1. ¿Isaiasca israelitacunamanca imatataj yachachisha nirca?

 PROFETA Isaiasca Jehová Diosca “imatapish pajtachij” Diosmi can nircami. Hebreo rimaipica “imatapish pajtachij” ninapaj randica “amén” ninmi (Isaías 65:16). “Amén” shimica “chashna cachun” o “seguro” nisha ninmi. Bibliapica huaquin versocunapica Jehová Dios, Jesús imalla nishcacuna, imalla rurashcacuna ciertotaj cashcata ricuchingapajmi amén nin. Shinashpaca Isaiasca Jehová Dios tucuita pajtachij, mana llullaj cashcatami israelitacunaman yachachisha nirca. Jehová Diosca tucui pai nishcacunata pajtachishpami mana llullaj cashcata ricuchishca.

2. a) ¿Jehová Diospaj nishcacunapica imamantataj confiana canchij? b) ¿Cai yachaipica ima tapuicunatataj cutichishun?

² ¿Jehová Diospaj nishcacuna shamuj punllacunapi pajtarinataca seguros cai tucunchijchu? Profeta Isaías 800 huatacuna causashca qꞌuipaca apóstol Pabloca Jehová Diospaj nishcacunapi imamanta confiana cashcatami nirca. Paica: ‘Diosca manataj llullanchu’ nircami (Hebreos 6:18). Caipi yuyashun. ¿Shuj pugyullamantataj mishqui yacupish, salado yacupish llujshi tucunchu? Mana. ¿Caimantaca imatataj yachanchij? Jehová Diosca mishqui yacullata cuj pugyu shinami verdadllata nin. Paica ima horapish manataj llullanchu. Chaimantami shamuj punllacunapaj pai imalla nishcacunapica tucui shunguhuan crina canchij. Cai yachaipica cai catij tapuicunatami cutichishun: ¿Jehová Diosca shamuj punllacunapica imallatataj  rurasha nin? ¿Paipaj nishcacuna pajtarinataj cashcata ricuchingapajca paica imatataj rurashca?

3. a) ¿Diosta sirvijcunaca ima profecía pajtarichuntaj shuyacunchij? (Apocalipsis 21:​3, 4). b) ¿Maijan gentecunaca Apocalipsis 21:​3, 4-pi nishcacunata liyishpaca imatataj yuyancuna?

³ Diosta sirvijcunaca shuj profecía pajtarichunmi shuyacunchij. Cunanmi chaimanta yachashun (Apocalipsis 21:​3, 4-ta liyipai). Jehová Dios huillashca shinaca shamuj punllacunapica “huañuica ña mana tiyangachu. Llaquipish, huacaipish, nanaipish ña mana ashtahuan tiyangachu”. Diosmanta huillacushpaca cai Allpa shuj Paraíso tucujpi ima shina causanata yachachingapajmi cai versota ricuchinchij. Shinapish maijan gentecunaca cai versota liyishpaca “¿chaipi nishcacunaca ciertochushi canga?” nincunami.

4. a) ¿Jehová Diosca Apocalipsis 21:​3, 4-pi nishcacunata quillcachicushpaca imatataj yacharca? b) ¿Jehová Diosca shamuj punllacunapi ima bendicioncunata cugrishcata huillacushpaca imatataj rurarca?

⁴ Jehová Dios Apocalipsis 21:​3, 4-pi nishcacunata apóstol Juanman quillcachicushpaca shamuj punllacunapi paipaj sirvijcuna chai versocunahuan predicana cashcatami yacharca. Shinallataj paica pai rurasha nishcacuna pajtarinataj cashcata crina achcacunapaj sinchi canatapishmi yacharca (Isaías 42:9; 60:2; 2 Corintios 4:​3, 4). Shinashpaca ¿Apocalipsis 21:​3, 4-pi nishcacuna pajtarinataj cashcata gentecuna crichunca ima shinataj ayudai tucunchij? ¿Ñucanchijpish Diospaj nishcacunapi tucui shunguhuan cringapajca imatataj rurana canchij? Jehová Diosca shamuj punllacunapi ima bendicioncunata cugrishcata huillacushpaca imamanta chai promesacunapi crina cashcatami alli intindichirca. Cunanmi chaimanta yachashun.

5. ¿Diospaj promesacuna pajtarinataj cashcata crichunca ima versocunataj ayudan?

⁵ Apocalipsis 21:​5, 6-pi nishcacunami Jehová Diospaj nishcacuna pajtarinataj cashcata crichun ayudan. Chaipica: “Jatun tiyarinapi tiyacujca: ‘¡Ricui! Tucuitami mushujta ruracuni’ nircami. Shinallataj paica: ‘Cai shimicunata quillcai. Cai shimicunaca crinalla, mana llulla shimicunami can’ nircami. Paica: ‘¡Cai shimicunaca ñami pajtarishca! Ñucami Alfa y Omega cani. Ñucami callaripish, tucuripish cani’” ninmi.

6. ¿Apocalipsis 21:​5, 6-pi nishcacunaca imamantataj Jehová Diospaj promesacunapi crichun ayudan?

⁶ ¿Imamantataj Apocalipsis 21:​5, 6-pi nishcacunaca Jehová Diospaj promesacuna pajtarinataj cashcata crichun ayudan? Apocalipsis 21:​3, 4-pica Jehová Dios shamuj punllacunapi imata ruranatami liyircanchij. Pero verso 5, 6-pi nishcacunaca Jehová Dios pai rurasha nishcacuna pajtarinataj cashcata ricuchingapaj shuj papelpi firmacushca shinami can. Chaitaca Apocalipsis... ¡se acerca su magnífica culminación! nishca libropimi intindichin. b Cunanca chai versocunapi nishcacuna imallata nisha nishcatami yachashun.

7. a) ¿Apocalipsis 21:​5-pica pitaj parlashpa callarin? b) ¿Apocalipsis 21:​5-pi nishcacunata Jehová Dios nishcata yachashpaca ima shinataj sintirinchij?

⁷ Apocalipsis 21:​5-paj callari partepica “jatun tiyarinapi tiyacuj” parlai callarishcatami nin. Paica Jehovami can. Shinashpaca chai versopi nishcacunataca shuj ángel o Jesusca mana nircacunachu. Jehová Diosllatajmi nirca. Apocalipsis libropica Jehová Diosca quimsa cutinllami directamente parlan. Paica manataj llullanchu (Tito 1:2). Chaimantami pai cusha nishcacuna pajtarinataj cashcata seguros canchij.

8. ¿Jehová Diosca pai rurasha nishcacuna pajtarinataj cashcata ricuchingapajca imatataj nirca? (Isaías 46:10).

⁸ Shinallataj Apocalipsis 21:​5-pica: “¡Ricui!” nishpami callarin. Apocalipsis libropica achca cutincunami chai shimica ricurin. Shuj libropica cai shimimanta parlashpaca: “Bibliapica imata nigrishcata atencionhuan uyachunmi huaquinpica ¡Ricui! nishpa callarin” ninmi. ¿Jehová Diosca “¡Ricui!” nishca qꞌuipaca imatataj nirca? Paica: “Tucuitami mushujta ruracuni” nircami. Shamuj punllacunapi ima tucunata parlashpapish Jehová Diosca chaicunata ña ruracushca layami parlan. ¿Imamanta? Pai rurasha nishcacuna pajtarinataj cashcata ricuchingapajmi chashna parlarca (Isaías 46:​10-ta liyipai).

9. a) ¿Jehová Diosca “tucuitami mushujta ruracuni” nishpaca imatataj nisha nirca? b) ¿Cunan punllacunapi tiyaj “jahua pacha”, “Allpahuanca” imataj tucunga?

⁹ Shinallataj Jehová Diosca Apocalipsis 21: 5-pica: “Tucuitami mushujta ruracuni” nircami. Chaita nishpaca paica millai ruraicunata tucuchishca qꞌuipa mushuj ruraicunata ruragrishcatami nicurca. ¿Puntapica Jehová Diosca imatataj tucuchinga? Apocalipsis 21:​1-pica: “Ñaupaman tiyashca jahua pachapish, ñaupaman tiyashca allpapish chingarishcami carca” ninmi. Caipica ñaupaman tiyashca jahua pacha nishpaca cai Allpa pachata mandacuj gobiernocunamantami parlacun. Chai gobiernocunataca Diablo, demoniocunami mandacun (Mateo 4:​8, 9; 1 Juan 5:19). Shinallataj Bibliapica huaquinpica allpamanta parlashpaca gentecunamantami parlan (Génesis 11:1; Salmo 96:1). Chaimantami Apocalipsis 21:​1-pi “ñaupaman tiyashca allpa” nishpaca cunan punllacunapi tiyaj millai gentecunamanta parlacushcata intindinchij. Shinashpaca Jehová Diosca gobiernocunata, millai gentecunata ashallata allichinapaj randica libremi paicunataca tucuchinga. Chai huashaca mushuj allpata, mushuj jahua pachatami ruranga. ¿Chaica imatataj nisha nin? Shuj mushuj gobierno tiyanata, chai gobierno alli gentecunallata mandana cashcatami nisha nin.

10. ¿Diosca imallatataj mushujta ruranga?

¹⁰ ¿Jehová Diosca “tucuitami mushujta ruracuni” nishpaca ima ashtahuantaj nisha nirca? (Apocalipsis 21:5). Paica cai Allpapi, jahua pachapi tucui imalla tiyashcacunata allichinata, paita sirvijcuna cutin jucha illajcuna tucuchun ayudanatami nisha nirca. Profeta Isaías huillashca shinaca cai Allpaca Edén huerta shinami sumaj Paraíso tucunga. Shinallataj gentecunaca mushujyachishcami cashun. Por ejemplo, Jehová Diosca mana puri tucujcunata, mana ricujcunata, mana uyajcunatami alliyachinga. Huañushcacunapishmi causachishca cangacuna (Isaías 25:8; 35:​1-7).

11. ¿Diosca Juanmanca imata rurachuntaj nirca?

¹¹ Shinallataj Jehová Diosca Juantaca: “Cai shimicunata quillcai. Cai shimicunaca crinalla, mana llulla shimicunami can” nishpami mandarca (Apocalipsis 21:5). Diosca chai shimicunata quillcachun nishpapish imamanta chai shimicunata quillcana cashcatami Juanmanca nirca. Paica: “Cai shimicunaca crinalla, mana llulla shimicunami can” nircami. Shinashpaca Jehová Dios imalla nishcacunaca tucuimi pajtaringa. Apóstol Juan chai shimicunata quillcashcamantaca cushillami sintirinchij. Pai quillcashcata liyishpami Jehová Dios shuj Paraíso tiyanataj cashcata nishcata intindinchij. Shinallataj chaicunapi yuyashpami tranquilos sintirinchij.

12. ¿Jehová Diosca imamantataj “¡Cai shimicunaca ñami pajtarishca!” nirca?

¹² Chai huashaca Jehová Diosca: “¡Cai shimicunaca  ñami pajtarishca!” nircami (Apocalipsis 21:6). Jehová Dios rurasha nishcacuna pajtarichunca imapish mana jarcai tucunchu. Chaimantami Paraisomanta parlashpaca tucui pai rurasha nishcacuna ña pajtarishca shina parlarca. ¿Chaita nishca qꞌuipaca paipaj nishcacuna pajtarinataj cashcata ricuchingapajca Yaya Diosca imatataj ashtahuan nirca?

13. ¿Jehová Diosca imamantataj “ñucami Alfa y Omega cani” nirca?

¹³ Ñajaman nishca shinaca Apocalipsis libropica Jehová Diosca quimsa cutinmi directamente parlarca (Apocalipsis 1:8; 21:​5, 6; 22:13). Chai quimsa cutincunapica Jehová Diosca: “Ñucami Alfa y Omega cani” nirca. Griego rimaipica callari letraca alfa nishcami can. Cutin último letraca omega nishcami can. Shinashpaca Jehová Diosca “ñucami Alfa y Omega cani” nishpaca imata rurai callarishpaca paillataj chaita rurashpa tucuchij cashcatami nisha nirca.

14. a) ¿Jehová Diosca ima horataj “Alfa” nirca? ¿Ima horataj “Omega” ninga? b) ¿Génesis 2:​1-3-pica imatataj yachachin?

¹⁴ Jehová Diosca Adán y Evata rurashca qꞌuipaca gentecunapaj, cai Allpa pachapaj paipaj munai maijan cashcatami nirca. Bibliapica: “Diosca paicunata bendiciashpaca: ‘Achca huahuacunata charishpa, mirarishpa allpapi jundarichij. Cai allpatapish cuidaichij’ nircami” ninmi (Génesis 1:28). Shinaca Jehová Diosca paipaj munai maijan cashcata huillashpaca “Alfa” nicuj shinami carca. Adán y Evapaj huahua huahuacunaca mirarishpami cai allpataca jundachina carcacuna. Shinallataj tucui Allpa pachataca Paraisotami rurana carcacuna. Chaicunata rurashpa tucuchijpica Jehová Dios “Omega” nicushca shinami canga. ¿Jehová Dios cai Allpapi, jahua pachapi tucui imalla tiyashcacunata rurashpa tucuchishpaca  paipaj munai pajtarinataj cashcata ricuchingapajca imatataj rurarca? Chaitaca Bibliapimi yachai tucunchij (Génesis 2:​1-3-ta liyipai). Bibliapi nishca shinaca Jehová Diosca séptimo punllatami paipaj cachun chꞌicanyachirca. ¿Chaica imatataj nisha nin? Gentecunapaj, cai Allpapaj Jehová Dios imata munashcaca pajtarinataj cashcatami nisha nin. Chaica séptimo punlla tucurijpimi pajtaringa.

15. ¿Adán y Eva Jehová Diosta mana cazujpica Diabloca imatataj yuyashcanga?

¹⁵ Adán y Evaca Jehová Diosmanta caruyashpaca juchayujcunami tucurcacuna. Chaimantami huahuacunata charijpica paicunapish juchayujcuna huacharircacuna, qꞌuipacarin huañurcacunami (Romanos 5:12). Pero, ¿Adán y Eva Jehová Diosta mana cazujpipish Diospaj munaica pajtari tucurcachu? Diospaj munai mana pajtarishca cajpica Jehová Dios “Omega” nichun Diablo jarcacushca shinami canman carca. Diabloca Jehová Dios chai jatun problemata allichingapaj mana tanto rurai tucushcatami yuyashcanga. Tal vez paica “Jehová Diosca Adán y Evata tucuchishpa mushuj cꞌarita, mushuj huarmitami Allpapi churanga” nishpami yuyashcanga. Pero chaita rurashca cajpica Diabloca “Diosca llullami can” nishpami paitaca juchachinman carca. ¿Imamanta? Génesis 1:​28-pi nishca shinaca Adán y Evapaj huahuacunami cai allpataca jundachina carcacuna.

16. ¿Diabloca ima ashtahuantaj yuyashcanga?

¹⁶ Shinallataj Diabloca ‘Jehová Dios Adán y Eva huahuacunata charichun saquijpipish chai huahuacunaca jucha illajcunaca nunca mana tucungachu’ nishpami yuyashcanga (Eclesiastés 7:20; Romanos 3:23). Chashna tucushca cajpica Diabloca ‘Jehová Diosca paipaj munaitaca mana pajtachi tucushcachu’ nishpami paitaca juchachinman carca. ¿Imamanta? Jehová Diospaj munai pajtarichunca cai Allpaca jucha illaj gentecunahuanmi jundarina carca.

17. a) ¿Diosca paipaj munaita pajtachingapajca imatataj rurarca? (Fotomantapish parlapai). b) ¿Diospaj munaica ima shinataj pajtaringa? (Fotomantapish parlapai).

¹⁷ Jehová Diosca Adán y Eva mana cazujpipish paipaj munai pajtarichunca imata ruranatami yacharca. Diabloca Jehová Dios chaita ruranataca mana yuyarcallapishchu (Salmo 92:5). Diosca Adán y Eva huahuacunata charichunmi saquirca. Chashnami mana llullaj cashcata, shujtajcuna jarcasha nijpipish paipaj munaita pajtachij cashcata ricuchirca. Jehová Diosca paipaj munaita pajtachingapajca shuj mirai shamuna cashcatami huillarca. Chai miraica Adán y Evapaj huahua huahuacunata quishpichishpami  Diospaj munai cai Allpapi pajtarichun ayudana carca (Génesis 3:15; 22:18). Chai miraica Jesusmi can. Diabloca Jehová Dios paipaj cꞌuyashca Churita cushpa gentecunata quishpichinataca mana yuyashcachu canga. ¿Imamanta? Diosca yallitaj cꞌuyaj cashcamantami paipaj Churita curca (Mateo 20:28; Juan 3:16). Shinapish Diabloca paillapi yuyaj cashcamantami Jehová Dios shinaca cꞌuyaitaca mana charin. ¿Jesús huañushcamantaca ima bendicioncunallatataj charishun? Mil huatacuna tucurijpica Diosta cazuj Adán y Evapaj huahua huahuacunaca cai Allpapimi huiñai huiñaita causangacuna. Chashnami Diospaj munaica pajtaringa. Diospaj munai pajtarijpica Jehová Dios “Omega” nicushca shinami canga.

18. ¿Jehová Dios rurasha nishcacuna pajtarinataj cashcataca imamantataj seguros canchij? (“ ¿Jehová Dios rurasha nishcacunapica imamantataj crina canchij?” nishca recuadrota ricui).

¹⁸ Cai yachaipica cai Allpa Paraíso tucunata imamanta seguros cai tucushcatami yachashcanchij. ¿Shujtaj gentecunapish seguros cachunca ima shinataj ayudai tucunchij? Puntapica Jehová Diosllataj cai Allpa Paraíso tucunata huillashcatami ricuchina canchij. Apocalipsis libropica Jehová Diosmanta parlashpaca: “Jatun tiyarinapi tiyacujca: ‘¡Ricui! Tucuitami mushujta ruracuni’ nircami” ninmi. Shinaca Jehová Diosca pai rurasha nishcatami pajtachisha nin. Chaita pajtachingapajca paica tucui poderta, alli yachaitami charin. Shinallataj Jehová Diosca pai rurasha nishcacuna pajtarinataj cashcatami seguro can. Chaimantami chaicuna manaraj pajtarishca cajpipish ña pajtarishca shina parlan. Paica: ‘Cai shimicunaca crinalla, mana llulla shimicunami can. ¡Cai shimicunaca ñami pajtarishca!’ ninmi. Ashtahuanpish Jehová Dios imata rurai callarishpaca paillataj chaita rurashpa tucuchij cashcatami gentecunamanca yachachina canchij. Diosca pai rurai callarishcata tucuchij cashcamantami “ñucami Alfa y Omega cani” nin. Paica Diablo llulla cashcataca ñallami ricuchinga.

19. ¿Huaquin gentecuna cai Allpa shuj Paraíso tucunata mana crijpica imatataj rurai tucunchij?

¹⁹ Jehová Diospaj promesacuna pajtarinataj cashcata shujtajcunaman yachachishpaca, ñucanchijpishmi chai promesacuna pajtarinataj cashcata seguros cashun. Apocalipsis 21:​4-pi nishcata liyishca qꞌuipaca maijancunaca chai versopi nishcacunaca manachari pajtaringa nijpica ¿imatataj rurana canchij? Tal vez verso 5 y 6-pi nishcatami intindichi tucunchij. Chai versocunapi nishcacunaca Jehová Dios pai rurasha nishcacunata pajtachinataj cashcata ricuchingapaj shuj papelpi firmacushca shinami can (Isaías 65:16).