincuna. Chai brujocunaca huañushca familiacunamantami  ima allita ningacuna. O maipicarin huañushcacuna laya tucushpami rimangacuna. Pero familiacunahuan parlacushca laya yuyachishpapish demoniocunahuanmi parlacuncuna (1 Samuel 28:3-19). Achca veloriocunapica, almitaca causashpami catin nishpami chꞌican chꞌican costumbrecunata rurancuna. Chai yanga costumbrecunata mana rurajpimi ñucanchij familiacuna, vecinocunaca pꞌiñarishpa caruyangacuna. Pero Diosta sirvijcunaca huañushcacuna mana causashpa catij cashcataca allimi yachanchij. Huañushcacunahuanca mana parlai tucunchijchu, peor ima dañotacarin mana rurai tucuncunachu (Salmo 115:17). Chaimantami huañushcacunahuan, demoniocunahuanca mana parlana canchij. Demoniocunapaj ruraicunapipish mana chagrurinachu canchij (Deuteronomio 18:10, 11-ta liyipai; Isaías 8:19).

13. ¿Huaquin gentecunaca picunatataj ña mana manchancuna?

¹³ Demoniocunaca gentecunataca achcatami manchachincuna. Diablopish, demoniocunapish cai Allpapi ‘paicuna munashcata rurana punllacuna ashalla cashcata yachashpami’ gentecunataca achcata llaquichicun (Apocalipsis 12:12, 17). Achca gentecunami ñaupamanca demoniocunata manchajcuna carca. Pero cunanca ña mana manchancunachu. ¿Chaipajca imatashi rurarcacuna?

14. ¿Demoniocunamanta caruyangapajca imatataj rurana canchij?

¹⁴ Bibliapimi demoniocunamanta ima shina caruyanata huillan. Por ejemplo, Éfeso llajtapi causajcuna Diosta manaraj sirvi callarishpaca demoniocunahuanmi parlajcuna carca. Pero chashna parlajcuna  cashpapish ¿ima shinataj demoniocunamantaca anchurircacuna? Hechos 19:19-pica: ‘Yumbocunapish brujianata yachachij librocunata apamushpa tucui gentecunapaj ñaupajpimi rupachircacuna’ ninmi. Diosta sirvinata munashcamantami chashna rupachircacuna. Cunan punllacunapica demoniocunapaj ruraicunaca alli layami ricurin. Pero Diosta sirvishun nishpaca demoniocunahuan chagrurishca ruraicunamantami caruyana canchij. Chaipajca demoniocunamanta parlaj librocunata, revistacunata, peliculacunata, musicacunata, pugllaicunata mana charinachu canchij. Shinallataj mana allicunamanta cuidaringapaj nishpaca lobo chupata, puca puchcata, shujtaj chai laya cosascunata mana charinachu canchij (1 Corintios 10:21).

15. ¿Diablopish, demoniocunapish ama llaquichichunca imatataj rurana canchij?

¹⁵ Éfeso llajtapi Diosta sirvijcunatami apóstol Pabloca, “millai supaicunahuanmi macanacucunchij” nirca (Efesios 6:12). Brujianata yachachij librocunata rupachijpipish, demoniocunaca ashtahuanmi paicunata llaquichisha nircacuna. Demoniocuna ama llaquichichunca ¿imatataj rurana carca? Apóstol Pabloca, “escudota charij shina alli crij caichij” nircami (Efesios 6:16, QC, 1989). Shuj soldado macanacuipi cashpaca, ama ima tucungapajmi shuj escudota churarin. Chashnallatajmi escudota churarishca shina sinchi crij cajpica demoniocunaca ñucanchijta mana llaquichi tucunga. Yaya Dios ayudaj cashcata tucui shunguhuan crishpaca Diablopaj, demoniocunapaj trampacunapi mana urmashunchu (Mateo 17:20).

16. ¿Jehová Diospi tucui shunguhuan cringapajca imatataj rurana canchij?

¹⁶ Bibliata cada punlla liyishpami Yaya Dios ñucanchijta  cuidanataca tucui shunguhuan crishun. Chashna rurajpimi Diablopish, demoniocunapish mana llaquichi tucungacuna (1 Juan 5:5).

17. ¿Demoniocunamanta cuidaringapajca imatataj rurana canchij?

¹⁷ Éfeso llajtapica demoniocunahuan chagrurishca ruraicunami yallitaj tiyarca. Chaimi apóstol Pabloca Diosta sirvijcunataca, demoniocunamanta cuidaringapajca “punllanta Diosta mañaichij” nirca (Efesios 6:18). Cunan tiempopish demoniocunahuan chagrurishca ruraicunami yallitaj cai mundopica tiyan. Chaimantami Jehová Dios ñucanchijta cuidachunca paipaj shutita nombrashpa mañana canchij (Salmo 33:21-ta liyipai). Diablo ama pandachichun nishpa cutin cutin mañajpica Diosca uyangami (Salmo 145:19; Mateo 6:13).

18, 19. a) ¿Diablotapish demoniocunatapish ima shinataj mishai pudinchij? b) ¿Catij temapica imatataj yachashun?

¹⁸ Demoniocunataca mana manchanachu canchij. Paicuna ama llaquichichunca mana alli ruraicunamantami anchurina canchij (Santiago 4:7, 8-ta liyipai). Jehová Diosca demoniocunamantaca ashtahuan yallimi poderta charin. Noepaj tiempopica Diosca ñami demoniocunata castigarca. Shamuj punllapicarin tucuimi paicunataca chingachinga (Judas 6). Demoniocunahuanca mana ñucanchijllachu macanacucunchij. Jehovami paipaj angelcunahuan ñucanchijta ayudacun (2 Reyes 6:15-17). Jehová ayudajpimi Diablotapish demoniocunatapish vencishun (1 Pedro 5:6, 7; 2 Pedro 2:9).

¹⁹ Diablopish demoniocunapish gentecunata achcata llaquichicushcatami yachashcanchij. Pero ¿ima nishpataj Diosca manaraj paicunata tucuchishca? Caitaca catij temapimi yachashun.