Espíritu santo Diospa ushai, paihua ursami an (Miqueas 3:8; Lucas 1:35). Dios paihua munashcara pactachingaj paihua espíritu santo maicans partima cachana ushan (Salmo 104:30; 139:7).

 Bibliai “espíritu” shimi hebreo shimii rúaj , griego shimii pnéuma an. Ashca cuti cai shimiunara rimasha Diospa espíritu santomanda riman (Génesis 1:2). Shinallara cai shimiuna cai catij iyaigunara intindichingaj anun:

•   Samanamanda (Habacuc 2:19; Apocalipsis 13:15).

•   Huairamanda (Génesis 8:1; Juan 3:8).

•   Runauna, animalgunas causangaj ushaimanda (Job 34:14, 15).

•   Shu runa imasna ashcara intindichingaj munashcamanda (Números 14:24).

•   Dios, angelgunamandas (1 Reyes 22:21; Juan 4:24).

 Tucui cai iyaiguna runauna mana ricuihuaj cosasgunamanda intindichinun. Shina ajllaira paiguna rurashcaunara ricuna ushanchi. Diospa espíritu santo “huaira cuinta an, mana ricuihuajchu shinallara ushajmi” (Diccionario expositivo de palabras del Antiguo y del Nuevo Testamento exhaustivo de William E. Vine).

 Bibliai Diospa “maquiunamanda”, “riruunamanda” rimasha paihua espíritu santohua ima rurana ushashcara intindichin (Ricui Salmo 8:3; 19:1; Lucas 11:20; Mateo 12:28). Imasna shu artesano runa, paihua maquiunai, riruunai tiaj ursahua tarban, shinallara Yaya Dios paihua espíritu santora utilizashca caita rurangaj:

•   Ahua pachai, cai Allpai tucui tiajcunara (Salmo 33:6; Isaías 66:1, 2).

•   Bibliara quillcachingaj (2 Pedro 1:20, 21).

•   Ñaupa timpui paihua sirvijcuna milagrogunara rurana ushanuchu, Bibliamanda yachachinuchu (Lucas 4:18; Hechos 1:8; 1 Corintios 12:4-11).

•   Paita casuj runauna ali shungu, ali ranaras ricuchingaj (Gálatas 5:22, 23).

Espíritu santo mana shu runachu an

 Bibliai espíritu santomanda rimasha maicambi nin Diospa “maquiuna”, “riruuna” “samai” ashcara, chita ricuchin espíritu santo mana shu runa ashcara (Éxodo 15:8, 10). Iyashun, tarbangaj artesano runa mana maquiunallara ministinzhu, astaun intiru aicha, paihua umaras, shinallarami Dios paihua munashcara rurangaj paihua espíritu santora utilizan (Lucas 11:13). Astaumbas, Biblia nin espíritu santoga yacu, quirina, yachana cuinta ashcara. Cai intindichinmi espíritu santo mana shu runa ashcara (Isaías 44:3; Hechos 6:5; 2 Corintios 6:6).

 Biblia Diospa quiquin shuti Jehová ashcara riman shinallara paihua Churi shuti Jesucristo ashcara, shinajpi espíritu santo shutira intiru Bibliai mana tuparinzhu (Isaías 42:8; Lucas 1:31). Biblia nin: “Esteban Santu Ispirituhua undashca, ahua pachama ricusha Diospa sumajta ricuca, Jesustas Diospa ali maqui partima shayauta ricucami” (Hechos 7:55). Iyarishun, Jesusta catij Esteban ahua pachamanda cai ricurinara ricushcai, mana ricucachu quinsa runaunara astaun ishquillara, Yaya Diosta, Jesustas. Yaya Dios paihua espíritu santo utilizaca paihua ricuchishcara Esteban ricuna ushachu.

 Huaquinguna quirinun: Yaya, Churi, Espíritu Santo shujlla runa ashcara. 1 Juan 5:7, 8 rimashcaunai Torres Amat, Reina Valera, Mushuj Pactachina shimi Bibliaguna caita intindichinun nisha.

 Biblia sirtu yachachina: Mushuj Pactachina shimi Biblia 1 Juan 5:7, 8​pi nin: “Ahua pachai quinsa rimaj tian: Yaya Dios, Causana shimi, Ispiritu. Cai quinsa shujllami. Cai pachai quinsa rimaj tian: Diospa Ispiritu, yacus, yahuars. Cai quinsa chi tunullarami rimanaun”. Shinajpi ricsishca Bibliara ali estudiajcuna yachanushca apóstol Juan mana cai shimiunara quillcashcachu, chiraigumanda cai shimiuna mana Bibliai tianachu an ninun. Bibliara yachaj Bruce M. Metzger runa rimaca: “Cai shimiuna mana sirtu an, Nuevo Testamento partii mana tianachu anun” (Un comentario textual al nuevo testamento griego).

 Huaquinguna quirinun: Biblia riman espíritu santo shu runa cuinta ashcara shinashaga chita sirtumi anga nisha.

 Biblia sirtu yachachina: Huaquimbi Bibliai espíritu santo shu runa cuinta ashcara riman shinajpi chi mana intindichin shu runa ashcara. Shinallara Biblia nin yachana, huañuna, ucha shu runa cuinta ashcara (Proverbios 1:20; Romanos 5:17, 21). Por ejemplo, Bibliai uchamanda rimasha umachij, yapajta munayarij, huañuchij runa cuinta an nin (Mateo 11:19; Lucas 7:35; Romanos 7:8, 11).

 Huaquinguna quirinun: Bautisarina espíritu santo shutii rurarin, chiraigumanda espíritu santo shu runami anga nisha.

 Biblia sirtu yachachina: Maicambi Biblia “paihua shutii” nishca rimasha intindichingaj munan maican runa rurana ushan cushca ushaihua (Deuteronomio 18:5, 19-22; Ester 8:10). Runa shimii shinallara tucun, “ley mandashca shutii” rimasha mana intindichina munan shu runa ashcara. Chiraigumanda shu runa espíritu santo shutii bautisarijpi ricuchin pai yachan Dios paihua munashcara pactachingaj espíritu santo utilizan (Mateo 28:19).

 Huaquinguna quirinun: Jesusta punda catijcuna, paihua apostolguna quirij anuca espíritu santo shu runa ashcara nisha.

 Biblia sirtu yachachina: Biblia, historiamanda rimajcunas chita mana yachachinzhu. Encyclopædia Britanica nishca cuinta: “Jesús cai Allpama shamushca huasha 381 huatai Concilio de Constantinopla nishca tandarinai espíritu santo shu runa, shu Dios ashcara difindinuca”. Shinajpi cai tandarina tiaca 250 huatauna yali puchucai apóstol huañushca huasha.