1, 2. ¿Picunallataj Diospaj amigocuna carca?

SHUJ alli amigota charisha nishpaca ¿canca pitataj agllanguiman? ¿Manachu canhuan alli apanacuj, alli genio, alli persona cajta agllanguiman?

² Ñaupa tiempomantami Yaya Diospish achca gentecunata paipaj amigo cachun agllashca. Por ejemplo, Abrahammi Diospajca alli amigo carca (Isaías 41:8; Santiago 2:23). Rey Davidpish Diospaj amigomi carca. Chaimantami Yaya Diosca, Davidca “ñuca shungu munashca runami” can nirca (Hechos 13:22). Profeta Danielpish Diospajca “yallitaj cꞌuyashcami” carca (Daniel 9:23).

3. ¿Abrahampish, Davidpish, Danielpish imamantataj Diospaj amigocuna carca?

³ Abrahampish, Davidpish, Danielpish Diosta cazujcuna cashcamanta, humildecuna cashcamantami Diospaj alli amigocuna carca. Yaya Diosca Abrahamtaca, “ñuca mandashcata can cazushcamantami” canca ñuca amigo cangui nircami (Génesis 22:18). Israelitacunapish Diospaj amigocunami carca. Diosca paicunamanca: “Cancunaca ñuca rimashcata cazunguichij. Cancuna cazujpica, cancunapaj Dios cashami. Cancunapish ñuca agllashca runacunami canguichij” nircami (Jeremías 7:23). Canpish Diospaj amigo casha nishpaca mana jatun tucushpami paita cazuna cangui.

4, 5. ¿Jehová Diosca paipaj amigocunataca ima shinataj ayudan?

⁴ Bibliapi nishca shinaca Diosca paita tucui shunguhuan  sirvijcunataca ayudasha ninmi (2 Crónicas 16:9). Jehová Diosca paipaj amigocunamanca, mai ñanta purinataca ñucami intindichisha, ñucami yachachisha ninmi (Salmo 32:8).

⁵ Ñucanchijca achca poderta charij shuj enemigotami charinchij. Paica Diablomi can. Diabloca ñucanchijcuna Diospaj amigo cachunca mana munanchu. Pero Diosta tucui shunguhuan sirvijpica Diabloca mana jarcai tucungachu (Salmo 55:22-ta liyipai). Llaquicunata charishpapish David shinami Diospi confiana canchij. Davidca, ‘Dios ñuca alli ladopi cajpica pi mana cuyuchingachu’ nircami (Salmo 16:8; 63:8). ¿Diabloca ñucanchijta Diosmanta caruyachingapajca imatataj ruran?

6. ¿Diabloca gentecunamantaca imatataj nin?

⁶ Diabloca, ‘Diosca llullami can. Adán Eva paicunallataj imatapish decidichunca mana saquinchu’ nishpa, yangamanta juchachishcatami capítulo 11-pica yacharcanchij. Job libropi nishca shinaca, cunan punllacunapipish Diospaj amigo casha nijcunataca Diabloca chashnallatajmi juchachicun. Diabloca, ‘gentecunaca imata japinaraicullami Diostaca sirvin. Diosta ama cazuchunca pitapish ñucallatajmi pandachi tucuni’ ninmi. Cunanca Jobpaj causaimanta yachashun.

7, 8. a) ¿Diosca imamantataj Job runahuanca alli amigo carca? b) ¿Diabloca Jobmantaca imatataj nirca?

⁷ Jobca Diospaj alli amigomi carca. Paica 3.600 huatacuna huashamanmi causarca. Jobca Yaya Dios mandashcacunata tucuipi cazuj, mana allicunataca pꞌiñajmi carca. Chaimantami Jehová Diosca, ñucata sirvij Job shinaca pi mana tiyanchu nirca (Job 1:8).

⁸ Pero Diabloca Jehová Diostaca: ‘Jobca imata  japinaraicullami cantaca sirvin. ¿Manachu canllataj paitapish, paipaj familiacunandij, tucui imalla charishcacunatapish ama tuparichunllapish nishpa jarcaracungui? Paipaj maquihuan imata rurajpipish achcatamari bendiciangui. Chaimantami paipaj charinacunaca allpapica yallitaj mirarishca. Shina cajpipish cunanca cambaj maquita chutashpa pai imalla charishcacunata quichuiri, manachu cantaca ñahui ñahui millai shimihuan cꞌamin imami’ nircami (Job 1:10, 11).

9. ¿Yaya Diosca Diablo llullacushcata yachashpapish Jobtaca imata rurachuntaj saquirca?

⁹ Diabloca, ‘Dios tucuita cujllapimi Jobca paitaca sirvin, Diosta ama sirvichunca ñucallatajmi pandachi tucuni’ nircami. Jehová Diosca Diablo llullacushcata yachashpapish Jobta llaquichichunmi saquirca. Jobca llaquicunata ahuantashpami Diosta cꞌuyaimanta sirvij cashcata ricuchina carca.

10. a) ¿Diabloca ima shinataj Jobta llaquichirca? b) ¿Jobca achca llaquicunata charishpapish imatataj rurarca?

¹⁰ Diabloca, Job charishca animalcunata shuhuachishpa, huañuchishpami llaquichirca. Qꞌuipaca Jobpaj casi tucui sirvijcunatami huañuchirca. Ultimotaca Jobpaj 10 huahuacunatami huañuchirca. Pero Jobca tucui illajlla saquirishpapish Diosmantaca manataj caruyarcachu. Bibliapica: “Chai tucui llaquicuna shamujpipish, juchata mana rurarcachu, Mandaj Diostapish ima millaita mana rimarcachu” ninmi (Job 1:12-19, 22).

11. a) ¿Diabloca ima shinataj Jobta llaquichishpa catirca? b) ¿Diablo llaquichijpipish Jobca imatataj rurarca?

¹¹ Diabloca Jehová Diostaca: ‘Cunanca cambaj maquita  chutashpa Jobpaj tullupipish, aichapipish unguchiyari. Manachu cantaca cambaj ñaupajllapitaj millaita rimashpa cꞌamin’ nircami. Chai qꞌuipami Diabloca millai ungüihuan Jobtaca llaquichirca (Job 2:5, 7). Diablo chashna llaquichijpipish Jobca “huañungacamami” Diosmantaca manataj caruyashachu nirca (Job 27:5).

12. ¿Diablo llullacushcata Jobca ima shinataj ricuchirca?

¹² Jobca imamanta llaquicunata charishcata, Diablo yangamanta juchachicushcataca mana yacharcachu. Paica Yaya Dios chai llaquicunata cachacushcatami yuyarca (Job 6:4; 16:11-14). Shinapish Diosmantaca manataj caruyarcachu. Diosta cꞌuyashcamantami tucui shunguhuan paita sirvishpa catirca. Chashnami Diablo nishcacuna mana cierto cashcata ricuchirca.

13. ¿Diosmanta mana caruyashpaca Jobca imatataj chasquirca?

¹³ Diablo yangamanta Diosta juchachicushcataca Jobca mana yacharcachu. Shinapish Diosmanta manataj caruyashpami Diablo llulla cashcata ricuchirca. Chaimi Yaya Diosca Jobta achcata bendiciarca (Job 42:12-17).

14, 15. ¿Diabloca imata nishpataj gentecunataca juchachicun?

¹⁴ Cunan punllapish Diabloca Diosta sirvijcunatami yangamanta juchachicun. Paica: ‘Runaca mana huañusha nishpaca, tucui charishcahuanmi paipaj causaitaca quishpichisha ninman’ nircami (Job 2:4). Diabloca, tucui gentecunami imata japinaraiculla imatapish ruran ninmi. Job huañushca achca huatacuna qꞌuipapish Diabloca Yaya Diosta, Diosta sirvijcunatami yangamanta juchachishpa catirca. Chaimantami Yaya  Diosca: “Ñuca huahualla, yachaisapa cayari. Chashna cashpamari ñucataca cushichingui. Ñucata pꞌiñashpa rimajmanpish ima cutichinata charishamari” nin (Proverbios 27:11).

¹⁵ Canpish Yaya Diospaj alli amigo tucushpami paitaca tucui shunguhuan sirvi pudingui. Chashnami Diablo llulla cashcata ricuchingui. Ñaupa causaita saquina sinchi laya cajpipish esforzarinami cangui. Chashnami Diospaj alli amigo tucungui. Diabloca, gentecuna llaquicunahuan cashpaca Diosta sirvinata saquingallami ninmi. Paica ima laya tucushpapish cantaca Diosmantami caruyachisha ninga. Shinapish Diosmantaca manataj caruyanachu cangui.

16. a) ¿Gentecuna Diosta ama sirvichunca Diabloca ima jarcaicunatataj churan? b) ¿Diabloca ima shinataj ñucanchijtaca pandachinata munan?

¹⁶ Diabloca Diosmanta caruyachingapajmi tucui laya jarcaicunata churan. Paica, “león huacaricuj shinami, maijanta millpungapaj muyundijta mashcashpa puricun” (1 Pedro 5:8). Por ejemplo, Bibliata yachacujpica familiacuna, amigocunami ama yachashpa catichun tal vez jarcasha ningacuna (Juan 15:19, 20). * Cutin maipica, Diabloca “achij nicuj ángel shina” tucushpami mana allitaca allita shina ricuchun munanga (2 Corintios 11:14). Shinallataj imapaj mana valishcata laya yuyachishpami Diosmanta caruyachisha ninga (Proverbios 24:10).

17. ¿Jehová Diostaca imamantataj cazunchij?

¹⁷ Diospaj mandashcacunata cazushpami Diablo llulla cashcata ricuchishun. Jehová Diosta tucui shunguhuan, tucui almahuan, tucui fuerzahuan cꞌuyashpaca pai mandashcacunata cazunaca jahuallami canga (Deuteronomio 6:5). Yaya Diosta ashtahuan cꞌuyashpaca pai munashca shinami imatapish rurashun. Apóstol Juanpish, “Diosta cꞌuyacushcataca pai mandashcacunata cazushpami ricuchina. Pai mandashcacunata cazunaca mana sinchichu” nircami (1 Juan 5:3).

18, 19. a) ¿Jehová Diosca ima ruraicunallatataj mana ricunachin? b) ¿Yaya Dios ñucanchij rurai pudishcallata mañaj cashcataca ima shinataj yachanchij?

¹⁸ ¿Yaya Diosca ima ruraicunallatataj mana ricunachin? Chaitaca “ Jehová millashcata millashunchij” nishca recuadropimi ricui tucungui. “Chai recuadropi  caj maijan ruraicunaca mana jatun juchachu can” nishpachari yuyangui. Pero chaipi tiyaj versocunata liyishpa, alli yuyarishpaca chai ruraicuna mana alli cashcatami intindingui. Shinallataj chai versocunata liyishpaca cambaj causaipi huaquin cambiocunata rurana cashcatami ricungui. Cai cambiocunata ruranaca sinchichari ricuringa. Pero cambiocunata rurashpaca cushillami causangui (Isaías 48:17, 18). ¿Imamantataj cambiocunata ruranataca valinchij ninchij?

¹⁹ Diosca ñucanchij imata rurai pudishcallatami rurachun mañan (Deuteronomio 30:11-14). Paica ñucanchij alli amigomi can. Chaimantami ñucanchijta yalli imata alli ruraj cashcata, imapi mejorana cashcata yachan (Salmo 103:14). Apóstol Pabloca: “Diosca ima rurasha nishcatapish pajtachijmi. Chashna cashpami, cancuna apai tucunalla llaquita apachunca saquinga. Cancunata ima llaqui japijpipish, Diosllatajmi  alli tucuna yuyaitapish chai llaquita apai tucunatapish cunga” nircami (1 Corintios 10:13, NTQC, 1973). Llaquicunata ahuantangapaj, allicunata rurangapaj Yayitu Dios fuerzata cunataca mana cungarinachu canchij (2 Corintios 4:7).

20. a) ¿Imamantataj Dios munashca laya causana canchij? b) ¿Ima layataj cana canchij?

²⁰ Jehová Diospaj amigo cangapajca ¿imatataj ashtahuan rurana cangui? Dios munashca layami causana cangui (Romanos 12:9). Diospaj amigocunaca, cꞌuyaita, cushicuita, sumaj causaitami charincuna. Shinallataj mana utca pꞌiñarij cangapaj, alli shungu cangapaj, quiquinllataj jarcarij cangapajmi esforzarincuna (Gálatas 5:22, 23). Diospaj amigocuna ima shina cashcata yachangapajca Salmo 15:1-5-ta liyi.

21. ¿Dios munashca shina causangapajca imatataj rurana cangui?

²¹ Jehová Dios munashca shina causangapajca Bibliatami liyina, estudiana cangui (Isaías 30:20, 21). Chashna rurashpami Yaya Diosta ashtahuan cꞌuyangui, pai mandashcacunatapish alli pajtachingui.

22. ¿Diosta cꞌuyaimanta sirvishpaca imatataj ricuchishun?

²² Causaipi cambiocunata ruranaca shuj mauca ropata mushuj ropahuan cambiana shinami can. Chaimantami Bibliapica, “cancunapaj mauca causaitaca, rurashcacunandij anchuchishpa, mushuj runata rurashcami canguichij” nin (Colosenses 3:9, 10). Cambiocunata rurangapaj esforzarijpica Yaya Diosca achcatami bendicianga (Salmo 19:11). Pero, shamuj punllacunapi Dios bendiciachun nishpallaca mana sirvinachu canchij. Ashtahuanpish cꞌuyaimantami Diostaca sirvina canchij. Chashnami Diablo llulla cashcata ricuchishun. Ashtahuancarin Diospaj alli amigomi tucushun.