MALTAUNA TAPURINUN
¿Caripura huarmipura tacarisha causana alichu an?
David 23 huatara charij nin: “Iñasha riushcai ñucaj yapa shinzhi aca cariunara munarisha ricungaj callarishcamanda. Quiricani shu timpulla anga nisha shinajpi cai sintishcaunara mana saquina ushashcani”.
David Diosta sirvij an pai Diosta casuna munanmi. ¿Maican pai cuinta Dios mandashcara pactachina ushanzhu? ¿Imara Dios iyan caripura huarmipura tacarisha causanamanda?
¿Biblia imara yachachin?
Caripura huarmipura tacarisha causanamanda timpu pasasha runauna iyashcara turcarisha riun. Shinajpi Diosta sirvijcuna runauna iyashcara yangamanda mana catinchi, imasna Efesios 4:14 nin: mana saquinchi “ima yachachina huaira cuinta pai munashcama apai tucungaj”.
Caripura huarmipura tacarisha causanamanda rimasha Biblia pasajta riman. Ricushun imara nin.
“Shu carihua ama puñuichu imasna can shu huarmihua puñuushca cuinta” (Levítico 18:22).
“Paiguna shunguuna ucha munaibi, [...] Dios casna rajcunara pinganaita munaira rangaj cuca, huarmiuna paigunama cushca rana samira saquisha, mana cushca samira ranauca” (Romanos 1:24, 26).
“Ama pandanguichichu: shujhua tacarijcunas, runa rashca diosta adurajcunas, huarmihua tacarijcunas, irusta rajcunas, caripura tacarijcunas, shuhuajcunas, cullquira yapajta munaisiquiunas, machajcunas, camijcunas, umachisha quichujcunas, Dios mandana pachara mana apinaungachu” (1 Corintios 6:9, 10).
Dios mandashcauna tucuigunaj valin. Caripura huarmipura tacarij ajpi mana ajpis tucuiguna ñucanchi ucha munaigunara arcana anchi Yaya Dios chijnishcaunara mana rurangaj (Colosenses 3:5).
¿Cai Biblia nishcara imara nisha nin?
¿Biblia yachachinzhu caripura huarmipura tacarisha causajcunara chijnina ashcara?
Mana. Biblia yachachin mana pitas chijnina ashcara. Maspas animachin, ‘cushi shungura charingaj tucui runaunahua’ ima tunu causaira charijpi (Hebreos 12:14). Chimanda manali an caripura huarmipura tacarijcunara burlarina, macana, imaras rurasha manali tratana.
Shinajpi ¿Jesusta catijcuna caripura huarmipura casarangaj gobierno mandashcaunara cuntra rina anchi?
Biblia rimashca cuinta Yaya Dios shu cari shu huarmihua casaranuchu mandan (Mateo 19:4-6). Caripura huarmipura casarana leyguna, gobiernoguna churangaj ajllanun. Biblia yachachin Jesusta catijcuna politicai mana satirina anchi. Chimanda Jesusta catijcuna caripura huarmipura casaranas leygunara mana apoyanchi, shinallara cuntra mana rinchichu (Juan 18:36).
¿Imara rurana ushan?
¿Shu caripura huarmipura tacarij runa turcana ushanzhu?
Ari, ushan. Punda siglomanda maican caripura huarmipura tacarij runauna turcanuca. Biblia ricuchin paiguna causana tunura mana saquisha, Dios mandana pachara mana apina ushashcara, shinajpi chita rimashca huasha nin: “Casna tunui causajcuna acanguichi huaquinguna” (1 Corintios 6:11).
Shina ajllaira ¿chi runauna chi tunu manali munaigunara ña mana charisha catinucachu? Mana. Diospa shimi nin: “mushuj causaira churarichi. Caimi mushujyasha rin, canguna pactajta yachanagama” (Colosenses 3:10). Shinami an, cai manali munaigunara mana charingaj caran punzha ursarisha catina ministinchi.
¿Shu runa Yaya Diosta casungaj munashas cai manali munaigunara charisha catijpi imara rurana ushan?
Maicans manali munaigunara ricurijpi caran shu ajllana ushanchi chi manali munaiguna huanchinara, uchai mana urmangaj. ¿Imasnara caita rurana ushanchi? Biblia nin: “Ispiritui purichi, ucha aicha munashcara ama raichichu” (Gálatas 5:16).
Imasna Biblia ricuchin ucha aicha munashcara charisha catishun. Chi munaigunara vinsingaj yanapaira ministinchi. Chimanda caran punzha Bibliara estudiasha, Diosta mañashas chi manali munaigunara vinsisha catingaj ursara charishun.
Pundai rimashca David riparaca cai sirtu ashcara, astaumbas mas ursara apica paihua Diosta sirvij yaya mamahua paita tucushcamanda cuintashcai, pai cuintan: “Shu llashaj carga aparina cuinta sintij acani, pundamanda paigunara cuintashca ajpi malta ashcai mana yapa llaquirinima”.
Jehová mandashcauna yanapan cushi causangaj, shungumanda quirinchi pai mandashcauna “alimi an, shungura cushiyachinun”, tucui huras casungaj ursarisha sirtu pacha cushi causashun (Salmo 19:8, 11).
