Yaya Dios churi ushushiunara mandashca paiguna rucuyashca yayaunara valichinuchu paiguna tucui ministishcara cusha. Biblia nin, ali Diosta aduraj churiuna “yachanauchu ñaupa punda llaquijcuna tucungaj, paiguna quiquin ailluunara iyaringaj, paiguna iñachishcara cutipangaj. Caimi ali munashca Diospa ñaupajpi” (1 Timoteo 5:4, Mushuj pactachina shimi). Paiguna yayaunara ali cuirasha Yaya Dios huahuaunara cushca mandashcara pactachinun (Efesios 6:2, 3).

 Biblia mana nin caran rucuyashca yayaunara imasna cuirana ashcara, shinajpi ricuchin imara ruranuca ñaupa Diosta sirvij runauna paiguna rucuyashca yayaunara cuirangaj. Shinallara Biblia maican ali camachishcaunara cun rucuyashca yayaunara cuirajcunara yanapangaj.

•  Biblia quillcashca timpui ¿imasnara huaquin Diosta sirvijcuna paiguna rucuyashca yayaunara cuiranuca?

•  ¿Ima camachishcaunara Biblia cun?

•  ¿Biblia mandanzhu yayaunara paiguna huasii cuirana ashcara?

 Caran shu ushashca tupura ruranuca paigunara ali cuirangaj.

•   José paihua rucuyashca yaya Jacobmanda carui causaca. Tucui ministishcara rurarca paihua yaya pai mayambi causachu. José ricuca paihua yaya micunara, ali causangaj huasiras charichu (Génesis 45:9-11; 47:11, 12).

•   Rut paihua cari mama llactama causangaj rica paita cuirangaj, chibi shinzhi tarbaca pai ministishcara cungahua (Rut 1:16; 2:2, 17, 18, 23).

•   Jesús manara huañushcallaira, apóstol Juanda ajllaca paihua mamara ali cuirachu, María chi timpui ña huaccha huarmi tucushca anga (Juan 19:26, 27). a

 Rucuyashca yayaunara cuirana yapa shinzhi ana ushan. Shinajpi Biblia camachishcauna ashca yanapana ushanmi.

•   Paigunara valichisha respetuhua tratai.

   Biblia ninmi: “Camba yayara mamaras valichi” (Éxodo 20:12).

   Imasna pactachingaj: Usharijpi, saqui paigunara imasna cuirangaj ajllanuchu shinallara paiguna gustashca ruranara rurasha catinuchu. Can rurana ushashcara rurai paigunara yanapangaj. Astaumbas tucui huras respetura ricuchisha paigunara valichingui.

•   Camba yayaunara intindingaj, perdonangaj ursari.

   Biblia ninmi: “Alira intindij runa paihua piñarinara arcan, paihua partimanda yapa sumaj an shu pandarishcara perdonangaj” (Proverbios 19:11).

   Imasna pactachingaj: Maican huras camba yayauna piñasha rimanunga shinallara paita yanapangaj rurashcaunara mana pagarachununga. Chita tucujpi tapuri: “¿Pai cuinta ñuca pasajpi imasnara sintirinima?”. Paiguna sintishcara intindisha, perdonasha paigunara candas yanapangui mana yapa shinzhi achu.

•   Shujcuna yanapaira mascai.

   Biblia ninmi: “Ali cuintarinara mana charisha ima ruranas manali llucshin, shinajpi ashca camachijcuna tiajpi ima ruranas ali llucshin” (Proverbios 15:22).

   Imasna pactachingaj: Yachangui imasna camba yayauna ungüigunahua yanapana ushangui. Tapungui imasna gobierno chi llactai yanapaun rucuunara cuirangaj. Shuj yayaunara cuirajcunahua cuintari. Shinallara huauqui paniunara charisha, paigunahua cuintari yayauna ministishcamanda shinallara imasna pariju yanaparina ushanun paigunara cuirangaj.

•   Mana canlla tucuira rurangui.

   Biblia ninmi: “Shinajpi sabiru iyana mansu shunguyujcunahua an” (Proverbios 11:2).

   Imasna pactachingaj: Riparai ima rurana, ima mana rurana ushangui. Ñucanchi munashca cuinta yayaunara cuirangaj timpura, ursaras mana charinchi. Camba yayauna ministishcara cungaj mana ushasha, ailluunara doctorgunaras yanapaira mañana ushangui.

•   Cambas cuirari

   Biblia ninmi: “Mana imahuraspas pi runas paihua quiquin aichara chijnicachu, astaumbas caran, cuiran, imasna Cristo iglesiara cuirashcasna” (Efesios 5:29).

   Imasna pactachingaj: Camba yayaunara cuirana ashas, cambas cuirarina ministingui, astaumbas casarashca asha camba ailluras cuirana angui. Mana unguringaj ali micuna angui, ministishca tupu samana, puñunas angui (Eclesiastés 4:6). Maican huras can munashcara rurangaj timpura llucchina angui. Shina rurasha, cushihua camba yayaunara cuirangaj mas ahualla anga.

 Biblia caimanda mana riman. Maican ailluuna saquinun paiguna yayauna ushashca timpumanda paiguna huasii causanuchu. Shinajpi mas cuiranara ministinujpi maicanguna iyanun rucuuna tiana huasii causanuchu mas ali anga. Shina ajllaira, ailluuna tandarina anun tucuigunaj ima mas ali ashcara ajllangaj (Gálatas 6:4, 5).