1, 2. ¿Gentecunaca imatataj tapurincuna?

TUCUI punllacunami achca llajtacunapi jatun terremotocuna tiyashcata, millai gentecuna shujtajcunata huañuchishcata, shuj yaya mama ungüimanta huañushpa huahuacunata saquishcata uyanchij.

² Cashna llaquicunata ricushpami achca gentecunaca, “¿imamantataj shina sufrinchij?” nishpa tapurincuna. ¿Quiquinpish shinachu tapurishcangui?

3, 4. a) ¿Habacucca imatataj Jehová Diosta tapurca? b) ¿Diosca Habacucmanca imatataj cutichirca?

³ Bibliapica ñaupa tiempopi Diosta sirvijcunapish chashnallataj tapurishcatami ricuchin. Por ejemplo, profeta Habacucca Diostaca: “¿Ima nishpataj ñuca mana ricunachishca millaita ruranacunataca ricuchihuanguiyari? Ñuca ñahuipica chingachijcunapish, llaquichijcunapish, rimajcunapish, cꞌamijcunapishmi ricurin” nircami (Habacuc 1:3).

⁴ Yaya Diosca Habacucmanca, tucui llaquicunatami tucuchisha nishpami cutichirca (Habacuc 2:2, 3). Diosca gentecunataca achcatami cꞌuyan. Chaimantami Bibliapica, “Diosmi cancunataca cuidacun” nin (1 Pedro 5:7). Llaquicunahuan sufrijta ricushpaca Yayitu Diosca achcatami llaquirin (Isaías 55:8, 9). Cunanca llaquicuna imamanta tiyashpa catishcata yachashun. 

5. a) ¿Llaquicuna tiyajpica curacuna, pastorcunaca imatataj nin? b) ¿Jeremías 29:11-pica imatataj Diosmanta yachachin?

⁵ Achca curacuna, pastorcunaca llaquicunata charijpica, “Diospaj voluntadmi can, paimi cashna llaquicunata charichunca destinashca, llaquicunata imamanta charishcataca mana intindi tucunchijchu” nishpami yachachincuna. Cutin shujtajcunaca, “huañushcacunaca cielopimi Taita Amitohuan causagrin” nincunami. Pero Yaya Diosca mana allicunataca nunca mana ruranchu. Bibliapica: “Cancunapajca llaquitaca mana cachashachu” ninmi (Jeremías 29:11).

6. ¿Llaquicuna tiyajpica gentecunaca imamantataj Diosta culpan?

⁶ Cai mundopi llaquicuna tiyashcamantaca achca gentecunami Diosta culpancuna. Paicunaca, Diosmi cai pachataca mandacun nishpami yuyancuna. Pero capítulo 3-pi yachashca shinaca Diablomi cai pachataca mandacun.

7, 8. ¿Imamantataj achca llaquicuna tiyan?

⁷ Bibliapica: “Cai pachapi millaita rurajcunaca Diablopaj ucupimi” ninmi (1 Juan 5:19). Diabloca yallitaj millai, tucui cai “Allpa pachapi causajcunata umajmi” can (Apocalipsis 12:9). Achca gentecunami Diablo shina millai tucuncuna. Chaimantami cai mundopica achca millai ruraicuna, pꞌiñanacuicuna, llullaicuna tiyan.

⁸ Shinallataj Diosta mana cazushpa Adán Eva juchapi urmashcamantami paicunapaj huahuacunapish juchayujcuna canchij. Chaimantami maijancunaca shujtajcunata yalli cashcata sintishpa shujtajcunata maipish cachun tratancuna. Shujtajcunacarin  macanacuicunaman rishpami shujtajcunata huañuchin (Eclesiastés 4:1; 8:9). Ashtahuanpish accidentecuna o ima llaquipish mana pensashcapimi rato japinlla. Chaimantami Bibliapica: “Mana alli punlla chayajpica, ñapish ima llaqui japinllami” nin (Eclesiastés 9:12).

9. ¿Llaquicunahuan sufrichun Dios mana munashcataca ima shinataj yachanchij?

⁹ Yaya Diosca llaquicunataca mana cachanchu. Paica macanacuicunamanta, shuhuaicunamanta, millai ruraicunamantaca mana culpata charinchu. Chashnallataj terremotocuna, jatun acapanacuna, cai laya shujtaj llaquicunamantapish Diostaca mana juchachinachu canchij. Jehová Diosca ñucanchijtaca achcatami cꞌuyan. Paica gentecuna sufrishpa catichunca mana munanchu. Catij parrafocunapimi imamanta sufrishpa caticushcata yachashun (1 Juan 4:8).

10. ¿Diabloca Jehová Diosta juchachingapajca imatataj nirca?

¹⁰ Edén huertapimi Diabloca: ‘Diosca mana alli mandajmi can. Pai mandachunca gentecunaca mana minishtinchu. Diosca alli cosascunata cunataca mana munanchu, ñucallami Diosta yalli alli mandaj casha’ nishpa Diostaca yangamanta juchachirca. Chaita crishpami Adán Evaca Diosta mana cazunata decidircacuna (Génesis 3:2-5; nota 27-ta ricui).

11. ¿Yaya Diosca imatataj ricuchina carca?

¹¹ Adán Evaca Diosta mana cazushpami paipaj contra tucurcacuna. Paicunaca, ‘ñucanchijllatajmi ima alli cashcata, ima mana alli cashcata decidina canchij’ nishpami yuyarcacuna. Chaimi Yaya Diosca pailla alli mandaj cashcata, Adán Eva pandarishcata ricuchina carca.

12, 13. a) ¿Adán Eva mana cazujpica Diosca imamantataj mana chai rato paicunata tucuchirca? b) ¿Yaya Diosca imamantataj Diablopish gentecunapish cai Allpata mandachun saquishca?

 ¹² Callaripica Yaya Diosca jucha illaj gentecuna cai Allpapi jundarichunmi munarca. Diablo jarcaicunata churajpipish chaica pajtarinatajmi carca (Génesis 1:28; Isaías 55:10, 11). Chaimantami Diosca Adán Evataca mana chai rato tucuchirca. Chaipaj randica huahuacunata charichunmi saquirca. Chashnami Adanpaj huahuacunaca pita sirvinata agllai tucurcacuna.

¹³ ¿Diablopish, gentecunapish cai Allpata mandashpa catichunca Diosca imamantataj saquishca? Diabloca, ‘Diosca mana alli mandajmi can’ nishpami achca angelcunapaj ñaupajpi yangamanta juchachirca (Job 38:7; Daniel 7:10). Cai nishcacuna mana cierto cashcata ricuchingapajmi Yaya Diosca, Diablopish gentecunapish cai Allpata mandachun saquishca.

14. ¿Gobiernocunaca imatataj mana rurashcacuna?

¹⁴ Cai tucui huatacunatami gentecunaca paicunapurallataj mandashpa causashcacuna. Pero gobiernocunaca cushi causaitaca mana cushcacunachu. Chaimantami Diablo llulla cashcata, gentecunapish Diospaj ayudata minishtishcata ricushcanchij. Profeta Jeremiaspish: “Mandaj Dioslla, runapaj causaica mana paipajchu. Pipish quiquin causaitaca mana mandai tucunchu” nircami (Jeremías 10:23).

15, 16. a) ¿Diosca imamantataj llaquicuna tiyashpa catichun saquishca? b) ¿Diablo churashca llaquicunataca imamantataj Diosca manaraj tucuchishca?

¹⁵ ¿Llaquicunataca Diosca ima nishpataj manaraj tucuchishca? ¿Mana alli cosascuna ama pasachunca  imamantataj Diosca mana jarcashca? Diablo mana alli mandaj cashcata ricuchinapajca achca tiempomi pasana carca. Chꞌican chꞌican gobiernocunami tiyashca, pero chai tucui gobiernocunaca gentecunapajca llaquicunallatami apamushca. Ciencia, tecnología avanzashpa catijpipish llaquicuna, pobreza, macanacuicunaca mirashpami caticun. Chaimantami Yayitu Dios mandachun minishtinchij.

¹⁶ ¿Diosca imamantataj Diablo churashca llaquicunataca mana tucuchishca? Chai llaquicunata Dios tucuchishpaca Diablopaj ruraicunata apoyacushca layami canman. Diabloca, gentecunallataj mandashpaca allimi causangacuna nishpami llullarca. Jehová Diosca gentecuna chai llullata crichunca mana munanchu (Hebreos 6:18). Chaimantami Diablo churashca llaquicunataca manaraj tucuchishca.

17, 18. ¿Diablo churashca llaquicunataca ima shinallataj Diosca tucuchinga?

¹⁷ Yaya Diosca achca podertami charin. Chaimantami Diablo churashca llaquicunataca ñalla tucuchinga. Jehová Diosca, Diablo llulla cashcata ricuchishca qꞌuipami cai Allpataca sumaj paraisota ruranga. Shinallataj huañushcacunatapish causachingami (Juan 5:28, 29). Gentecunaca ña mana ungungacunachu, ña mana huañungacunachu. Diosca Jesushuanmi “Diablopaj rurashcacunata” chingachinga (1 Juan 3:8). Chai punlla chayangacamami Yaya Diosca paita rijsichun oportunidadta cushca. Chaimantami pagui nina canchij. Tucuicunami Diosta sirvinata o mana sirvinata agllana canchij (Ezequiel 18:23-ta liyipai). Llaquicuna tiyajpipish Yaya Dios ayudana cashcataca mana cungarinachu canchij (Juan 4:23; Isaías 40:29-ta liyipai).

 ¹⁸ Diosca paita sirvichunca mana obliganchu. Chaipaj randica ñucanchijllataj imatapish decidichunmi saquishca. Cunanca chaimanta yachashun.

19. ¿Yaya Diosca cada uno imata rurachuntaj saquishca?

¹⁹ Animalcunaca imatapish mana agllai tucuncunachu. Pero Yayitu Diosca gentecuna cushilla causachun munashpami cada uno imata ruranata agllachun saquishca. Chaimantami Diosta sirvinata o mana sirvinataca cada quien agllai tucunchij. Ñucanchijcunaca mana shuj maquina shina imata pajtachingapajllachu rurashca canchij. Ashtahuanpish ñucanchijllatajmi ima laya gentecuna canata, picunahuan apanacusha nishcataca agllai tucunchij.

20, 21. ¿Alli decisionta agllangapajca imatataj rurana cangui?

²⁰ Jehová Diosca paita cꞌuyachunmi munan (Mateo 22:37, 38). Shuj yayaca paipaj huahuacuna shungumanta cꞌuyajpimi cushilla sintirin. Yaya Diospish ñucanchijcuna shungumanta cꞌuyajpimi cushilla sintiringa. Diablopish, Adán Evapish Diosta mana cazunatami decidircacuna. Canpish Yaya Diosta cazunata o Diablota cazunatami agllana cangui.

²¹ Achca gentecunami Diablopaj ruraicunamanta caruyashpa Diosta sirvinata decidishcacuna. Canpish Yaya Diosta sirvinata agllashpaca Diostami cushichingui (Proverbios 27:11). Yaya Diosca tucui llaquicunata tucuchishpami cai Allpataca shuj sumaj paraisota ruranga. ¿Paraisopi cangapajca imatataj rurana cangui? Caitaca shamuj capitulopimi yachashun.