1. Isaías 1:18-pi nishca shinaca ¿Jehová Diosca arrepintirijcunataca imatataj nin?

 JEHOVÁ DIOS ñucanchijta Ruraj, mandashcacunata cuj, alli Juez cashpapish ñucanchijta achcata cꞌuyaj Yayami can (Salmo 100:3; Isaías 33:22). Chaimantami shungumanta arrepintirijpica paica perdonasha nin (Salmo 86:5). Jehová Diosca: “Cancunapaj juchacuna amsa puca cajpipish, rasu shina yurajllata yurajyachishcami canga” nircami (Isaías 1:18). Caita yachashpami tranquilos sintirinchij.

2. ¿Shujtajcunahuan alli apanacungapajca imatataj rurana canchij?

² Tucuicuna juchayuj cashcamantami maipica shujtajcunata llaquichinchij (Santiago 3:2). Chaimantami shujtajcunahuan alli apanacungapajca shungumanta perdonanata yachana canchij (Proverbios 17:9; 19:11; Mateo 18:21, 22). Jehová Diosca shujtajcunata perdonachunmi munan (Colosenses 3:13). Ima shinami Jehová Dios ñucanchijta shungumanta perdonan, chashnallatajmi ñucanchijpish shujtajcunata perdonana canchij (Isaías 55:7).

3. ¿Cai yachaipica imallatataj yachashun?

³ Cai yachaipica Jehová Dios shina shujtajcunata perdonai tucushcatami ricushun. Shinallataj cai catij tapuicunatapishmi yachashun. ¿Jatun juchata rurashcataca imamantataj ancianocunaman huillana canchij? ¿Jehová Diosca imamantataj shujtajcunata perdonachun munan?  ¿Huaquin huauqui panicuna achcata llaquichijcunata perdonashcamantaca imatataj yachai tucunchij?

4. a) ¿Jatun juchata rurashpaca imatataj rurana canchij? b) ¿Diosca ancianocunamanca imatataj mingashca?

⁴ Shuj huauqui o shuj pani jatun juchata rurashpaca ancianocunamanmi huillana can. 1 Corintios 6:9, 10-pica imacunalla jatun jucha cashcatami ricuchin. Caicunaca Jehová Diospajca mana allicunami can. Chaimantami cashna laya jatun juchata rurashpaca Jehová Diosta perdonachun mañana canchij. Ancianocunamanpishmi huillana canchij (Salmo 32:5; Santiago 5:14). ¿Caita yachaj chayashpaca ancianocunaca imatataj rurana can? Jesús ñucanchijmanta huañushcamantami Jehová Diosca ñucanchij juchacunata perdonai pudin. * Shina cashpapish ancianocunamanmi juzgana autoridadta cushca. Ancianocunaca juchata rurajtaca congregacionmanta llujshichinata o mana llujshichinatami decidina can (1 Corintios 5:12). Alli decidingapajca ancianocunaca cai catij tapuicunatami rurarina can: ¿pai munashcamantachu juchata rurarca?, ¿pacallachu juchata rurarca?, ¿ima horamantataj juchata ruracurca?, ¿shungumanta arrepentidochu can?, ¿Jehová Diosca ñachu paitaca perdonarca? (Hechos 3:19).

5. ¿Ancianocunaca alli juzgashpaca huauqui panicunataca ima shinataj ayudancuna?

⁵ Ancianocunaca Jehová Dios munashca shina juchata rurajta juzgangapajmi esforzarina can (Mateo 18:18). Juchata ruraj mana arrepintirijpica ancianocunaca congregacionmantami llujshichina can. Chashnami shujtaj huauqui panicunapish juchapi ama urmachun ayudancuna (1 Corintios 5:6, 7, 11-13; Tito 3:10, 11). Shinallataj juchata ruraj arrepintirichun, Jehová Diospajman cutin tigrachunmi ayudancuna (Lucas 5:32). Ancianocunaca Jehová Diostaca arrepintirijcunata ayudachun, sinchiyachichunpishmi mañancuna (Santiago 5:15).

6. ¿Congregacionmanta llujshichishcacunaca Jehová Dios perdonachunca imatataj rurana can?

⁶ Juchata ruraj mana arrepintirijpica ancianocunaca paita juzgashpami congregacionmanta llujshichina can. Shinallataj maijan huauqui o pani llajtapi tiyaj leycunata mana cazushpa jatun juchata rurajpica ancianocunaca autoridadcuna paita juzgachun, castigachunpishmi saquinalla can. Chai huauqui o chai pani arrepintirishca o mana arrepintirishca cajpipish ancianocunaca autoridadcuna juzgachunmi saquina can. Leycunata mana cazujpica Jehová Diosca autoridadcuna paicunata juzgachunmi saquishca (Romanos 13:4). Pero juchata ruraj shungumanta arrepintirijpi, mana allita ruranata saquijpica Jehová Diosca paita perdonangapajca listomi can (2 Crónicas 33:9, 12, 13; Lucas 15:17-24; 1 Timoteo 1:15).

7. ¿Perdonashpaca imatataj rurana canchij?

⁷ Jehová Dios juchata rurajta perdonachun o mana perdonachunca mana decidi tucunchijchu. Pero Jehová Dios alli juzganata yachashpaca tranquilosmi sintirinchij. Shinapish maijanpish ñucanchijta jatunta llaquichijpipish paita  perdonanatami decidi tucunchij. Pai perdonta mañajpi o mana perdonta mañajpipish perdonanallami canchij. Chashna perdonashpaca resentidos o pꞌiñarishca mana saquirinachu canchij. Caita pajtachingapajca achca tiempotachari minishtishun. Pero sinchi cajpipish perdonanallami canchij. 15 de septiembre de 1994-pi llujshishca La Atalaya revistapica: “Ñucanchijta achcata llaquichijta perdonashpapish pai jatun juchata rurashcataca allimi intindinchij. Pero perdonashpaca Jehová Dios paita juzgachunmi saquicunchij. Jehová Diosllami paitaca alli juzgai tucun” nircami. Jehová Diosca ñucanchijta llaquichijcunata perdonachunmi munan. Shinallataj Dioslla llaquichijcunata alli juzgai pudishcapi confiachunmi munan.

8. ¿Jehová perdonashcamantaca ñucanchijpish imatataj rurana canchij?

⁸ Jehová Dios ñucanchijta perdonashcata agradicingapajca shujtajcunatapishmi perdonana canchij. Jesusca caita intindichingapajca shuj chꞌimbapuraita churashpami parlarca. Shuj amoca paita sirvijpaj shuj jatun dibitami perdonarca. Pero cai sirvij runaca caishuj sirvijpaj ashalla dibitaca mana perdonarcachu (Mateo 18:23-35). ¿Jesusca caimantaca imatataj yachachisha nirca? Jehová Diosca cai amo shinami ñucanchijta llaquishpa cutin cutin achca juchacunata perdonashca. Chashnallatajmi ñucanchijpish shujtajcunata perdonana canchij (Salmo 103:9). Achca huatacuna huashamanca La Atalaya revistapica: “Jesusmantami Jehová Diosca ñucanchijtaca cutin cutin perdonashca. Chaimantami ñucanchijpish shujtajcunata shungumanta perdonashpa catina canchij” nircami.

9. ¿Jehová Diosca picunatataj perdonan?

⁹ Shujtajcunata llaquishpa perdonajpica Jehová Diosca ñucanchijtapishmi perdonanga (Mateo 5:7; Santiago 2:13). Jehová Dios ñucanchijta perdonachunca shujtajcunata perdonana cashcatami Jesusca yachachirca (Mateo 6:14, 15-ta liyipai). Shuj cutinca Jehová Diosca Job shujtajcunata perdonashcamantami paitaca achcata bendiciarca. Elifaz, Bildad y Zofar shuti runacunaca llaquichij shimicunahuanmi Jobtaca achcata llaquichishcacuna carca. Chaimi Jehová Diosca Jobtaca paicunamanta mañachun nirca. Job paicunata ama llaquichichun mañajpica Jehová Diosca Jobtaca bendiciarcami (Job 42:8-10).

10. ¿Imamantataj mana resentidos saquirina canchij?

¹⁰ Resentido canaca mana valinchu. Resentidos saquirinaca shuj jatun cargata apacuj shinami can (Efesios 4:31, 32-ta liyipai). Chaimantami Jehová Diosca: “Pꞌiñarinata saqui. Pꞌiñarinata cungari” nishpa consejan (Salmo 37:8). Cai consejota catishpaca ñucanchij cuerpopipish, ñucanchij shungupipish allimi sintirishun (Proverbios 14:30). Cutin resentido canaca shuj venenota ubyacuj layami can. Ñucanchijllatajmi llaquilla causashun. Pero shungumanta perdonashpaca tranquilosmi sintirishun. Jehová Diostapish cushilla sirvishpami catishun (Proverbios 11:17).

11. ¿Vengarinamantaca Bibliapica imatataj yachachin?

¹¹ Mana vengarinachu canchij. Shujtajcuna  llaquichishcamanta vengarichunca Jehová Diosca mana munanchu (Romanos 12:19-21-ta liyipai). Juchayujcuna cashcamantami Jehová Dios shinaca shujtajcunataca mana alli juzgai tucunchij (Hebreos 4:13). Huaquinpicarin pꞌiñarishca cashcamantami imata ruranataca mana alli decidi tucunchij. Chaimantami Santiago 1:20-pica: “Pꞌiñarij runaca mana Dios munashca shina cashcata ruranchu” nin. Caita intindishpaca Jehová Dios llaquichijcunata alli juzganapimi confiana canchij. Minishtirijpica paillatajmi paicunata castiganga.

12. ¿Jehová Dios tucuita allichinapi confiashcataca ima shinataj ricuchinchij?

¹² Shujtajcunata perdonashpaca Jehová Dios tucuita allichinapi confiashcatami ricuchinchij. Paraíso Allpapica llaqui cosascunataca ña mana yuyarishunchu. Chaimantami contentos causashun (Isaías 65:17). Pero ¿achcata llaquichijpipish perdonai tucunchijchu? Huaquincuna imata rurashcata ricushun.

13, 14. ¿Tonymanta, Josemantaca imatataj yachanchij?

¹³ Tauca huauqui panicunaca achcata llaquichijcunatami perdonashcacuna. ¿Chashna perdonashpaca ima shinataj beneficiarishcacuna?

¹⁴ Filipinas llajtapi causaj huauqui Tonypi yuyashun. * Pai manaraj Testigo cashpaca José nishca runa paipaj huauquita huañuchishcatami yachaj chayarca. Chaimi Tonyca, “José carcelmanta llujshijpica paita huañuchishatajmi” nirca. Tonyca José carcelmanta llujshijpi paita huañuchingapajmi shuj pistolata randirca. Pero chai tiempopica testigo de Jehovacunahuan Bibliamantami yachai callarirca. Tonyca: “Bibliata yachai callarishpaca achcata colerana mana valishcatami cuentata curcani. Chaimi cambiai callarircani” nircami. Tonyca bautizarishca qꞌuipaca ancianomi tucurca. Josepish testigo de Jehová tucushcata yachaj  chayashpaca achca contentomi sintirirca. Tonyca Josehuan cutin tupashpaca “cantaca ñami perdonarcani” nircami. Chashna perdonashcamantami Tonyca dimastij cushilla sintirirca. Jehová Diospish paitaca achcatami bendiciarca.

15, 16. ¿Peter y Suemantaca imatataj yachanchij?

¹⁵ 1985 huatapica Peter y Sue tandanacuipi cajpica shuj runaca shuj bombatami tugyachirca. Cai llaqui atrasomantami pani Sueca ña mana mutqui tucurca, ña mana alli ricui tucurca, ña mana alli uyai tucurca. Huauqui Peter, pani Sueca “¿imamantashi shina llaquichirca?” nishpami tapurijcuna carca. Achca huatacuna huashaca bombata churajtaca tucui vidata carcelpi cachunmi condenarcacuna. Paica mana testigo de Jehovachu carca. Qꞌuipaca Peter y Suetaca “¿chai runataca ñachu perdonashcanguichij?” nishpami tapurcacuna. Paicunaca: “Cushilla causangapajca Jehová Diosca mana pꞌiñarishca, mana resentirishca cana cashcatami yachachishca. Chaimantami callarimanta cai runata perdonangapaj ayudahuai nishpa Yayitu Diosta mañarcanchij” nircacunami. *

¹⁶ Peter y Suepajca perdonanaca mana facilchu cashca. Paicunaca: “Cai llaqui atrasomanta ñuca huarmi cutin sufricushcata ricushpaca coleranayanmi. Pero ima tucushcata yuyaricunallapaj randica chaita cungaringapajmi esforzarinchij. Chashnami tranquilo sintirinchij. Ashtahuanpish cai runa testigo de Jehová tucujpica shungumantami alli chasquishun. Shungumanta perdonashpaca shuj cargata saquicuj shinami tranquilos sintirinchij. Jehová Dios tucuita allichinata yachashpacarin dimastij cushillami sintirinchij” nincunami.

17. ¿Pani Mayramantaca imatataj yachanchij?

¹⁷ Mayraca ña cazarashca cashpa, ishqui huahuacunata charishpami Jehová  Diostaca rijsirca. Pero paipaj cusaca Bibliamanta yachanataca mana munarcachu. Qꞌuipacarin shujtaj huarmihuanmi rirca. Mayraca: “Ñuca cusa familiata saquijpica dimastij llaqui, culpable, pꞌiñarishcami sintirircani. Huaquin quillacunata chashna sintirishpa Jehová Diosmantapish, shujtajcunamantapish caruyacushcatami cuentata curcani” ninmi. Cunanca Mayraca paipaj ñaupa cusahuanca ña mana resentidachu can. Ashtahuanpish paipish Jehová Diosmanta yachachunmi shuyan. Shamuj punllacunapi alaja causai tiyanatapishmi yuyan. Paipaj ishqui churicunata pailla huiñachishca cashpapish cunanca paicunahuan, paipaj churicunapaj familiahuanmi Jehová Diosta contentos sirvicuncuna.

18. ¿Jehová Dios tucuicunata alli juzganataca imamantataj crinchij?

¹⁸ Jehová Diosca alli Juezmi can. Paica ima alli cashcata, ima mana alli cashcataca allimi yachan (Génesis 18:25; 1 Reyes 8:32). Chaimantami tucuicunataca alli juzganga (Romanos 14:10-12). Caita yachashpaca tranquilosmi sintirinchij.

19. ¿Jehová Diosca alli Juez cashcamantaca imatataj ñalla ruranga?

¹⁹ Jehová Diosca ñallami tucui llaquicunata tucuchinga. Chaipica ima llaquita charishcataca ña mana cutin yuyarishunchu (Salmo 72:12-14; Apocalipsis 21:3, 4). Pero chai punlla chayangacamaca Jehová Dios shina shujtajcunata perdonashpa catingapajmi esforzarina canchij.