Áicap huámaj cristianuscka tantácoj carancu, paycuna cántaj carancu, óraj carancu y Yáyap ’Rimayninta léej carancu (1 Corintios 14:26). Ckam tantacunasniycuman amuspá ckáaj ’rinqui ima nockaycupas chaytapas ’ruaycu.

Biblia nisckanta yachachiaycu. Túcuy sábados o domingos, congregaciunes tantanacuncu uyarinancunápaj suj discursu Bibliamanta treinta minutusmanta, chaypi ckaachin imaina causayniycupi yanapaaycu Biblia yachachisckanta, y cá tiempus mana allismanta ima causaycu. Picunas amuncu invitasckas cancu leenancunápaj testusta Bibliasnincupi. Chaymantá Estudiu Bibliamanta Atalayaan apiycu suj horamanta, maypi revista Atalaya tapunasuan y respuestasuan estudiaycu y túcuy congregaciunmanta cajcuna invitasckas cancu participáypaj. Chayna aprendeycu imaina practicapi churayta causayniycupi Biblíap principiusninta. Túcuy Ashpapi astaan 115.000 congregaciones tían, y sujlla laya informaciunta estudiancu.

Yanapaaycu allít yachachinaycúpaj. Astaanpas suj tuta semanapi apiycu suj tantacuna quimsa partespi, huajyascka Vida y Ministerio Cristianos, maypi analisácoj ’rin su programa ima túcuy meses llojsin, Vida y Ministerio Cristianos—Guía de actividades para la reunión. Huámaj parte cá tantacunamanta, Tesorus Yáyap ’Rimayninmanta, yanapaaycu familiarisacuyta suj partean Yáyap ’Rimayninmanta ima congregaciun na leesa cara. Chaymantá, Alli Yachachejcuna Cas, cá partepi demostraciunes tían ima ckaachincu imaina sujcuna persunasta Bibliamanta ’rimayta atiycu. Pi apin cá parte comentarius ’ruan ima yanapaaycu lecturaycuta sumayachíypaj y allít ’rimáypaj (1 Timoteo 4:13). Y chaymantá, cá parte Cristianus Ina Causas, yachachiaycu imaina Biblíap principiusnin causayniycupi yanapaaycu. Cá parte tapunasuan y respuestasuan can ima yanapaaycu Bibliát allít unanchanaycúpaj.

Ckam tantacunasniycuman amuptiyqui, sorprendecunqui ckaas imaina alli yachachinasta Bibliamanta chasquiycu (Isaías 54:13).

• ¿Imát ckáaj ’rinqui tantacunasman Jehóvap testigusninmanta ’riptiyqui?

• ¿Mayckan tantacunasmanta ’ris ckallariyta munanquiman?