Caipi yuyai: Juliaca espejopi ricurishpami, “yalli gordami cani” nin. Yaya mamapish amigocunapish yalli flacami cangui nishca cajpipish “flacayanami cani”, nishpami yuyan.

Juliaca huaquin punllacunata mana micushpapish “5 libracunallatapish flacayanatajmi cani” ninmi.

Can Julia laya sintirishpaca imatataj ruranguiman?

Sumaj ricuringapaj procuparinaca allimi can. Bibliapica achca cꞌaricuna huarmicuna sumaj cashcatami parlan por ejemplo Sara, Raquel, José, David Abigail. Shinallataj Bibliaca Abisag shuti huarmitaca “yallitaj sumaj” ninmi (1 Reyes 1:4).

Shinapish achca jovencunami sumaj ricuringapaj yallitaj preocuparincuna. Chaimantami huaquincunaca llaquicunata charishcacuna.

• Caita yachashcanguichu: Estados Unidos llajtapica cada 100 solteracunamantaca 58-mi gorda cashcata nircacuna. Shinapish 17 solteracunallami gorda carca.

• Shinallataj cada 100 solteracunamantaca 48 solteracunami flaca cashpapish gorda cashcata yuyarcacuna.

• Huaquin jovencunaca mana gordo o gorda ricurisha nishpami yallitaj preocuparincuna. Flaca cashpapish gorda cashcatami yuyancuna. Chaimantami mana alli micushpa ungushcacuna, shujtajcunacarin casimi huañushcacuna.

 Canpish chashna yuyashpa mana alli micushpaca ayudata mashcai. Cambaj yaya mamahuan o cambaj alli amigohuan parlai. Bibliaca: “Alli apanacuj runaca paihuan apanacujtaca, tucui causaipimi cꞌuyan. Ima llaqui japijpipish, quiquin huauqui shinami llaquin” ninmi (Proverbios 17:17).

Shungupi cꞌuyaita charishpami ashtahuan sumaj ricurinchij. Rey Davidpaj churi Absalonmanta parlashpaca Bibliaca:

“Tucui Israelpica Absalón shina sumaj runaca mana tiyarcachu. Paica chaquimanta umacama ima mana allica mana carcachu” ninmi (2 Samuel 14:25).

Shinapish cai jovenca jatun tucushca, envidioso, inquitashpa umajmi carca. Bibliapica sumaj cashpapish Absalonca millai, mana cazuj, huañuchij runami carca ninmi.

Chaimantami Bibliaca cashna yachachin:

“Cunanca mushuj yuyaitami charinguichij” (Colosenses 3:9,10, QC, 1989).

“Cancunaca uma ajchallata sumajta allichirishca ama caichijchu. Chaipaj randica, ucu shungu yuyaita allichichij” (1 Pedro 3:3, 4).

Alhaja cuerpota, sumaj ñahuita charinata munanaca mana juchachu can. Shinapish alli shunguta charina, cꞌuyaj canami ashtahuan valishca can. Gentecunaca sumaj cashcallataca mana ricungacunachu ashtahuanpish can ima shina cashcatami ricungacuna. Alicia shuti solteraca: “Sumaj cashcataca chai ratollami gentecunaca ricuncuna, ashtahuanpish can ima shina cashcata ricushpami cantaca ashtahuan cꞌuyangacuna” ninmi.

¿Cambaj cuerpota munanguichu?

¿Alhaja tucusha nishpa operarinata yuyashcanguichu? Shinallataj ¿flacayangapaj ashallata micunata yuyashcanguichu?

¿Imatataj cambaj cuerpopica cambianguiman? Agllai:

• JATUN CANATA

• UCHILLA CANATA

• AJCHATA

• SINGATA

• ÑAHUITA

• TUCUITA

Callari ishqui tapuita “ari” nishca cashpa, tucuri tapuipi quimsata o ashtahuan agllashca cashpaca shujtajcunaca manachari cantaca chashna ricuncuna. Alhaja cuerpota, sumaj ñahuita charisha nishpa yallitaj preocuparinaca jahuallami can. Chaitaca ama ruraichu (1 Samuel 16:7).