Alli decisioncunata agllangapajca Bibliatami estudiana canchij
Bibliapi tiyaj consejocunaca achca gentecuna alli causachunmi ayudashca.
1. Cusa huarmi alli causachun
Gentecunaca cazado causaimanta cusa huarmi cushilla causangapaj imata ruranamanta chꞌican chꞌican yuyaicunatami charin.
BIBLIACA CAITAMI YACHACHIN: “Cada unomi huarmitaca quiquin cꞌuyarij shinallataj cꞌuyana can. Cutin huarmica paipaj cusatami shungumanta respetana can” (Efesios 5:33).
CAITAMI NISHA NIN: Diosmi matrimoniotaca callarichirca. Chaimantami cusa huarmi cushilla causangapaj imata minishtishcataca pailla yachan (Marcos 10:6-9). Cusapi o huarmipi yuyashpa imatapish rurashpaca ishquindijllatajmi cushilla causangacuna. Shuj cusaca paipaj huarmita cꞌuyaihuan tratashpaca paimanta preocuparishcatami ricuchin. Cutin huarmica paipaj cusata alli shimicunahuan parlashpa, paita apoyashpaca respetashcatami ricuchin.
BIBLIAPAJ CONSEJOCUNAMI AYUDASHCA: Vietnam llajtamanta Quang y Thi shuti cusa huarmica puntapica mana alli matrimoniotami charircacuna. Cusaca paipaj huarmitaca maltratashpallami charij carca. Paica: “Ñuca huarmi ima laya sintirishcataca mana yuyarcanichu. Chaipaj randica imapaj mana valishcatami sintichij carcani” ninmi. Chaimantami paipaj huarmica divorciarisha nirca. Paica: “Ñuca cusapi mana confiashcata, paita mana respetai tucushcatapishmi sintircani” ninmi.
Cai cusa huarmica Bibliata asha asha yachashpami Efesios 5:33-pi ima nishcata pajtachi callarircacuna. Cusaca: “Cai versomi ñuca huarmita cꞌuyaihuan tratachun ayudashca. Shinallataj paiman ima minishtishcata cuchun, pai ima shina sintirishcata intindichunpishmi ayudashca. Chaita rurashcamantami ñuca huarmica paita cꞌuyashcata, respetashcata sintirin” ninmi. Cutin huarmica: “Efesios 5:33-pi ima nishcata pajtachishpa ñuca cusata respetajpica paica ñucataca cꞌuyaihuanmi cuidan” ninmi.
Caimanta ashtahuan yachangapajca jw.org paginapi Núm. 2 de 2018 Rijchari! revistapi “Ñucanchij familiahuan sumajta causashunchij” temata liyi.
2. Shujtajcunata alli tratachun
Gentecunaca shujtajcuna ima religionta charishcata, maijan llajtamanta cashcata, cꞌaripura o huarmipura cazarashcata ricushpami alli o mana alli tratancuna.
BIBLIACA CAITAMI YACHACHIN: “Tucui laya gentecunata respetaichij” (1 Pedro 2:17).
CAITAMI NISHA NIN: Bibliapica shujtaj llajtamanta cajcunata, cꞌaripura huarmipura cazarashca gentecunata mana ricunayachina cashcataca mana yachachinchu. Chaipaj randica maijan llajtamanta cajpipish, huajcha o charij cajpipish tucui laya gentecunata cꞌuyachunmi yachachin (Hechos 10:34). Shujtajcuna ñucanchij yuyashca shina mana yuyajpi, mana rurajpipish ñucanchijca cꞌuyaihuan, respetohuanmi paicunata tratana canchij (Mateo 7:12).
BIBLIAPAJ CONSEJOCUNAMI AYUDASHCA: Danielmanca, Asiapi causaj gentecunaca cambaj llajtapaj contrami can nishpami yachachircacuna. Chaimi Danielca Asiamanta gentecunata mana ricunayachishpa, shujtajcunapaj ñaupajpi sinchita rimaj carca. Chaita rurashpa Danielca: “Ñuca llajtata apoyacushcatami yuyarcani. Mana alli cosascunata ruracushcataca nunca mana yuyarcanichu” ninmi.
Danielca asha ashami Bibliapi nishcata yachai callarirca. “Ñuca yuyashcata tucuipi cambiashpami gentecuna maimanta cajpipish Diospaj ñaupajpica tucuicuna igual cashcata ricui callarircani” ninmi. Danielca shujtaj gentecunata rijsishpaca: “Maimanta cashcataca mana yuyanichu. Tucuicunatami cꞌuyani. Tucui ladocunamantami alli amigocunata charini” ninmi.
Caimanta ashtahuan yachangapajca jw.org paginapi Núm. 3 de 2020 Rijchari! revistapi “¿Yangamanta juzganaca tucuringachu?” temata liyi.
3. Cullquillapi ama yuyachun
Achca gentecunami cushilla, alli causashpa catingapajca achca cullquita charinata mashcancuna.
BIBLIACA CAITAMI YACHACHIN: “Yachaica escudo shina huaquichijmi, cullquipish escudollatajmi. Shina cashpapish yachaica yachaj runamanca causaita cuj cashcamantaca, cullquita yallimari” (Eclesiastés 7:12).
CAITAMI NISHA NIN: Cullquitaca minishtinchijmi. Shinapish chaica cushilla alli causaitaca mana cui tucunchu (Proverbios 18:11; 23:4, 5). Dios yachachishcacunami cushilla, alli causaita cunga. Chai yachachishcacunataca Bibliapimi yachai tucunchij (1 Timoteo 6:17-19).
BIBLIAPAJ CONSEJOCUNAMI AYUDASHCA: Indonesiamanta Cardo shuti runaca achca cullquita charingapajmi sinchita trabajarca. Paica: “Achca gentecuna munashca shinami viajecunata rurarcani, valishca cosascunata randircani. Carrocunata, achca huasicunatapishmi charircani” ninmi. Shinapish pai charishcacunaca ratomi tucurirca. Cardoca: “Charij tucungapajca achca huatacunatami sinchita trabajarcani. Shinapish ñucaca desanimarishpa, imapajpish mana valishca shinami sintirircani” ninmi.
Cardo runaca cullquimanta Bibliapi consejocunatami paipaj causaipi pajtachi callarirca. Paica charij tucungapajca ña mana esforzarinchu. Chaipaj randica minishtirishcallahuan causanatami agllashca. Cardoca: “Dioshuan alli apanacunami cullquita charinata yalli cashcata intindishcani. Cunanca tranquilomi dormij tucuni, cushillapishmi causani” ninmi.
Cullquimanta Biblia ima yachachishcata ashtahuan yachangapajca jw.org paginapi Núm. 3 de 2021 Huillaj revistapi “¿Shuj titulota charina, cullquiyuj canaca alli causachunchu ayudanga?” temata liyi.
4. Picunalla aichapi chayarina cashcata alli yachachun
Gentecunaca picunalla aichapi chayarina cashcamanta chꞌican chꞌican yuyaicunatami charincuna.
BIBLIACA CAITAMI YACHACHIN: ‘Diosca huainayanamanta caruyachunmi munan. Jucha illaj cangapaj, Diospaj ñaupajpi alli ricuringapajpish cada unomi quiquin cuerpota jarcarinata yachana canguichij. Diosta mana rijsij llajta gentecuna shinaca ama caichijchu. Paicunaca shuj cꞌarihuan o shuj huarmihuan yallitaj chayarina munaitami charincuna. Chai munaicunataca manataj saquincunachu’ (1 Tesalonicenses 4:3-5).
CAITAMI NISHA NIN: Bibliapica picunalla aichapi chayarina cashcatami huillan. Cazadocuna shujtajcunahuan aichapi chayarina, cullquimanta chayarina, solterocuna chayarina, cꞌaripura huarmipura chayarina, animalcunahuan chayarinaca “huainayana” cashcatami nisha nin (1 Corintios 6:9, 10). Aichapi chayarinaca Dios cushca regalomi can. Chaimantami cazadocunalla paipaj cusahuan, paipaj huarmihuan chayarina can (Proverbios 5:18, 19).
BIBLIAPAJ CONSEJOCUNAMI AYUDASHCA: Australiamanta Kylie shuti huarmica: “Soltera cashpa shuj cꞌarihuan aichapi chayarishpaca pai cꞌuyaihuan ñucata cuidana cashcatami yuyarcani. Pero mana shina carcachu. Ashtahuanpish llaqui causaitami charircani” ninmi.
Tiempohuan Kylieca Biblia aichapi chayarinamanta ima nishcatami paipaj causaipi pajtachi callarirca. Paica: “Dios mandashcacunata cazunami llaquicunapi ama urmachun ayudashcata cuentata cuni. Cunanca ñuca cusa ñucata cꞌuyashcata, tranquilo sintirichun ayudashcatami sintini. Bibliapi yachachishcacunata cazushcamantami achca llaquicunamanta librarishcani” ninmi.
Caimanta ashtahuan yachangapajca jw.org paginapi “¿Manaraj cazarashpa ishqui causanaca allichu can?” temata liyi.
Ñucanchijta ruraj Diosllami ima alli cashcata yachachun ayudan. Pai nishcacunata cazuna mana jahualla cajpipish, cazungapaj esforzarishpaca huiñaicamami cushilla causashun.
