Shuj yayaca paipaj 7 huatacunata charij shuj huahuamanmi: “Achca huatacuna huashamanmi Diosca cai Allpata, caipi imalla tiyashcacunata rurarca. Shinallataj intita, lunata, lucerocunatami rurarca” ninmi. Huahuaca ashata yuyashpami: “Papito, ¿Diostaca pitaj rurarca?” nishpa tapun.

Yayaca: “Diostaca mana pi rurarcachu. Siempremi tiyashca” ninmi. Huahuaca chai respuestata uyashpaca cushillami saquirin. Shinapish huiñashpa catishpaca chaita intindinaca paipajca sinchimi can. Paica ashtahuan yachanatami munan. Jahua pachacunapish, cai Allpapish shuj huiñachij rurajpimi tiyai callarishca. Pero ¿Diosca ima shinataj tiyai callarirca? nishpami yuyan.

¿Bibliapica imatataj yachachin? Yaya paipaj huahuaman nishca yuyaillatatajmi nin. Moisespish Jehová Diostaca: “Urcucunapish manaraj huacharijpimi ña tiyashcangui. Allpatapish, cai pachatapish manaraj rurashpami huiñaimanta huiñaicama ña tiyaj Dios cangui” nircami (Salmo 90:1, 2). Profeta Isaiaspish chai shinallataj yuyaitami nirca. Paica: “Tucui cai pachata rurajca huiñaita causaj Mandaj Dios cashcataca ¿Manachu yacharcangui? ¿Manachu uyarcangui?” nircami (Isaías 40:28). Judas libropipish Diostaca ‘huiñai huiñaita tiyaj Dios’ ninmi (Judas 25).

Cai versocunaca ‘Diosca huiñaita Jatun mandaj cashcatami’ ricuchin. Apóstol Pablopish chaitami nirca (1 Timoteo 1:17). Dios mashnata causashcata intindinata yuyashpapish mana pudishunchu. Diosca siempremi tiyashca y siempremi tiyanga (Apocalipsis 1:8). Diosllami huiñai huiñaita tiyashca y huiñai huiñaita tiyanga. Pai shinaca pi mana tiyanchu.

¿Imamantataj cai yuyaita intindinaca sinchi can? Ñucanchij causaica ashacamallami can. Chaimantami Dios tiempota ricushca shinaca mana ricui tucunchij. Por ejemplo, Diosca siempre tiyashcamantami huaranga huatacunataca shuj punllata shinalla ricun (2 Pedro 3:8). Cai ejemplopi yuyashun. Shuj saltamonteca 50 punllacunallatami causan. ¿Chai saltamonteca runacuna 70, 80 huatacunata causashcataca intindingachu? Mana. Ñucanchijpish tucuita ruraj Dioshuan ricunapajca chai uchilla saltamonte shinallami canchij. Diospaj yuyaicunapish ñucanchij yuyaimantaca maihuan yallimi can (Isaías 40:22; 55:8, 9). Chaimantami Dios mashna tiempota causashcata, pai ima shina cashcataca mana tucuita intindi tucunchij.

Cai yuyaita intindina mana jahualla cajpipish Diosca siempremi tiyashca. Diosta pi huiñachishca cashpaca chai huiñachijmi tucuita ruraj canman carca. Pero Bibliapica Jehová Diosmi tucui ima tiyashcatapish rurarca ninmi (Apocalipsis 4:11). Shuj tiempopica ni jahua pachacunapish, ni cai pachapish manaraj tiyarcachu (Génesis 1:1, 2). Shinashpaca ¿chaicunaca ima shinataj tiyai callarishcanga? Jahua pachacunapish, cai pachapish tiyachunca shuj huiñachijmi ña tiyana carca. Shinallataj paipaj Churita, angelcunata o shujtaj gentecunata manaraj huiñachishpami paica ña tiyana carca (Job 38:4, 7; Colosenses 1:15). Diosca manaraj imata huiñachishpaca paillami carca. Pi shujtaj mana tiyarcachu. Chaimantami paitaca mana pi huiñachirca o rurarca.

Ñucanchij vida, jahua pachacuna, cai pacha ima shina rurashcata ricushpami huiñaita causaj Dios tiyashcata intindinchij. Cai universota ruraj, cai universopi tiyaj tucui cosascuna ordenpi cachun mandashcacunata churaj Diosca huiñaitami tiyana cashca. Paimi tucui causaita charijcunaman causaita cushca (Job 33:4).