Casi tucuicunami huaquin ruraicuna mana alli cashcata achijta yachanchij. Por ejemplo, huañuchina, huahuacunata, shujtajcunata violana mana alli cashcataca allimi yachanchij. Shinapish huaquincunaca aichapi chayarinamanta, honrado canamanta, huahuacunata ima shina huiñachinamanta, ima alli cashcata ima mana alli cashcata pi mana yachanchu nincunami. Chaimantami imatapish agllanallami canchij nincuna. Gentecunaca paicuna yuyashca shinami agllancuna. Maipica shujtajcuna nishcata uyashpami decidincuna. ¿Chashna decidinaca allichu canga?

Maipica ñucanchij concienciata uyashpami alli cashcata o mana alli cashcata agllanchij (Romanos 2:​14, 15). Uchilla huahuacunapish uchillamantapachami ima mana alli cashcata cuentata cuncuna. Huaquinpicarin mana allita rurashcamantami mana alli sintirincuna. Ña huiñashpa catijpica ñucanchij concienciaca cambiashpami catin. Por ejemplo, ñucanchij familia, profesorcuna, ñucanchij comunidadpi causaj gentecuna, religionpish ima nishcacunami ñucanchij conciencia decidichun yachachin. Chaimantami ñucanchij conciencia nishca shina decidinchij.

Ñucanchij conciencia alli yachachishca cajpica ñucanchijca shujtajcuna ima shina sintirishcatami intindishun. Agradicishcatapishmi ricuchishun, shujtajcunata llaquishpami paicunata ayudangapaj allita rurashun. Chashnallataj ñucanchij cꞌuyashca familiata, amigocunatapish ama llaquichichun, ñucanchijllataj ama malpi saquirichunpishmi ñucanchij concienciaca ayudan.

¿Ñucanchij yuyashca shina decidinaca siemprechu alli can? Garrick shuti jovenca: “Ñuca yuyashca shinami decisioncunata agllasha nircani” nircami. Pero cai jovenca pai yuyashca  shina decidishcamantami mana alli causai callarirca. Paica huainayanapi, drogarinapi, machanapimi urmarca, pꞌiña runapishmi tucurca. Chaimi paica: “Amsapi causacuj shinami causacurcani” nirca.

Huaquinpica ñucanchij conciencia nishca shina o shujtajcuna yuyashca shinami decidinchij. Shujtajcuna yuyashca shina decidishpami paicunapaj experienciamanta, alli yachaimantapish yachai tucunchij. Chashnallataj familiacuna, amigocuna, vecinocuna consejashcata rurajpica ñucanchijtami respetancuna.

¿Shujtajcuna yuyashca shina decidinaca siemprechu alli can? Priscilaca jovenraj cashpa, manaraj cazarashpami paipaj compañerocuna shina aichapi chayarij carca. Shinapish paica: “Shujtajcuna rurashca shina rurashpaca mana allimi sintirircani. Chaimantami mana alli decisioncunata agllashpa llaquipi urmarcani” nircami.

Ñucanchij conciencia yuyashca shina, shujtajcuna yuyashca shina decidinaca ima mana malochu can. Shinapish chashna decidishpami huaquinpica mana alli decisioncunata agllanchij, ñucanchijllataj llaquipi urmanchij, shujtajcunatapishmi llaquichinchij (Proverbios 14:12). Maipicarin ñucanchij yuyashcacuna, gentecunapaj yuyashcacunapish cambiai tucunmi. Por ejemplo, ñaupa punllacunapica huaquin ruraicunaca mana allimi carca. Pero cunanca alli cashca shinami ricurin. Cutin ñaupa alli ruraicunaca cunanca mana alli cashca shinami ricurin.

Alli decisioncunata agllangapaj, qꞌuipa chai decisioncunamanta mana arrepintiringapajca, ¿maipitaj alli consejocunata mashcai tucunchij?

Alli decisioncunata agllangapajca shuj alli guiami tiyan. Cai guiaca tucuicunatami ayudan, tucui lugarcunapimi valishca can. Catij yachaipimi alli decisioncunata agllangapaj maipi consejocunata mashcai tucushcata ricushun.