Sacerdotecunaca temploman yaicuna corredortami Diospajlla chꞌicanyachishca ucuman yaicujcuna carca. ¿Cai corredorca mashnatataj midirca? 2023 ñaupamanca Traducción del Nuevo Mundo Bibliapica “Diospaj huasiman yaicuna corredorca anchomanca huasi midishca shinallatajmi 20 codosta charirca. Altomanpish 120-tami charirca” nircami (2 Crónicas 3:4). Shujtaj Bibliacunapipish cai corredorca altomanca 120 codosta midishcatami nin. Shina cashca cajpica cai torreca 53 metrostami midinman carca.

Shinapish huata 2023-mantaca Traducción del Nuevo Mundo Bibliapica “altomanpish 20 codostami charirca” ninmi. Chaica más o menos 9 metrosmi carca. a ¿Imamantataj chai cambiota rurarcacuna?

1 Reyes libropipishmi Diospaj huasiman yaicuna corredormanta parlan. Pero chaipica chai corredor mashnata midishcataca mana huillanchu. Por ejemplo, 1 Reyes 6:​3-pica Jeremiasca chai corredor anchoman, largoman mashnata midishcatami nin. Pero altoman mashnata midishcataca mana ninchu. Cutin, 1 Reyes capítulo 7-pica Diospaj huasipi tiyaj cobremanta rurashca tanque, cobremanta rurashca chunga uchilla carretacuna, cobremanta rurashca ishqui pilarcuna ima shina cashcatami huillan (1 Reyes 7:​15-37). Diospaj huasiman yaicuna corredor 50 metrosta yalli altoman midishca cajpica Jeremiasca chai medidamantami parlana carca. Pero paica mana chaimanta parlarcachu. Shinallataj Jeremías chaita quillcashcamanta achca huatacuna pasashca qꞌuipaca historiamanta yachajcunaca chai corredor mana yallitaj jatun cashcatami quillcarcacuna.

Construccionmanta yachajcunaca: “Diospaj huasiman yaicuna corredorca 120 codos altota charishca cajpi templopaj patacunaca chai corredortaca mana ahuantai tucunmanchu carca” nincunami. Ñaupa punllacunapica jatun huasicunataca rumicunahuan, ladrillocunahuanmi shayachijcuna carca. Por ejemplo, ñaupa Egiptopi tiyaj templocunapi corredorcunata ima shina rurajcuna cashcata yuyashun. Cimientocunataca anchotami rurajcuna carca. Chai qꞌuipaca huasi puntaman chayangacamaca asha asha uchillayachishpami shayachijcuna carca. Shinapish Salomón rurashca temploca mana chashna rurashcachu carca. Construccionmanta yachajcunaca templopaj patacunaca más o menos 3 metros anchota charishcatami yuyancuna. Construccionmanta yachaj Theodor Busink nishca runaca: “Temploman yaicuna corredor 120 codos altota medishca cajpica templopaj patacunaca chai jatun corredortaca mana ahuantai tucunmanchu carca” nircami.

Ñaupa tiempopi copiajcunaca 2 Crónicas 3:​4-pi ima nishcata copiacushpaca pandatami copiashcangacuna. Huaquin ñaupa quillcashcacunapica cai versopica “120” ninmi. Cutin, shujtaj ñaupa quillcashcacunapica “20 codos” ninmi. Por ejemplo, siglo quintopi quillcashca Códice alejandrino nishca quillcashcapi, siglo sextopi quillcashca Códice ambrosiano nishca quillcashcapipishmi “20 codos” nin. ¿Imamantashi mana tucui quillcashcacunapica chashnallataj nin? Hebreo rimaipica “cien” y “codos” nishca shimicunataca casi chashnallatajmi quillcajcuna carca. Chaimantami ñaupa tiempopi copiajcunaca “20 codos” nishpa quillcanapaj randica “120” nishpa quillcashcangacuna.

Salomón rurashca templo ima shina cashcata intindinaca allimi can. Pero chai templo imata ricuchishcata intindingapaj esforzarinami ashtahuan valishca can. Salomonpaj temploca Jehová Diospaj templo espiritualtami ricuchin. Jehová Diosca tucui paita sirvijcunatami chai templopi paita adorachun invitashca. Chaimantami cushilla sintirinchij (Hebreos 9:​11-14; Apocalipsis 3:12; 7:​9-17).