1. ¿Cashcata ruraj Diosmantaca Abrahamca imatataj nirca? (Jahuapi tiyaj dibujota ricui).

ABRAHAMCA Diostaca: “Canca tucui cai pachapaj Juez cashcamanta imatapish cashcatatajmi rurangui” nircami (Génesis 18:25). ¿Imamantataj Abrahamca chashna nirca? Dios cashcata ruraj cashcamanta Sodoma Gomorra llajtacunata alli juzganatami crirca. Shinallataj cashcata rurajcunata millai gentecunahuan tandachishpa Jehová mana chingachij cashcatami crirca. Bibliapi Jehovamanta parlashpaca cashnami nin: ‘Paica ñucanchij jatun Rumi shinamari. Pai rurashcacunapica ima panda mana tiyanchu. Paipaj ñancunapish ima mana pandachu’ ninmi (Deuteronomio 31:19; 32:4).

2. ¿Imamantataj Diosca siempre allita ruran?

² Jehová Diosca imatapish siempremi alli ruran. Diospaj mandashcacunaca tucuimi alli can. Chaimantami imatapish alli ricushpa juzgan. Paimi tucuimanta yalli, cashcata ruraj can. Bibliapica ‘Diosca cashcata ruranata, imatapish allita ruranatami cꞌuyan’ ninmi (Salmo  33:5). Chaimantami Abrahamca Jehovataca, ‘cashcata ruraj Diosmi cangui’ nirca.

3. ¿Huaquin gentecunaca ima shinataj shujtajcunata llaquichishca?

³ Diosca imatapish allita ruraj cashcata yachashpami cushilla sintirinchij. Pero achca gentecunaca shujtajcunatami llaqui causaipi churashcacuna. Por ejemplo, huaquin gentecunataca yangamanta juchachishpami carcelpi churashcacuna. Achca huatacuna qꞌuipami imata mana rurashcata yachaj chayashpa carcelmanta llujchishcacuna. Chashna shina ruraicuna tiyajpimi gentecunaca shungupi nanarishpa pꞌiñarishcacuna. Pero, maipica Diosta servijcunapish llaquicunatami charishcanchij. Diosta servijcunapurapi ima llaquicuna tiyashcata ricushun.

4. ¿Huaquinpica imamantataj Diosmanta caruyanata yuyanchijman?

⁴ Diosta mana servijcunaca huaquinpica ñucanchijtachari llaquichi tucun. Pero shuj huauqui o pani ñucanchijta o shujtajcunata llaquichishca laya ricurijpica ¿imatataj rurashun? ¿Diosmanta caruyashunchu?

5. ¿Shuj huauqui o shuj pani ñucanchijta o shujtajcunata llaquichijpica imamantataj mana mancharina canchij?

⁵ Tucuicuna juchayujcuna cashcamantami pandarinchijlla. Chaimantami ima horapish shuj huauqui o shuj pani ñucanchijta llaquichi tucun. O ñucanchijpish shujtajcunatachari llaquichi tucunchij (1 Juan 1:8). Chai problemacunataca congregación ucupi mana tanto uyashcanchijchu. Pero chai problemacuna tiyajpica mana mancharinachu canchij. Diosmantapish mana caruyanachu canchij. Shuj hermano o shuj hermana llaquichijpipish Diosmanta ama caruyangapajca Bibliapi mandashcacunatami cazuna canchij (Salmo 55:12-14).

6, 7. a) ¿Shuj huauquica ima llaquicunatataj charirca? b) ¿Chai llaquicunahuan cashpaca huauqui Wilica imatataj rurarca?

⁶ Huauqui Wili Deil ima tucushcata yuyarishun. 1931-pica Suiza llajta Betelpimi servi callarirca. Cutin 1946-pica Estados Unidos llajtapimi Escuela de Galaadman rirca. Graduarishca qꞌuipaca Suiza llajtaman tigrashpami superintendente shina servi callarirca. Cutin 1949-pica: “Ñucaca cazaragrinimi” nishpami sucursalpi caj huauquicunaman huillarca. Chashna huillajpica huauquicunaca: “Canca ña mana cashna servishpa catinguichu, precursor shinallami servishpa catingui” nircacunami. Chai huauquicunaca conferenciacunata cuchunpish mana saquircacunachu. Chaita yachashpaca achca huauquicuna panicunaca huauqui Wilitapish paipaj huarmitapish congregacionmanta llujshichishcata layami tratarcacuna, mana saludarcacunapishchu.

⁷ ¿Chashna tratajpica huauqui Wilica imatataj rurarca? Paipish paipaj huarmipish cazaranata Dios mana jarcashcataca allimi yacharca. Chaimantami Diosta mañarcacuna, paipi shunguta churashpa catircacuna.  Chai tiempopi huaquincunaca cazaranata Jehová Dios ima shina ricushcata mana tucuita entendircacunachu. Pero qꞌuipaca entendircacunami. Chaimantami huauqui Wilica ñaupa layallataj Diospaj pueblopi ayudai callarirca. Diosmanta mana caruyashcamantami achca bendicioncunatapish chasquirca * (urapi tiyaj notata ricui). Cutin, ¿shujtajcuna ñucanchijta chashnallataj llaquichijpica imatataj rurashun? ¿Mana pꞌiñarishpa Diosllataj chai problemacunata allichichun shuyashunchu? ¿o ñucanchijllatajchu chai problemacunata allichishun? (Proverbios 11:2; Miqueas 7:7-ta leyipai).

8. Ñucanchijta o shujtajcunata llaquichishcata yuyashpaca ¿imamantataj pandari tucunchij?

⁸ Shuj huauqui o shuj pani ñucanchijta o shujtajcunata llaquichishcata yuyashpaca pandachari yuyacunchijman. Juchayujcuna cashcamanta ima tucushcataca pandachari entendishca cashun. Mana cashpaca manachari tucuita yachashca cashun. Llaquichishca o mana llaquichishca cajpipish chai problemacuna tiyajpica Jehová Diostami mañana canchij. Shinallataj Diospi confiashpami paimanta mana caruyana canchij. Chashnami Jehová Dioshuan mana pꞌiñarishun (Proverbios 19:3-ta leyipai).

9. ¿Cai yachaipi catij yachaipipish imatataj yachashun?

⁹ Ñaupa punllacunapipish Diospaj pueblopica chashna laya llaquicunami tiyarca. Cai yachaipica Abrahampaj bisnieto Josemantami yachashun. Shinallataj paipaj huauquicunapaj culpamanta José achca llaquicunata charishcatami ricushun. Catij yachaipica rey Acabta, Jehová Dios imata rurashcatami yachashun. Shinallataj Antioquía llajtapi apóstol Pedro imata rurashcatapishmi ricushun. Paicunamanta yachacushpaca chashna laya llaquicuna tiyajpi Jehová ricushca shina ricungapaj, paimanta ama caruyangapaj imata ruranata yuyai. ¿Canta pi llaquichishcata yuyacunguichu? Chaita yuyashpaca cai yachaimi canta ayudanga.

10, 11. a) ¿Josetaca ima shinataj llaquichircacuna? b) ¿Prezupi cashpaca Joseca imallatataj shuj cꞌariman parlarca?

¹⁰ Joseca alli shunguyujmi carca. Pero paica achca llaquicunatami ahuantarca. Paipaj huauquicunallataj llaquichijpimi ashtahuan llaquirirca. 17 huatacunata charijpica paipaj huauquicunaca esclavo cachunmi cꞌaturcacuna. Chashna cꞌatujpica Egipto llajtamanmi aparcacuna (Génesis 37: 23-28; 42:21). Egipto llajtapica, shuj huarmitami violashca nishpami Josetaca yangamanta juchachircacuna. Chaimantami mana juiciota rurashpa carcelpi churarcacuna (Génesis 39:17-20). 13 huatacunatami Joseca esclavo shina trabajashpa, carcelpipish pasarca. ¿Ñucanchijtapish huauquicuna, panicuna llaquichijpica ima shinataj Josepaj ejemplota cati tucunchij?

¹¹ José prezupi cajpica copacunata pasachijcunata mandajtapishmi carcelpi churarca. Shuj tutaca chai cꞌarica shuj muscuitami charirca. Paica imata muscushcatami Joseman huillarca. Dios ayudajpimi Joseca chai muscui imata nisha nishcata yacharca. Chaimantami Joseca chai cꞌarimanca: ‘Canca tigrami faraonpaj trabajagringui’ nircami. Chashnallataj Joseca imamanta carcelpi cashcatami chai cꞌariman parlarca. Chai cꞌariman José imata nishcata, imata mana nishcatapish ricushun (Génesis 40:5-13).

12, 13. a) ¿Joseca paita llaquichishcamantaca imatataj rurarca? b) ¿Joseca copacunata pasachijcunata mandajmanca imatataj mana huillarca?

¹² (Génesis 40:14, 15-ta leyipai). Joseca: ‘Ñucaca shuhuamushcami carcani’ nircami. Josepajca chaica achca llaquimi carca. Joseca copacunata pasachijcunata mandajmanca: ‘Carcelpi ñucata churachunca cai llajtapipish  ñucaca ima mana allitaca mana rurashcanichu’ nircami. Chashnallataj ‘carcelmanta llujshichichun faraonman huillapangui’ nishpami chai cꞌaritaca rogarca.

¹³ ¿Joseca paita llaquichishcamantaca manachu imata rurashcanga? Joseca deganallamanta paita llaquichishcataca allimi yacharca. Chaimantami paita ayudachun nishpa chai cꞌariman ima tucushcata parlarca. Pero, ‘ñuca huauquicunami ñucataca shuhuashpa cꞌaturcacuna’ nishpa, José parlashcataca Bibliapica mana huillanchu. Faraonmanpish mana huillarcachu. Ashtahuanpish paipaj huauquicuna Egipto llajtaman chayajpica Joseca paicunahuanmi alli tucurca. Faraonpish Josepaj huauquicunata alli chasquishpami cashna nirca: ‘Cai llajtapi saquirichijlla, caipi imalla allicuna tiyashcacunatami cancunamanca cusha’ nircami (Génesis 45:16-20).

14. Shuj huauqui o shuj pani ñucanchijta llaquichishcata yuyashpaca ¿paicunamanta mana allita ama parlangapajca imatataj rurana canchij?

¹⁴ Huauquicuna panicuna ñucanchijta llaquichishcata yuyashpaca mana shujtajcunaman huillashpa purinachu canchij. Pero shuj huauqui o shuj pani juchata rurashca cajpica ancianocunahuan parlashpami ayudata mashcana canchij (Levítico 5:1). Pero maipica mana juchata rurashpachu ñucanchijta llaquichishcanga. Chashna llaquichishca cajpica shujtajcunaman parlana mana minishtiringachu. Ancianocunamanpish manachari huillana minishtiringa. Ashtahuanpish paillahuan parlashpami alli tucuna canchij (Mateo 5:23, 24; 18:15-ta leyipai). Chashna llaquicuna tiyajpica Dios nishcata cazushpa, paimanta ama caruyashunchij. Huaquinpica ñucanchijta llaquichishcata yuyashpapish qꞌuipaca pandata yuyacushcatachari cuentata cushun. Ña cuentata cushpaca shujtajcunamanta ima mana allita mana rimashcamanta tranquilomi cashun. Ñucanchijta llaquichishca o mana llaquichishca cajpipish shujtajcunamanta mana allita rimashpaca mana imata japishunchu. Diostapish, shujtajcunatapish cꞌuyashpaca mana pitapish llaquichishunchu. Salmota quillcaj runaca: ‘Ima pandata mana ruraj runaca mana llullacunata ninchu, shujtajcunamantapish mana allitaca mana parlanchu’ ninmi (Salmo 15:2, 3; Santiago 3:5).

15. ¿Diosmanta mana caruyashcamantaca Joseca imatataj ricurca?

¹⁵ ¿Josemantaca imatataj ashtahuan yachai tucunchij? Joseca 13 huatacunatami  llaquicunata apashpa causarca. Pero chai llaquicunataca Dios ricushca shinami paica ricurca (Génesis 45:5-8). Chaimantami Joseca Jehová Diosta mana juchachirca. Llaquicunata mana cungari tucushpapish mana llaquilla causarcachu. Ashtahuanpish shujtajcunapaj pandarishcacuna Diosmanta caruyachichun mana saquircachu. Joseca Diosmanta mana caruyashcamantami Diosllataj paipaj llaquicunata ima shina allichijta ricurca. Shinallataj paitapish paipaj familiatapish ima shina bendiciajtami ricurca.

16. ¿Huauquicuna panicuna llaquichijpica imamantataj ashtahuan Diospajman cꞌuchuyana canchij?

¹⁶ Ñucanchijpish José layallataj Diosmanta amataj caruyashunchijchu. ¿Manachu Jehová Diosta cꞌuyashcamanta paita alabasha ninchij? Ari. Chaimantami shujtajcunapaj pandarishcacuna Diosmanta caruyachichun manataj saquina canchij (Romanos 8:38, 39). Huauquicuna panicuna llaquichijpica José rurashca shinallataj Diospajman ashtahuan cꞌuchuyashunchij. Llaquicunatapish Dios ricushca shina ricushunchij. Shuj problema tiyajpica Bibliapi mandashca shina allichingapaj tucuita rurashunchij. Chaita rurashca jahua mana allichirijpica Diospaj maquipi mingashunchij. Chashna rurajpica Diosllatajmi pai munashca shina, pai agllashca horaspi chai problemataca allichinga.

17. ¿Ima shinataj Jehovapi shunguta churashcata ricuchishun?

¹⁷ Cai llaqui punllacunapi causacushcamantaca, tucui laya llaquicunami ricuringa. Huaquinllapimi shuj huauqui o pani ñucanchijta o shujtajcunata llaquichishca laya ricuringa. Chashna laya ricurijpipish Diosmanta ama caruyashunchijchu (Salmo 119:165). Ashtahuanpish Diospi shunguta churashpa, paita mañashpa, paipajman ashtahuan cꞌuchuyashunchij. Yuyarishun. Maipica juchayujcuna cashcamantaca imatapish pandami entendishca cashun o mana tucuita yachashcachu cashun. Ashtahuanpish José shina cashunchij. Pimantapish, imacunamantapish ama huashalla rimashunchij. Ima problemacuna tiyajpipish ama ñucanchij munashca shina allichishunchij. Diosllata servishpa catishunchij. Paillataj problemacunata allichinata crishpa pacienciahuan shuyashunchij. Chaita rurajpica Joseta bendiciashca shinami ñucanchijtapish Diosca bendicianga. Diosca tucui cai pachapaj Juez cashcamanta, paipaj ñancunapish mana panda cashcamantaca siempremi allita ruranga. Chaitaca tucui shunguhuanmi crinchij (Génesis 18:25; Deuteronomio 32:4).

18. ¿Catij yachaipica imatataj yachashun?

¹⁸ Ñaupaca Diospaj pueblopica shujtaj llaquicunapishmi tiyarca. Catij yachaipimi chai llaquicunamanta yachashun. Shinallataj Jehová Dios shina allita rurangapajca humildes, perdonajcuna cana cashcatami yachashun.