Jesusta catijcuna Diospa Reinora paiguna shungüi mana apanun. a Biblia “ahua pacha mandana” nisha ricuchin maibi ashcara (Mateo 4:17). Shinallara yachachin sirtu gobierno an, ahua pachamanda ña mandaunmi. Ricushun imarasha Biblia casna intindichin.

•   Diospa Reino mandajcunara, runaunaras mandangaj, leygunaras charin, shinallara mandana ushaira charin ahua pachai cai Allpais Diospa munaira rurangaj (Mateo 6:10; Apocalipsis 5:10).

•   Diospa Reino mandangaraun ‘tucui tunu runaunara, llactaunara, shimiyujcunaras’ (Daniel 7:13, 14). Mana an runauna ajllashca gobierno, maspas Yaya Dioslla paihua gobiernora churashca runaunara mandangaj (Salmo 2:4-6; Isaías 9:7).

•   Jesús paita chuyaj shunguhua catijcunara nica paihua pariju tianunga ahua pacha mandanai. ¿Imarasha shina nica? Paillara nicami: “cangunas tiaringaj rey apu tiarinaunai” angaraushca paihua pariju apuuna cuinta angaj (Lucas 22:28, 30).

•   Diospa Reino paita chijnijcunara tucuchinga (Salmo 2:1, 2, 8, 9; 110:1, 2; 1 Corintios 15:25, 26).

 Shinashaga Biblia mana yachachinzhu Diospa Reino runauna shungüi tiashcara. Maspas Biblia yachachin “Dios mandana pacha evangelio ali shimi” shunguma pactashcai ali causangaj yanapana ushanmi (Mateo 13:19; 24:14).

Shinajpi Jesús ¿imara ningaj munaca “Dios mandana pacha canguna chaupi shungüi tian”? nisha.

 Maican Bibliagunai Lucas 17:21 cai shimiunahua pasachinushca: “Dios mandana pacha canguna chaupi shungüi tian” (Mushuj Pactachina Shimi). Chiraigu maican runauna quirinun Diospa Reino shungüi tiashcara. Shinajpi cai versículo nishcara ali intindingaj huashai tiaj textogunai Jesús rimashcara yachana ministinchi.

 Jesús cai shimiunara rimauca fariseo runaunara. Paiguna panda religiongunamanda pushajcuna anuca, Jesusta yapa chijnisha huanchinuca (Mateo 12:14; Lucas 17:20). Jesús ¿rimana munacachu cai manali runauna shungüi Diospa Reinora charishcara? Mana, paillara nica: “Astaun shungu ucui manalihua, manali iyaihuas undashcami anguichi” (Mateo 23:27, 28).

 Shuj Bibliaguna alira intindichinun Lucas 17:21​pi Jesús rimana munashcara. Nuevo Testamento Original nishca Biblia nin: “Diospa Reino ña canguna mayambi tian” shinallara Traducción del Nuevo Mundo Biblia nin: “Diospa Reino canguna chaupii tian”. Shinajpi ¿ima tunuibi Diospa Reino fariseoguna mayambi, chaupii aca? Jesús paiguna chaupii aca, Yaya Dios paihua Reinoi mandangaj ña ajllashca ashcara intindichingaj pai rimaca Diospa Reino paiguna chaupii ashcara (Lucas 1:32, 33).