Profeta Moisesca, Diosca paipaj mandashcacunata cazujpimi bendicianga nircami (Deuteronomio 10:13; 11:27). Diostaca mana manchaimantachu cazunchij. Paitaca cꞌuyaj, llaquij cashcamantami cazunchij. Chashnami paita cꞌuyashcata, mana llaquichisha nishcata ricuchinchij. Bibliapica: “Diosta cꞌuyacushcataca pai mandashcacunata cazushpami ricuchina” ninmi (1 Juan 5:3).

¿Yaya Diosta cazushpaca ima bendicioncunatataj charishun? Ishqui yuyaicunata ricushun.

“Ñucaca Mandaj Diosmi cani. Cambaj allipaj yachachij cambaj Diosmi cani. Can catina ñanta yachachij Diosmi cani” (ISAÍAS 48:17).

Ñucanchijta ruraj Jehová Diosca ñucanchijtaca allimi rijsin. Imata ruranatapish paimi yachachin. Diospaj consejocunata catishpa alli decisioncunata agllangapajca, Diospaj Shimita yachashpami ñucanchij causaipi pajtachina canchij.

“¡Diospaj Shimita uyashpa cazujcunami, ashtahuan cushichishcacuna!” (LUCAS 11:28).

Cunan punllacunapica, Diospaj Shimipi nishcacunata cazuj achcacunami cushilla causancuna. Por ejemplo, Españamanta shuj runaca imamantapish pꞌiñarijllami carca. Shujtajcunata, hasta paipaj huarmitapishmi mana alli trataj carca. Shuj punllaca Jacobpaj churi Josepaj causaimanta Moisés imata escribishcatami liyirca. Josetaca esclavota shinami cꞌaturcacuna, qꞌuipaca yangamantami carcelpi churarcacuna. Chai tucuita pasashpapish Joseca mana pꞌiñarij, perdonaj, tranquilo cashcatami ricuchirca (Génesis, capítulos 37 a 45). Españamanta runaca: “Josemanta yachashpami ñucapish llaquij, shujtajcunata alli trataj, ñucallataj jarcarij canata yacharcani. Chaimantami cunanca familiahuan cushilla causani” ninmi.

Diospaj Shimipimi shujtajcunata ima shina tratana cashcata yachai tucunchij. Catij yachaipimi caimanta ashtahuan yachashun.