Achca gentecunaca micunata, maipi causanata mana charincunachu. Shujtajcunaca shamuj punllacunapaj shuj esperanzata charinatami minishtincuna. Dios ñucanchijta bendiciachunca ¿ima shinataj shujtajcunata ayudai tucunchij?

“Huajcha runata llaquishpa imata cushpaca, Mandaj Diosman mañachishca shinami. Chai allita rurashcamantaca, cutichishcami canga” (PROVERBIOS 19:17).

Jesusca shuj runa ima tucushcamantami parlarca. Chai runataca shuhuacunaca llaquichishpa, chꞌahuata huañuchishpami saquishcacuna carca (Lucas 10:29-37). Pero shujtaj runaca shujtaj llajtamanta cashpapish chai llaquichishca runatami ayudarca.

Cai alli runaca llaquichishca runataca pai pudishcahuan jambishpa, cullquita cushpami tucui alliyangacama ayudarca.

¿Imatataj caimanta yachacunchij? Jesusca ñucanchijpish tucui pudishcahuan shujtajcunata ayudachunmi yachachirca (Proverbios 14:31). Diospaj Shimipica Yaya Diosca ñallami tucui pobrezata, llaquicunata tucuchinga ninmi. Pero ¿ima shina, ima horastaj chaita ruranga? Catij yachaipimi Dios imalla bendicioncunata cusha nishcata yachashun.