¿Ckaanqui cá personasta imaina cusisckas tiancu? Suj atun tantacunasniycupi tiancu. Yáyap siervusnin unaymanta ina, picunasta cachacora ima quimsa cutis huatapi tantanacunancúpaj, nockaycu cusicuycu áicap atun tantacunaspi tantanacuycu (Deuteronomio 16:16). Sapa huata quimsa atun tantacunas apiycu: íshcay atun tantacunas suj punchaumanta sapa suj, y suj astaan atun tantacuna quimsa punchausmanta. ¿Imaina beneficiaaycu chá atun tantacunas?

Yanapaaycu astaan cuscayasckas huauckesniycuan tianaycúpaj. Israelitas cusícoj carancu Jehovát alabas «ashca huauckesuan tantanacus», y nockaycupas cusicuycu payta adoras cuscas huauckesniycuan (Salmos 26:12; 111:1). Chá tantacunaspi suj oportunidar apiycu tiáypaj huauckesuan sujcuna congregaciunesmanta y sujcuna paisesmanta. Chaupi punchaupi cuscas micuycu lugarpi atun tantacunallamanta y chá ’ruan ima cá ocasión espiritual astaan alli cananta (Hechos 2:42). Chaypi ckaaycu múnay ima cuscayachiaycu túcuy huauckesuan túcuy mundumanta (1 Pedro 2:17).

Yanapaaycu feycupi astaan sinchi tiáypaj. Israelitas beneficiacorancu unanchas Yáyap ’Rimayninta ima yachachicorancu (Nehemías 8:8, 12). Nockaycupas anchata valoraycu yachachinastas ima atun tantacunaspi chasquiycu. Sapa programa basascka tían suj tema Bibliamanta. Súmaj discursusuan y representacionesuan yachachiaycu imaina Yáyap voluntarninta ’ruayta. Astaanpas, animút chasquiycu uyaris nisckancuta picunas cristianus ’ruacusckancunamantapacha dificultadesnincuta vencerancu. Atun tantacunaspi quimsa punchausmanta ckaacuncu obras teatrus ina maypi vesticuncu ropasuan unaycunas ina, ima ’ruan astaan cierto Biblia nisckanta y alli yachachinas sackeaycu. Y túcuy atun tantacunaspi bautisacuncu picunas ckaachiyta munancu ima Yayaman dedicasckas tiancu.

• ¿Imajchu cá atun tantacuna ocasiones cusicúypaj cancu?

• ¿Imaina yanapasunquiman atun tantacunasman ’riyptiyqui?