Huaquin gentecunaca, “¿Diospaj Shimipi caj yuyaicunataca cambiashcacunachu?” nishpami tapurincuna. Profeta Isaiasca: “Diospaj shimica huiñaita pajtacungallami” nircami (Isaías 40:8, QC, 1989). Bibliapi tiyaj yuyaicuna mana cambiashca cashcataca ¿ima shinataj yachanchij?

Diosca paipaj Shimipi tiyaj yuyaicunata ama pi cambiachunmi jarcai tucun. Ñaupa punllacunapica Diospaj Shimitaca maquihuanmi copiajcuna carca. Copiajcunaca Diospaj Shimipi tiyaj yuyaicunata ama anchuchingapaj, ama cambiangapaj o ama ashtahuan aumentangapajmi cada letrata cuentajcuna carca. Pero juchayujcuna cashcamantami huaquin copiajcunaca mana cuentata cushpa ashallapi pandarircacuna.

Ñaupa punllacunapi Diospaj Shimita quillcashca achca copiacunami tiyan. Chaimantami huaquin copiacunata comparashpa, maijan copiacuna alli o mana alli cashcata yachai tucunchij (ashtahuan yachasha nishpaca jw.org paginapi “¿Se ha cambiado o manipulado la Biblia?” nishca temata liyi).

Por ejemplo, Rollos del mar Muerto nishca copiacunamanta yachashun. Cai copiacunataca 1947 huatapimi mar Muerto cꞌuchullapi caj jutcucunapi japircacuna. Cai rollocunata o copiacunataca 2 mil huatacuna huashamanmi escribishcacuna carca. Diospaj Shimimanta huaquin partecunatami charin. Huaquin yachajcunaca chai copiacunatami cunan punllacunapi charishca Bibliahuan compararcacuna. ¿Imatataj tarircacuna?

Cai yachaj runacunaca chai tarishca rollocunatami alli estudiarcacuna. Chaimantami cunan punllacunapi tiyaj Bibliacunapish callaripi Dios quillcachishca yuyaicunallatataj charishcata nircacuna. * Yaya Diosca paipaj Shimipi tiyaj yuyaicunata ama pi cambiachunmi tucuita rurashca.

Cai tucuita yachashpami Diospaj Shimipi tiyaj yuyaicunataca mana pi cambiashcata confiai tucunchij. Cunanca profetacuna Diosmanta imata yachachishcata ricushun.