Shuj persona jatun tucushcata sintishpaca shujtajcunatami yangata shina ricun. Pailla tucuipi alli cashcatapishmi yuyan. La Encyclopædia Britannica nishca libropica: “Achca culturamanta gentecunaca paicunapaj causaimanta, micunamanta, churanamanta, costumbrecunamanta, crishcacunamanta y shujtaj ruraicunamantami shujtaj culturacunamantaca yalli cashcata yuyancuna” ninmi. Ama chashna yuyangapajca ¿imatataj rurana canchij?

‘Ama jatun tucushpa caishujcunaca cancunata yalli cashcata yuyaichij’ (FILIPENSES 2:3).

¿Imatataj nisha nin? Ama jatun tucushcata sintingapajca humildemi cana canchij. Humilde cashpami shujtajcunaca huaquin ruraicunapi ñucanchijta yalli cashcata intindishun. Maijan culturamanta cashpapish mana tucuipichu alli cai tucunchij.

Stefan shuti runahuan ima tucushcata yachashun. Paipaj llajtamanta gentecunaca shujtaj llajta gentecunataca mana allitami juzgajcuna carca. Paica: “Shujtajcunata yangata shina ricunata, juzganata saquingapajca shujtajcuna ñucanchijta yalli cashcatami  ricuna canchij. Mana tucuita yachashcamantami shujtajcunamanta imata yachai tucunchij” ninmi.

Canpish huaquin ruraicunapica pandarijlla cashcata reconociri. Shinallataj shujtajcuna canta yalli alli imata ruraj cashcata yuyari. Shuj grupomanta gentecunaca ‘tucuicunami chai layallataj igual can’ nishpaca ama yuyaichu.

Shuj grupomanta caj personata mana allita juzganapaj randica cashna tapuri:

• ¿Chai personapaj ruraicunaca natijchu alli can? ¿O ñuca ruraicunamanta asha diferentellachu can?

• ¿Paipish ñuca imapi pandarijlla cashcataca ricui tucunchu?

• ¿Chai personaca imapitaj ñucata ashtahuan yalli alli can?

Cai tapuicunata shungumanta contestashpaca, shujtajcunata mana allita juzganata saquishpami paicunapaj alli ruraicunata ricui callarishun.