Samuelca uchillamantapachami Jehovapaj carpa huasipi servishpa, chai cꞌuchullapi causaj carca. Jehovapaj carpa huasipica Diostami adoranaman rijcuna carca. ¿Samuel imamanta chaipi causaj cashcata yachasha ninguichu? Paimanta ashtahuan yachangapajca paipaj mamamantaraj yachashun. Paipaj mamaca Anami carca.

Anaca shuj huahuatami charisha nirca. Shinapish mana chari tucurcachu. Chaimantami paica “cꞌari huahuata cuhuai” nishpa Jehovata mañarca. “Cꞌari huahuata cujpica cambaj huasipi servichunmi cusha” nircami. Ana mañashcata uyashpami Diosca shuj huahuata curca. Chai huahuataca Samueltami shutichirca. Samuel quimsa o chuscu huatata charijpimi Anaca Diospaj huasipi servichun aparca.

Jehovapaj huasipi curacunata mandajca Elí shutimi carca. Paipaj ishqui churicunapish ñami jatun carca. Paicunapish Jehovapaj huasipimi servishpa causajcuna carca. Chaipi causajcunaca Diosta cazushpami causana carca. Shinapish Elipaj churicunaca mana allita rurashpa causacujtami Samuelca ricurca. ¿Samuelca Elipaj churicuna shinachu mana allita rurarca? ¿Imata yuyangui?... Mana, Samuelca paipaj yaya mama yachachishca shinami Diosta cazushpa catirca.

¿Elica imatataj rurana carca? ¿Manachu paipaj churicunata cunana carca?... ¡Ari! Elica Diospaj huasipi paipaj churicuna servishpa catichunca mana saquinachu carca. Shinapish Elica mana imata rurarcachu. Chaimantami Jehová Diosca Elihuanpish, paipaj churicunahuanpish pꞌiñarirca. Shinallataj llaquichisha nircami.

Shuj tutaca Samuelca dormicurcami. Chaipimi paica “¡Samuel!” nishpa cayajta uyarca. Chaita uyashpami Elipajman rirca. Elica “ñucaca mana cayashcanichu”  nircami. Quimsa cutin Samuel shamujpica, Elica “cutin cayajpica Jehová huillailla, ‘ñucaca uyacunimi ningui’ ” nircami. Elí mandashca shina Samuel cutichijpica Jehová Diosca Samueltaca: “Elitapish paipaj familiatapish millaita rurashcamantami tucuchigrini” nircami. Chaitaca Eliman huillagri nishpami mandarca. ¿Chaita huillanaca jahuallachu carca?... Mana. Samuelca Eliman huillanataca mancharcami. Shinapish Jehová Diosta cazushcamantami Eliman huillarca. Qꞌuipa punllacunaca Elipish paipaj ishqui churicunapish huañurcami.

Samuelmantaca achcatami yachai tucunchij. Shujtajcuna mana allita rurajpipish Samuelca Diostami cazurca. ¿Canpish Samuel shina Diosta cazusha ninguichu? Jehovata cazushpaca paitami cushichingui. Cambaj yaya mamatapish cushichinguimi.