1. ¿Persia llajtata mandajhuan maijan parlasha nishpaca imatataj rurana carca?

2500 huatacuna huashaman Persia llajtapi causacushcata yuyashun. Persia llajtata mandajca Susa llajtapimi causacun. Mandajhuan parlangapajmi paita ricunaman ricunchij. Pero reyhuan parlangapajmi paipaj permisota mañana canchij. Chaita mana rurashpaca huañunchijmanmi (Ester 4:11).

2. ¿Jehová Diosca ima shinataj paihuan parlachun munan?

² Jehová Diosca, chai Persia llajtamanta reycuna shinaca mana canchu. Yaya Diosca tucuicunata yalli alli mandaj cashpapish, tucuita rurai tucuj cashpapish paihuan mana manchashpa parlachunmi munan. Shinallataj “Yaya” nishpa cayachunmi munan (Mateo 6:9). Jehová Dios ñucanchij cꞌuchullapi cashcata yachashpacarin cushillami sintirinchij.

3. a) ¿Jehová Diostaca imamantataj Yaya ninchij? b) ¿Cai yachaipica imatataj yachashun?

³ Ñucanchijman causaita cushcamantami Jehová Diostaca Yaya ninchij (Salmo 36:9). Yaya cashcamanta paipaj mandashcacunata cazushpaca achca bendicioncunatami charishun (Hebreos 12:9). Cai Allpapi causanata shuyacushpapish jahua pachapi causanata shuyacushpapish huiñai causaitami charishun. Cunan punllacunapipish cushillami causashun. Cai yachaipimi Yaya Dios cꞌuyaj cashcata, cuidaj cashcata ricushun. Shinallataj ñucanchijtapish manataj saquij cashcatami yachashun.

4. ¿Maijancunaca Jehová Diostaca imamantataj shuj Yayata shina mana ricuncuna?

⁴ Huaquinpica Jehová Diostaca shuj Yayata shina ricunaca sinchimi can. ¿Imamanta? Maijancunaca imapaj mana valishca shina sintirishpami: “Jehová Diosca jatun mandajmi can. Ñucanchijmantaca mana preocuparinchu” nishpa yuyancuna. Pero Jehová Diosca mana chashna yuyachunchu munan. Ashtahuanpish causaita cushcamantami paihuan alli apanacuchun munan. Apóstol Pabloca Atenas llajtapi cashpaca: ‘Yaya Diosca ñucanchijmantaca mana carupichu’ nircami (Hechos 17:24-29). Jehová Diosca shuj huahua paipaj yayapajman cꞌuchuyacuj shinallataj ñucanchijpish paipajman cꞌuchuyachunmi munan.

5. ¿Shuj panipaj ejemplomantaca imatataj yachanchij?

⁵ Shujtajcunaca paicunapaj yaya, cꞌuyaita mana ricuchishcamantami Jehová Diostaca cꞌuyaj yayata shinaca mana ricui tucuncuna. Shuj panica: “Ñuca yayaca maltratashpami causarca. Chaimantami Bibliata yachai callarishpaca Jehová Diostaca cꞌuyaj Yayata shina ricunaca sinchi carca. Pero Jehová Diosta ashtahuan rijsishpaca pai ñucata cꞌuyaj cashcatami intindircani” nircami. Ñucanchijpish cai pani shina sintirishpaca mana desanimarinachu canchij. Tiempohuanmi Jehová Dios cꞌuyaj Yaya cashcata intindishun.

6. Mateo 11:27-pi nishca shinaca ¿Jehová Diosca pai cꞌuyaj Yaya cashcata rijsichunca ima shinataj ayudashca?

⁶ Jehová Diosca pai cꞌuyaj Yaya cashcata rijsichingapajca Jesús imata rurashcata, imata nishcatapishmi Bibliapi quillcachishca (Mateo 11:27-ta liyipai). Jesusca Yaya Dios ima shina cashcatami ricuchirca. Chaimantami paica: “Pipish ñucata rijsijca, ñuca Yayatapish ñami rijsin” nirca (Juan 14:9). Shinallataj Jesusca achca cutincunami Jehová Dios cꞌuyaj Yaya cashcata yachachirca. Mateo, Marcos, Lucas y Juan librocunapica casi 165 cutinmi Jesusca Diostaca “Yaya” nishpa cayarca. Jesusca Jehová Dios cꞌuyaj Yaya cashcata tucui gentecuna yachaj chayachunmi paimantaca achca cutin parlarca (Juan 17:25, 26).

7. ¿Jesusta Jehová Dios ima shina tratashcamantaca imatataj yachanchij?

⁷ Jesusta Jehová Dios ima shina tratashcata yachashpami pai cꞌuyaj cashcata intindinchij. Diosca Jesús imalla mañashcata uyashpami cutichirca (Juan 11:41, 42). Chaimantami Jesusca ima llaquicunata charishpapish Yayitu Dios ayudanataca tucui shunguhuan crirca (Lucas 22:42, 43).

8. ¿Jehová Diosca ima shinataj Jesusta cuidarca?

⁸ Jesusca: “Ñucata cachaj Yayaca causaiyujmi. Paimantami ñucaca causani” nircami (Juan 6:57). Jehová Diosca Jesusmanca imalla minishtishcacunata cushpa, paipaj feta sinchiyachishpami cuidarca. Chaimantami Jesusca Yayitu Diospi tucui shunguhuan confiarca (Mateo 4:4).

9. ¿Jehová Diosca paipaj Churita cꞌuyashcataca ima shinataj ricuchirca?

⁹ Jehová Diosca Jesusta tucuipi ayudashpami cꞌuyaj Yaya cashcata ricuchirca (Mateo 26:53; Juan 8:16). Shinapish Jesús llaquicunata charijpica Jehová Diosca mana tucuita anchuchircachu. Ashtahuanpish llaquicunata ahuantachunmi ayudarca. Chaimantami Jesusca cai llaquicuna ashacamalla tiyana cashcata yacharca (Hebreos 12:2, NWT ). Jehová Diosca paipaj Churitaca ima nishcata uyashpa, imalla minishtishcacunata cushpa, yachachishpami  paita cuidarca (Juan 5:20; 8:28). Cunanca ñucanchijtapish ima shina cuidacushcata ricushun.

10. Salmo 66:19, 20-pi nishca shinaca ¿Yaya Diosca ñucanchijta cꞌuyashcataca ima shinataj ricuchin?

¹⁰ Diosca ñucanchij mañashcacunataca siempremi uyan (Salmo 66:19, 20-ta liyipai). Paica: ‘Ñucata mañanataca ama shaicunguichij’ ninmi (1 Tesalonicenses 5:17). Chaimantami ima hora cashpapish, maipi cashpapish Diostaca respetohuan mañanalla canchij. Ñucanchij mañashcacunata uyaj cashcata yachashpaca paipajmanmi ashtahuan cꞌuchuyashun. Salmota quillcaj runaca: “Ñucaca Mandaj Diosta cꞌuyanimi. Paimari ñuca mañashcata, ñuca caparishcata uyahuarca” nircami (Salmo 116:1).

11. ¿Jehová Diosca ñucanchij mañashcacunataca ima shinataj cutichin?

¹¹ Yayitu Diosca ñucanchij mañashcacunatami uyashpa cutichin. Apóstol Juanca: ‘Dios munashca shina imatapish mañajpica, paica uyashpa cujllami can’ nircami (1 Juan 5:14, 15). Pero maipica Diosca ñucanchij mañashca shinaca mana cutichingachu. Maipicarin pai cutichingacamami shuyachun munanga. ¿Imamanta? Jehová Diosca ñucanchijpaj ima alli cashcataca allimi yachan (2 Corintios 12:7-9, NWT ).

12, 13. ¿Jehová Diosca ñucanchijta cuidangapajca imallatataj cun?

¹² Jehová Diosca ñucanchij minishtishcacunatami cun. Yayacuna familiata cuidangapaj preocuparishca shinallatajmi Diospish ñucanchijpaj minishtirishcacunamanta preocuparin (1 Timoteo 5:8). Chaimantami paica micunamanta, ropamanta, maipi causanamantapish ama yallitaj preocuparichun tucuita cun (Mateo 6:32, 33; 7:11). Yayitu Diosca ñucanchijta achcata cꞌuyashcamantami shamuj punllacunapipish tucuita cusha nin.

¹³ Ashtahuancarin Jehová Diosca paihuan alli apanacuchunmi ayudan. Por ejemplo, Bibliapimi paimanta, paipaj munaimanta, alli causaimanta, shamuj punllacunapi ima tucunamanta yachachishca. Bibliamanta yachacujpimi Yayitu Diosca ñucanchijmantapish preocuparirca. Chaimantami ñucanchij yaya mamata, mana cashpaca shujtaj huauqui panicunata Bibliamanta yachachichun cacharca. Cunan punllacunapish ancianohuan, shujtaj huauqui panicunahuanmi ñucanchijtaca ayudacun. Shinallataj tandanacuicunapipish huauqui panicunahuan ashtahuan yachachunmi ayudan. Tucui caicunata rurashpami Jehová Diosca ñucanchijmanta preocuparishcata ricuchin (Salmo 32:8).

14. a) ¿Jehová Diosca imamantataj corregin? b) ¿Ima shinataj Diosca corregin?

¹⁴ Jehovami ñucanchijtaca corregin. Ñucanchijca mana Jesús shina jucha illajchu canchij. Chaimantami Yayitu Diosca minishtishca horaspi corregin. Bibliapica: “Jehová Diosca cꞌuyaimantami corregin” ninmi (Hebreos 12:6, 7, NWT ). ¿Ima shinataj corregin? Por ejemplo, Bibliata liyishpa o tandanacuipi uyashpachari ñucanchij causaipi cambiana cashcata ricunchij. Mana cashpaca ancianocunahuanchari ñucanchijtaca ayudan. Ima shina cashpapish Diosca ñucanchijta cꞌuyashcamantami chashna corregin (Jeremías 30:11).

15. ¿Jehová Diosca ima shinataj ñucanchijtaca cuidan?

¹⁵ Jehová Diosca llaquicunata ahuantachunmi ayudan. Shuj cꞌuyaj yaya paipaj  huahuata cuidaj shinallatajmi Yaya Diospish llaquicunahuan cai horasca ñucanchijta cuidan. Shinallataj paimanta ama caruyachunca paipaj espíritu santotami cun (Lucas 11:13). Ashtahuancarin ñucanchij tranquilo sintirichunmi ayudan. Por ejemplo, shamuj punllapi sumaj causai tiyanata yachachishpami ima problemacunata ahuantachun ayudan. Yayitu Diosca ima llaquicunatapish tucuimi allichinga. Cai llaquicunaca mana tucui vidapajchu can. Ashtahuanpish Paica huiñaipajmi bendiciasha nin (2 Corintios 4:16-18).

16. ¿Adán mana cazushcamantaca imataj tucushca?

¹⁶ Adán mana cazujpipish Yaya Diosca cꞌuyaj cashcatami ricuchirca. Adanpaj juchamantami paipish ñucanchijpish Diospaj huahuacuna canata saquishcanchij (Romanos 5:12; 7:14). Pero gentecunata ayudangapaj Jehová Dios imata rurashcata ricushun.

17. ¿Adán mana cazujpipish Diosca imatataj rurarca?

¹⁷ Adán mana cazujpipish Diosca: “Adanpaj huahuacunaca cutinmi ñuca familia tucunga” nircami (Génesis 3:15; Romanos 8:20, 21). Chaimantami paipaj cꞌuyashca Churi Jesusta ñucanchijmanta huañuchun curca. Chashnami Yaya Diosca ñucanchijtaca dimastij cꞌuyashcata ricuchirca (Juan 3:16).

18. ¿Jehová Diosmanta caruyajpipish paica imata rurachuntaj munan?

¹⁸ Juchayujcuna cajpipish Jehová Diosca paipaj huahuacuna tucuchunmi munan. Paica ñucanchijta ayudangapajmi listo can. Maipica Jehovamantami caruyai tucunchij. Chashna cajpipish Diosca paipajman tigrachunmi siempre shuyacun. Jesusca mana cazuj jovenmanta parlashpaca Yaya Dios ñucanchijta cꞌuyashcatami yachachirca. Cai joven  paipaj yayata saquishpa rijpipish yayaca churi tigranatami shuyarca. Churi tigrajpica yayaca cushilla ugllashpami chasquirca (Lucas 15:11-32). Ñucanchijpish arrepintirishpa Diospajman tigrajpica paica ñucanchijtaca chai yaya shinallatajmi chasquinga.

19. ¿Llaquicunata allichingapajca Jehová Diosca imatataj ruranga?

¹⁹ Adanpaj culpamantami achca llaquicuna tiyan. Pero Yayitu Diosmi tucuita allichinga. Chaipajca 144 mil gentecunatami Jesushuan jahua pachapi mandachun, sacerdotecuna cachun agllashca. Paraíso Allpapica Jesuspish 144 mil agllashcacunapishmi cazuj gentecunataca jucha illaj tucuchun ayudanga. Jucha illaj tucushca qꞌuipami Diabloca cutin pandachisha ninga. Pero Yayitu Diosta tucuipi cazujpica paica huiñai causaitami cunga. Cai Allpapi tucuicuna jucha illaj cajpimi paica cushilla sintiringa.

20. a) ¿Jehová Diosca ñucanchijta cꞌuyashcataca ima shinataj ricuchin? b) ¿Catij yachaipica imatataj yachashun?

²⁰ Jehová Diosca ñucanchijtaca dimastijmi cꞌuyan. Paica ñucanchij mañashcacunatami uyan. Shinallataj imalla minishtishcacunatami cun. Paipajman cꞌuchuyachunpishmi yachachin. Ashtahuancarin shamuj punllacunapimi ñucanchijmanca sumaj bendicioncunata cusha nin. Chaimantami paica tucuimanta yalli alli Yaya can. Yayitu Dios cꞌuyaj cashcata, cuidaj cashcata yachashpaca cushillami sintirinchij. Catij yachaipimi ñucanchijpish Jehová Diosta agradicingapaj imata ruranata yachashun.