INDONESIAPI tiyaj Sangir Besar islapica quimsa panicunami playapi trabajajcuna carca. Paicunataca chai islapi gentecunaman Bibliamanta yachachij cashcamantami rijsijcuna carca. Pero chai tiempopica paicunaca shujtaj trabajotapishmi ruracurcacuna.

Paicunaca mar yacuman yaicushpami rumicunata llujchijcuna carca. Huaquin rumicunaca jatuncunami carca. Chai rumicunataca shuj martillohuan tacashpami uchilla pedazocunata ruraj carca. Chai qꞌuipaca baldecunapi churashpami paicunapaj huasiman apajcuna carca. Chai rumicunata camioncuna apachunmi sacocunapi churajcuna carca. Gentecunaca chai rumicunahuanmi ñancunata rurajcuna carca.

Pani Huldaca shujtajcunata yallimi trabajaj carca. Chaipi ganashca cullquihuanca paipaj familiatami mantinij carca. Pero paica shuj tabletta randingapajpishmi asha cullquita ahorrai callarirca. “Chai tabletpica JW Library^® aplicaciontami descargasha. Bibliata ashtahuan alli intindingapaj videocunata, shujtaj publicacioncunatapishmi ricui tucusha. Shinallataj gentecunamanmi Bibliamanta ashtahuan yachachi tucusha” nishpami cullquita ahorrai callarirca.

Chaimantami trabajashca qꞌuipaca ishqui horascunahuan trabajashpa saquirirca. Shuj quilla chaupita chashna trabajashpami shuj uchilla camionpi rumicunata jundachirca. Chai rumicunata cꞌatushca qꞌuipaca shuj tablettami randirca.

Pani Huldaca: “Achca rumicunata pꞌaquishcamantami shaicushca, achca nanaihuan carcani. Pero ñuca tabletpi tandanacuicunaman ringapaj, huillanaman llujshingapaj prepararishpaca tucui chai nanaicunatami cungarircani” nircami. Pani Huldaca tabletta charishcamantami pandemia horasca tandanacuicunaman, huillanamanpish conectari pudirca. Pai tabletta randi pudishcamantami cushilla sintirinchij.